ທ່ານປະທານປະເທດຫວຽດນາມ Truong Tan Sang
ໄດ້ເດີນທາງໄປຮອດນະຄອນ Vladivostok, ສະຫະພັນລັດເຊຍ
(ພາບ: TTXVN)
(vovworld) - ວັນທີ 6/9, ທ່ານປະທານປະເທດຫວຽດນາມ Truong Tan Sang ພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ເດີນທາງໄປຮອດນະຄອນ Vladivostok, ສະຫະພັນລັດເຊຍ, ຕາມຄຳເຊີນຂອງທ່ານປະທານນາທິບໍດີສະຫະພັນລັດເຊຍ V.Putin, ເລີມຕົ້ນການເຂົ້າຮ່ວມກອງປະຊຸມສຸດຍອດເວທີປາໄສຮ່ວມມືເສດຖະກິດອາຊີ - ປາຊີຝິກ ຄັ້ງທີ 20 (APEC 20) ແລະ ເຂົ້າຮ່ວມບັນດາການເຄື່ອນໄຫວຢູ່ເຂດຕາເວັນອອກໄກຂອງສະຫະພັນລັດເຊຍ. ໃນສະພາບການທີ່ຕັ້ງບົດບາດຂອງຫວຽດນາມ ຢູ່ບັນດາເວທີປາໄສສາກົນ ແລະ ພາກພື້ນ, ໃນນັ້ນມີ APEC, ພວມໄດ້ຮັບການຍົກສູງຂຶ້ນຢ່າງ ບໍ່ຢຸດຢັ້ງ, ການເຂົ້າຮວ່ມກອງປະຊຸມສຸດຍອດ APEC 20 ຂອງທ່ານປະທານປະເທດພ້ອມກັບຄະນະຜູ້ແທນຂັ້ນສູງຫວຽດນາມ ແມ່ນເພື່ອແນໃສ່ຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ ກ່ຽວກັບເລື່ອງເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ຮອບດ້ານ, ສືບຕໍ່ຮັກສາບົດບາດສຳຄັນໃນຂອບເຂດການຮ່ວມມືຢູ່ພາກພື້ນອາຊີ - ປາຊີຝິກ, ໃນນັ້ນມີ APEC. ຜ່ານນັ້ນ ປະກອບສ່ວນຢ່າງຕັ້ງໜ້າເຂົ້າໃນການຮ່ວມມືກັບ APEC ແລະ ບັນດາເນື້ອໃນໃຫຍ່ຂອງກອງປະຊຸມ, ຫວຽດນາມ ຈະຊຸກຍູ້ການພົວພັນດ້ານການເມືອງ, ການຄ້າ, ການລົງທຶນກັບບັນດາຄູ່ຮ່ວມມື, ເຮັດໃຫ້ການພົວພັນລະຫວ່າງຫວຽດນາມ ແລະ ບັນດາປະເທດສະມາຊິກຂອງ APEC ເລິກເຊິ່ງກວ່າອີກ.
ພາຍຫຼັງເດີນທາງໄປຮອດ Vladivostok, ທ່ານປະທານປະເທດ Truong Tan Sang ໄດ້ມີການພົບປະກັບພະນັກງານ, ພາລະກອນສະຖານກົງສູງໃຫຍ່ ແລະ ຜູ້ຕາງໜ້າວົງຄະນະຍາດຊາວຫວຽດນາມ ທີ່ພວມດຳລົງຊີວິດ ແລະ ຮໍ່າຮຽນຢູ່ທີ່ນີ້.
ວັນທີ 7/9 ແມ່ນມື້ທຳອິດເຂົ້າຮ່ວມບັນດາການເຄື່ອນໄຫວຂອງສັບປະດາຂັ້ນສູງ APEC ຄັ້ງທີ 20, ທ່ານປະທານປະເທດ ຫວຽດນາມ Truong Tan Sang ໄດ້ເຂົ້າຮ່ວມກອງປະຊຸມສຸດຍອດວິສາຫະກິດ APEC ປີ 2012. ຢູ່ ນອກກອງປະຊຸມ, ທ່ານປະທານປະເທດ Truong Tan Sang ໄດ້ຕ້ອນຮັບການນຳບັນດາກຸ່ມບໍລິສັດຂອງອາເມລິກາ ແລະ ເຂົ້າຮ່ວມການພົບປະສົນທະນາລະຫວ່າງນັກທຸລະກິດ ຫວຽດນາມ - ລັດເຊຍ ກ່ຽວກັບການພັດທະນາການພົວພັນດ້ານການຄ້າ ການລົງທຶນ ຢູ່ເຂດທະເລຕາເວັນອອກໄກ ຂອງສະຫະພັນລັດເຊຍ. ໃນບົດປາໄສກ່າວທີ່ວາລະປະຊຸມປຶກສາຫາລືກ່ຽວກັບນ້ຳ - ແຫລ່ງຊັບພະຍາກອນຍຸດທະສາດທົ່ວໂລກໃຫມ່, ທ່ານປະທານປະເທດ Truong Tan Sang ໄດ້ເນັ້ນຫນັກວ່າ : ແຫລ່ງນ້ຳນັບມື້ນັບກາຍເປັນຊັບພະຍາກອນຍຸດທະສາດທີ່ເຫືອດແຫ້ງໃນທ່ົວໂລກ, ບໍ່ພຽງແຕ່ສົ່ງຜົນກະທົບເຖິງການພັດທະນາເສດຖະກິດເທົ່ານັ້ນ ຫາກຍັງສົ່ງຜົນສະທ້ອນເຖິງສະພາບຄວາມໝັ້ນຄົງຂອງຫລາຍປະເທດ, ທະວີບຢູ່ໃນໂລກອີກດ້ວຍ.
“ພາກພື້ນອາຊີ-ປາຊີຟິກແມ່ນພາກພື້ນຕ້ອງຮັບມືກັບບັນດາການທ້າທາຍກ່ຽວກັບແຫຼ່ງນ້ຳໃນອະນາຄົດອັນໃກ້ໆນີ້. ເຖິງວ່າກວມເອົາເຖິງ 60% ປະຊາກອນໂລກ, ມີລະດັບການເຕີບໂຕເສດຖະກິດ ແລະ ຫັນເປັນຕົວເມືອງສູງກ່ວາໝູ່ໃນໂລກກໍ່ຕາມ ແຕ່ພາກພື້ນຂອງພວກເຮົາມີຊັບພະຍາກອນນ້ຳທົ່ວໂລກພຽງ 35% ເທົ່ານັ້ນ. ການຂາດແຄນນ້ຳແມ່ນໄພນາບຂູ່ໃຫ່ຍທີ່ສຸດຂອງພາກພື້ນ ໃນຂະນະທີ່ປະຈຸບັນ, ພາກພື້ນຂອງພວກເຮົາຕ້ອງຮັບປະມານ 70% ໄພທຳມະຊາດໃນໂລກ, ໂດຍສະເພາແມ່ນໄພນ້ຳຖ້ວມ, ແຫ້ງແລ້ງ, ແຜ່ນດິນໄຫວ, ນ້ຳທະເລຂຶ້ນສູງ…..“
ໃນໂອກາດເຂົ້າຮ່ວມກອງປະຊຸມຂັ້ນສູງ APEC ຄັ້ງທີ 20, ທ່ານປະທານປະເທດ Truong Tan Sang ໄດ້ມີການພົບປະກັບທ່ານເລຂາທິການໃຫ່ຍ, ປະທານປະເທດ ສາທາລະນະລັດ ປະຊາຊົນຈີນ ຫູຈິນເທົ່າ. ນະທີ່ນີ້, ການນຳສອງປະເທດໄດ້ເຫັນດີເປັນເອກະສັນນຳກັນ ໂດຍຖືວ່າ, ການພົວພັນມິດຕະພາບອັນເປັນມູນເຊື້ອຫວຽດນາມ-ຈີນ ຊື່ງໄດ້ຮັບການເພິ່ງພູນຄູນສ້າງຈາກການນຳລຸ້ນຕ່າງໆ ແລະ ປະຊາຊົນສອງປະເທດ ແມ່ນຊັບສົມບັດອັນມີຄ່າຂອງປະຊາຊົນສອງປະເທດ ແລະ ທັງສອງຝ່າຍລ້ວນແຕ່ມີຄວາມຮັບຜິດຊອບສຶບທອດ ແລະ ເສີມຂະຫຍາຍ.