( vovworld ) - ໂດຍສືບຕໍ່ການຢ້ຽມຢາມສັນຖະວະໄມຕີ ສປປລາວ, ຕອນບ່າຍວັນທີ 3/7, ທ່ານປະທານສະພາແຫ່ງຊາດ Nguyen Sinh Hung ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ມີການເຈລະຈາກັບທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້, ເຂົ້າຢ້ຽມຂໍ່ານັບທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ແລະ ພົບປະເຈລະຈາກັບທ່ານນາຍົກລັດຖະມົນຕີລາວ ທອງສິງ ທຳມະວົງ. ເຂົ້າຢ້ຽມຂໍ່ານັບທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ໄດ້ເນັ້ນໜັກວ່າ; ການພົວພັນດ້ານການເມືອງ ແລະ ເສດຖະກິດລະຫວ່າງສອງປະເທດພວມໄດ້ຮັບການປັບປຸງ, ພັດທະນາເຂົ້າສູ່ລວງເລິກ, ມີປະສິດທິຜົນ ແລະ ເລື່ອງສະເຫຼີມສະຫຼອງປີແຫ່ງຄວາມສາມັກຄີມິດຕະພາບຫວຽດນາມ - ລາວ 2012 ເພື່ອແນໃສ່ສຶກສາໃຫ້ລຸ້ນໜຸ່ມສອງປະເທດກ່ຽວກັບມູນເຊື້ອຂອງສາຍພົວພັນແບບພິເສດ ແລະ ເຮັດໃຫ້ປີ 2012 ກາຍເປັນຂີດໝາຍແຫ່ງສາຍພົວພັນບໍລິສຸດຜຸດຜ່ອງຂອງສອງປະເທດຫວຽດນາມ - ລາວ. ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ແລະ ທ່ານປະທານສະພາແຫ່ງຊາດ Nguyen Sinh Hung ໄດ້ເຫັນດີເປັນເອກະສັນໂດຍຖືວ່າ ໃນສະພາບການທີ່ສາກົນ ແລະ ພາກພື້ນ ພວມມີການຜັນແປ່ຄືປະຈຸບັນ, ເລື່ອງເພີ່ມທະວີ ແລະ ປັບປຸງສາຍພົວພັນສາມັກຄີແບບພິເສດ ແລະ ການຮ່ວມມືຢ່າງຮອບດ້ານລະຫວ່າງຫວຽດນາມ - ລາວ ຍິ່ງມີຄວາມໝາຍສຳຄັນກວ່າອີກ, ແມ່ນປັດໃຈຮັບປະກັນພາລະກິດສ້າງສາ ແລະ ປົກປັກຮັກສາປະເທດຊາດຢູ່ແຕ່ລະປະເທດຢ່າງມີໄຊ.
ກອນໜ້ານັ້ນ, ທີ່ສຳນັກງານລັດຖະບານລາວ, ທ່ານປະທານສະພາແຫ່ງຊາດ Nguyen Sinh Hung ໄດ້ມີການພົບເຈລະຈາກັບທ່ານນາຍົກລັດຖະມົນຕີລາວ ທອງສິງ ທຳມະວົງ. ທ່ານປະທານສະພາແຫ່ງຊາດ Nguyen Sinh Hung ໄດ້ຕີລາຄາສູງບັນດາການປະກອບສ່ວນຂອງທ່ານນາຍົກລັດຖະມົນຕີລາວ ໃນການພັດທະນາສາຍພົວພັນຂອງສອງປະເທດ, ໂດຍສະເພາະແມ່ນໃນການຊຸກຍູ້ເປີດກວ້າງການພົວພັນຂອງສອງປະເທດໃນບັນດາຂົງເຂດການເມືອງ, ເສດຖະກິດ, ການຄ້າ ແລະ ການລົງທຶນ, ພ້ອມທັງຢືນຢັນວ່າ ຫວຽດນາມ ຈະສືບຕໍ່ສະໜັບສະໜູນລາວ ເຂົ້າຮວ່ມອົງການການຄ້າໂລກໂດຍໄວ ແລະ ໜູນຊ່ວຍລາວ ຈັດຕັ້ງກອງປະຊຸມສຸດຍອດອາຊີ - ເອີລົບ ຄັ້ງທີ 9 ໃນທ້າຍປີ 2012 ຢ່າງຕັ້ງໜ້າ.
ແລະກໍໃນວັນທີ 3/7, ທ່ານປະທານສະພາແຫ່ງຊາດ Nguyen Sinh Hung ໄດ້ໄປຢ້ຽມຢາມ ແລະ ໂອ້ລົມກັບພະນັກງານສະຖານທູດຫວຽດນາມ ແລະ ບັນດາອົງການຕາງໜ້າຂອງຫວຽດນາມ ປະຈຳລາວ.
ຕອນຄໍ່າວັນດຽວກັນ, ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ໄດ້ຈັດງານລ້ຽງຕ້ອນຮັບທ່ານປະທານສະພາແຫ່ງຊາດ Nguyen Sinh Hung ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ທີ່ພວມຢູ່ຢ້ຽມຢາມສັນຖະວະໄມຕີ ສປປ ລາວ.