ການເຄື່ອນໄຫວຂອງທ່ານ ປະທານປະເທດ Truong Tan Sang ຢູ່ສະຫະພັນ ລັດເຊຍ
Hoang Dung -
ທ່ານປະທານປະເທດ Truong Tan Sang ແລະ ທ່ານປະທານພັກກອມມູນິດສະຫະພັນ ລັດເຊຍ Gennady Andreyevich Zyuganov
(ພາບ: ສຳນັກຂ່າວສານຫວຽດນາມ)
(vovworld) - ໃນຂອບເຂດການຢ້ຽມຢາມ ສະຫະພັນ ລັດເຊຍ ຢ່າງເປັນທາງການ, ຕອນເຊົ້າວັນທີ 30/7, ຢູ່ວັງ Kremlin, ທ່ານປະທານປະເທດຫວຽດນາມ Truong Tan Sang ໄດ້ໃຫ້ການຕ້ອນຮັບທ່ານປະທານພັກກອມມູນິດສະຫະພັນ ລັດເຊຍ Gennady Andreyevich Zyuganov, ພົບປະກັບທ່ານ Torosin, ຜູ້ວ່າການແທນປະທານສະພາສະຫະພັນ (ຫຼື ສະພາສູງ). ທ່ີການຕ້ອນຮັບທ່ານປະທານພັກກອມມູນິດສະຫະພັນ ລັດເຊຍ Gennady Andreyevich Zyuganov, ທ່ານປະທານປະເທດ Truong Tan Sang ຢືນຢັນວ່າ: ຍາມໃດຫວຽດນາມກໍຖືເປັນສຳຄັນການປັບປຸງ ແລະ ພັດທະນາການພົວພັນມິດຕະພາບ, ການຮ່ວມມືຫຼາຍດ້ານກັບບັນດາປະເທດເພື່ອນມິດທີ່ເປັນມູນເຊື້ອ, ກັບບັນດາພັກກອມມູນິດ, ກຳມະກອນໃນໂລກ, ໃນນັ້ນໃຫ້ບຸລິມະສິດເພີ່ມທະວີການພົວພັນທີ່ເປັນມູນເຊື້ອ ຖານອ້າຍນ້ອງທີ່ໄວ້ເນື້ອເຊື່ອໃຈກັບພັກກອມມູນິດສະຫະພັນລັດເຊຍ. ທ່ານປະທານພັກກອມມູນິດສະຫະພັນ ລັດເຊຍ Gennady Andreyevich Zyuganov ຢືນຢັນຈະສືບຕໍ່ສະໜັບສະໜູນແນວທາງປະຈຸບັນຂອງການນຳລັດເຊຍ ແມ່ນເພີ່ມທະວີ ແລະ ພັດທະນາການພົວພັນຄູ່ຮ່ວມມືຍຸດທະສາດກັບຫວຽດນາມຢ່າງບໍ່ຢຸດຢັ້ງ. ເມື່ອພົບປະກັບທ່ານ Torosin ຜູ້ວ່າການແທນປະທານສະພາສະຫະພັນ (ຫຼື ສະພາສູງລັດເຊຍ), ທ່ານປະທານປະເທດ Truong Tan Sang ຊົມເຊີຍແຜນນະໂຍບາຍຂອງສະຫະພັນລັດເຊຍ ແມ່ນເພີ່ມທະວີການພົວພັນຄູ່ຮ່ວມມືຍຸດທະສາດກັບຫວຽດນາມ ທີ່ໄດ້ສະແດງໃຫ້ເຫັນຜ່ານລັດຖະດຳລັດຂອງທ່ານປະທານາທິບໍດີ Putin “ກ່ຽວກັບເລື່ອງຜັນຂະຫຍາຍບັນດາການເຄື່ອນໄຫວພົວພັນຕ່າງປະເທດຂອງສະຫະພັນ ລັດເຊຍ” ໃນໄລຍະຈະມາເຖິງ.
ແລະກໍໃນຕອນເຊົ້າວັນທີ 30/7, ທ່ານປະທານປະເທດ Truong Tan Sang ໄດ້ເຂົ້າຮ່ວມເວທີປາໄສວິສາຫະກິດ ຫວຽດນາມ - ລັດເຊຍ. ທີ່ເວທີປາໄສວິສາຫະກິດ, ທ່ານປະທານປະເທດ ໄດ້ແຈ້ງບາງຂໍ້ມູນຂ່າວສານກ່ຽວກັບໝາກຜົນແຫ່ງການເຈລະຈາ ກັບທ່ານປະທານາທິບໍດີ Putin, ພົບປະ ກັບທ່ານນາຍົກລັດຖະມົນຕີ Medvedev ແລະ ບັນດາການນຳອື່ນຂອງສະຫະພັນ ລັດເຊຍລ້ວນແຕ່ບັນລຸຜົນສຳເລັດຢ່າງດີງາມ ແລະ ເປັນເອກະພາບກັນບັນດາການກຳນົດທິດໃຫຍ່ເພື່ອພັດທະນາການພົວພັນຄູ່ຮ່ວມມືຍຸດທະສາດຢ່າງຮອບດ້ານລະຫວ່າງຫວຽດນາມ - ລັດເຊຍ ໃນທົດສະວັດໃໝ່. ທ່ານປະທານປະເທດ Truong Tan Sang ເນັ້ນໜັກວ່າ:
“ຍາມໃດລັດຖະບານຫວຽດນາມ ກໍຖືເປັນສຳຄັນ, ສົ່ງເສີມ ແລະ ສ້າງທຸກເງື່ອນໄຂອຳນວຍຄວາມສະດວກໃຫ້ແກ່ວິສາຫະກິດສະຫະພັນ ລັດເຊຍ ຮ່ວມມືກັບຫວຽດນາມ ໃນທຸກໆຂົງເຂດທຸລະກິດ, ພິເສດແມ່ນໃນຂົງເຂດທີ່ເປັນມູນເຊື້ອຄື: ນ້ຳມັນອາຍແກດ, ການຄ້າ, ຂຸດຄົ້ນແຮ່ທາດ... ຫວຽດນາມ ຈະສ້າງເງື່ອນໄຂໃຫ້ບັນດາກຸ່ມບໍລິສັດ, ວິສາຫະກິດລັດເຊຍ ເລືອກເຟັ້ນຫວຽດນາມ ແມ່ນຈຸດນັດພົບຍຸດທະສາດ ໃນການເປີດກ້ວາງ ແລະ ຮ່ວມມືເສດຖະກິດ ກັບຫວຽດນາມ ກໍຄືພາກພື້ນ ອາຊຽນ.”
ວົງເງິນການຄ້າ 2 ສົ້ນຫວຽດນາມ - ລັດເຊຍ ໄດ້ເພີ່ມຂຶ້ນພໍສົມຄວນໃນຊຸມປີຜ່ານມາ, ແລະ ຄາດວ່າຈະບັນລຸ 3 ຕື້ USD ໃນປີ 2012.
ທ່ານປະທານປະເທດ Truong Tan Sang ເຂົ້າຮ່ວມພິທີເປີດຕົວຜະລິດຕະພັນນ້ຳມັນຊຸດທຳອິດ ຢູ່ບໍ່ນຳ້ມັນ Khosedaus ຕາເວັນຕົກ
(ພາບ: ສຳນັກຂ່າວສານຫວຽດນາມ)
ກ່ອນໜ້ານັ້ນ, ຕອນບ່າຍ ແລະ ຕອນຄຳ່ວັນທີ 29/7 (ຕາມເວລາຫວຽດນາມ), ທ່ານປະທານປະເທດຫວຽດນາມ Truong Tan Sang ແລະ ຄະນະຜູ້ແທນຂັ້ນສູງຫວຽດນາມ ໄດ້ເດີນທາງອອກຈາກນະຄອນຫຼວງ ມົດສະກູ ໄປຍັງນະຄອນ Narian Mar, ເມືອງເອກເຂດປົກຄອງດ້ວຍຕົນເອງ Nhenhetxky, ສະຫະພັນ ລັດເຊຍ, ເຊິ່ງແມ່ນທ້ອງຖິ່ນມີການພົວພັນຮ່ວມມືພັດທະນາກັບແຂວງ ບ່າເຣ້ຍ - ຫວູງເຕົ່າ ຂອງຫວຽດນາມ. ທ່ານປະທານປະເທດ Truong Tan Sang ໄດ້ເຂົ້າຮ່ວມພິທີເປີດຕົວຜະລິດຕະພັນນ້ຳມັນຊຸດທຳອິດ ຢູ່ບໍ່ນຳ້ມັນ Khosedaus ຕາເວັນຕົກ ຂອງບໍລິສັດຮ່ວມທຸລະກິດຫວຽດນາມ - ລັດເຊຍ Rusvietpetro, ຢ້ຽມຢາມຖາມຂ່າວ, ລະດົມກຳລັງໃຈ ແລະ ເຂົ້າຮ່ວມພິທີມອບຫຼຽນໄຊແຮງງານຊັ້ນ 3 ໃຫ້ແກ່ໝູ່ຄະນະບໍລິສັດຮ່ວມທຸລະກິດຫວຽດນາມ - ລັດເຊຍ ແລະ ຜູ້ອຳນວຍການໃຫຍ່ Rusvietpetro. ທ່ານປະທານປະເທດ ໄດ້ຍ້ອງຍໍຊົມເຊີຍຄວາມມານະພະຍາຍາມຜ່ານຜ່າຄວາມຫຍຸ້ງຍາກຂອງໝູ່ຄະນະນັກເຕັກນິກ, ກຳມະກອນ ແລະ ຢືນຢັນໝາກຜົນນີ້ໄດ້ປະກອບສ່ວນຢ່າງຕັ້ງໜ້າເຂົ້າໃນສາຍພົວພັນຮ່ວມມືຢ່າງຮອບດ້ານຫວຽດນາມ - ລັດເຊຍ. ທ່ານປະທານປະເທດ Truong Tan Sang ເນັ້ນໜັກວ່າ:
“ຂ້າພະເຈົ້າຖືວ່າ, ບໍລິສັດຮ່ວມທຸລະກິດ Rusvietpetro ແມ່ນໂຄງການບັນລຸຜົນສຳເລັດດີທີ່ສຸດຂອງການຮ່ວມມືຫວຽດນາມ - ລັດເຊຍ. ນີ້ແມ່ນການສະແດງໃຫ້ເຫັນສິ່ງທີ່ມີຊີວິດຊີວາສຳລັບສາຍພົວພັນຮ່ວມມືຍຸດທະສາດລະຫວ່າງ 2 ປະເທດ, ເປັນຂີດໝາຍແຫ່ງບາດກ້າວກະໂດດຂັ້ນໃນການພົວພັນຮ່ວມມືດ້ານນ້ຳມັນ ອາຍແກດລະຫວ່າງ 2 ປະເທດຫວຽດນາມ - ລັດເຊຍ. ຂໍອວຍພອນໃຫ້ການພົວພັນຮ່ວມມືຫວຽດນາມ - ລັດເຊຍ ໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ.”
ກ່າວຄຳເຫັນໃນການພົບປະກັບຜູ້ວ່າການເຂດປົກຄອງຕົນເອງ Nhenhetxky ທ່ານ Fedorov ໃນຕອນຄຳ່ວັນທີ 29/7, ທ່ານປະທານປະເທດ Truong Tan Sang ໄດ້ສະແດງຄວາມເຊື່ອໝັ້ນວ່າ: ດ້ວຍມູນເຊື້ອການຮ່ວມມືອັນດີງາມລະຫວ່າງ 2 ປະເທດ, ບໍລິສັດຮ່ວມທຸລະກິດ Rusvietpetro ຈະສືບຕໍ່ສ້າງຜົນງານໃຫຍ່ຫຼວງຫຼາຍຢ່າງບົນເສັ້ນທາງພັດທະນາ, ປະກອບສ່ວນເຮັດໃຫ້ໂສມໜ້າຂອງ Nhenhetxky ມີການປ່ຽນແປງ ແລະ ກາຍເປັນໜຶ່ງໃນບັນດາບໍລິສັດຮ່ວມທຸລະກິດທີ່ບັນລຸຜົນສຳເລັດທີ່ສຸດຂອງ 2 ປະເທດ, ປະກອບສ່ວນເພີ່ມທະວີການພົວພັນຮ່ວມມືທີ່ເປັນມູນເຊື້ອ ແລະ ຄູ່ຮ່ວມມືຮອບດ້ານຫວຽດນາມ - ສະຫະພັນ ລັດເຊຍ.
ທ່ານປະທານປະເທດ Truong Tan Sang ແລະ ທ່ານປະທານາທິບໍດີ Vladimir Putin
ເນື່ອງໃນໂອກາດນີ້, ບັນດາສຳນັກຂ່າວສານ, ອົງການສື່ມວນຊົນໃຫຍ່ຂອງລັດເຊຍ ຄື Itar – Tass, Ria – Novosti ພ້ອມກັບບັນດາຊ່ອງໂທລະພາບຂອງລັດເຊຍ ໄດ້ສືບຕໍ່ສ່ອງແສງການຢ້ຽມຢາມລັດເຊຍ ຂອງທ່ານປະທານປະເທດຫວຽດນາມ Truong Tan Sang ຢ່າງຈະແຈ້ງ. ສຳນັກຂ່າວສານ Itar – Tass ແລະ Ria – Novosti ໄດ້ສ່ອງແສງບັນດາການເຄື່ອນໄຫວຂອງທ່ານປະທານປະເທດ Truong Tan Sang ໃນຊຸມວັນຜ່ານມາ. ໜັງສືພິມ “ສະມາຊິກຄະນະຊາວໜຸ່ມ Comxonon” ໄດ້ລົງພິມຮູບທ່ານປະທານາທິບໍດີ Vladimir Putin ກັບທ່ານປະທານປະເທດ Truong Tan Sang ພວມຍ່າງໂອ້ລົມໃນສວນທີ່ບໍລິເວນສຳນັກງານປະທານາທິບໍດີ. ໃນຂະນະນັ້ນ, ຊ່ອງໂທລະພາບປະເທດລັດເຊຍ 24 ໄດ້ໃຫ້ຂໍ້ສັງເກດວ່າ: ນີ້ ແມ່ນຮູບພາບທີ່ຫາຍາກ ແລະ ທ່ານ Putin ພຽງແຕ່ຍ່າງຫຼີ້ນກ່ອນດຳເນີນການເຈລະຈາກັບບັນດາປະມຸກລັດຂອງບັນດາປະເທດ ເຊິ່ງທ່ານໄດ້ຖືວ່າເປັນໄມຕີຈິດມິດຕະພາບ ແລະ ສະໜິດສະໜົມ. “ໜັງສືພິມລັດເຊຍ” ໄດ້ລົງພິມຮູບການນຳລັດເຊຍ ແລະ ຫວຽດນາມ ທີ່ການປະຊຸມຂ່າວຢູ່ Sochi ດ້ວຍຄຳວິຈານວ່າ “ການພົວພັນລັດເຊຍ - ຫວຽດນາມ ໄດ້ຖືກຍົກຂຶ້ນສູ່ລະດັບຄູ່ຮ່ວມມືຍຸດທະສາດຮອບດ້ານ”. ໜັງສືພິມ ລັດເຊຍ ຕີລາຄາສູງຖະແຫຼງການຂອງທ່ານປະທານປະເທດ Truong Tan Sang ທີ່ວ່າ: ຫວຽດນາມ ພ້ອມແລ້ວທີ່ຈະປຶກສາຫາລື ກ່ຽວກັບແງ່ຫວັງເຂົ້າຮ່ວມພັນທະພາບພາສີອາກອນ ເຊິ່ງລວມມີ 3 ປະເທດ ລັດເຊຍ, Belarus ແລະ Kazakhstan.
Hoang Dung