(vovworld) – ຕອນບ່າຍວັນທີ 22/04, ທ່ານປະທານປະເທດຫວຽດນາມ ເຈືອງເຕີນຊາງ ສືບຕໍ່ເຂົ້າຮ່ວມກອງປະຊຸມຄົບຄະນະຄັ້ງທີ 2 ແລະ ທີ 3 ຂອງກອງປະຊຸມຂັ້ນສູງອາຊີ - ອາຟະລິກາ, ພົບປະເຈລະຈາກັບປະທານາທິບໍດີ Hadagascar, ຕ້ອນຮັບຮອງປະທານາທິບໍດີອາຟະລິກາໃຕ້, ລັດຖະມົນຕີວ່າການກະຊວງການຕ່າງປະເທດຊູແອັດ, ແລະ ລັດຖະມົນຕີວ່າການກະຊວງການຕ່າງປະເທດອິນເດຍ.
ທີ່ການພົບປະກັບທ່ານປະທານາທິບໍດີ Hadagascar, Hery Rajaonarimampianina, ທ່ານປະທານປະເທດ ເຈືອງເຕີນຊາງ ໄດ້ຕີລາຄາສູງການພົວພັນມິດຕະພາບລະຫວ່າງຫວຽດນາມ - Hadagascar ແລະ ປາດຖະໜາວ່າ 2 ປະເທດຈະສືບຕໍ່ເສີມຂະຫຍາຍນ້ຳໃຈມິດຕະພາບອັນດີງາມທາງດ້ານການເມືອງ, ການຮ່ວມມືໃນຫຼາຍຂົງເຂດ, ໂດຍສະເພາະແມ່ນບັນດາຂົງເຂດຄື: ການຄ້າ, ກະສິກຳ ແລະ ໂທລະຄົມ. ທ່ານປະທານປະເທດສະເໜີໃຫ້ 2 ຝ່າຍສືບຕໍ່ແລກປ່ຽນ, ຈັດຕັ້ງການພົບປະຂັ້ນສູງ, ສະໜັບສະໜູນເຊິ່ງກັນ ແລະ ກັນ, ສົມທົບກັບທີ່ບັນດາອົງການຈັດຕັ້ງ ແລະ ທີ່ເວທີປາໄສສາກົນຢ່າງແໜ້ນແຟ້ນ. ສ່ວນທ່ານປະທານາທິບໍດີ Hadagascar ໄດ້ສະເໜີບາງທິດທາງຮ່ວມມືທີ່ມີແງ່ຫວັງລະຫວ່າງ 2 ປະເທດຄື: ກະສິກຳ, ຂຸດຄົ້ນບໍ່ແຮ່, ໂທລະຄົມ. ເນື່ອງໃນໂອກາດນີ້, ທ່ານປະທານປະເທດ ເຈືອງເຕີນຊາງ ໄດ້ເຊື້ອເຊີນທ່ານປະທານາທິບໍດີ Hadagascar ມາຢ້ຽມຢາມຫວຽດນາມ ໃນໄລຍະຈະມາເຖິງ, ທ່ານປະທານາທິບໍດີ Hadagascar ໄດ້ຂອບອົກຂອບໃຈຕໍການເຊື້ອເຊີນ ແລະ ໃຫ້ຮູ້ວ່າ, ຈະມາຢ້ຽມຢາມຫວຽດນາມ ໃຂຈຸດເວລາທີ່ເໝາະສົມ.
ທີ່ການຕ້ອນຮັບທ່ານຮອງປະທານາທິບໍດີອາຟະລິກາໃຕ້ Cyril Ramaphosa, 2 ຝ່າຍໄດ້ເຫັນດີສົມທົບກັນຈັດຕັ້ງກອງປະຊຸມຄັ້ງທີ 3 ເວທີປາໄສຄູ່ຮ່ວມມືລະຫວ່າງລັດຖະບານ ເຊິ່ງໄດ້ຈັດຂຶ້ນຢູ່ຮ່າໂນ້ຍ ໃນເດືອນ 06/2015 ຢ່າງມີປະສິດທິຜົນ, ພ້ອມທັງເຕື້ອງເຖິງບາງມາດຕະການແກ້ໄຂລະອຽດ ເພື່ອແນໃສ່ເພີ່ມທະວີການພົວພັນໃນບັນດາຂົງເຂດຄື: ການຄ້າ, ກະສິກຳ, ຕໍ່ກໍ່າປັ່ນ…
ທີ່ການພົບປະກັບທ່ານລັດຖະມົນຕີວ່າການກະຊວງການຕ່າງປະເທດຊູແອດ Margot Wallstroem, ທ່ານປະທານປະເທດ ເຈືອງເຕີນຊາງ ສະເໜີໃຫ້ 2 ປະເທດສືບຕໍ່ຊຸກຍູ້ການແລກປ່ຽນຄະນະຜູ້ແທນທຸກຂັ້ນ, ສ້າງເງື່ອນໄຂສະດວກໃຫ້ວິສາຫະກິດ 2 ປະເທດສຳພັດກັບຕະຫຼາດລົງທຶນ, ດຳເນີນທຸລະກິດ, ພິເສດແມ່ນໃນສະພາບສັນຍາການຄ້າເສລີ EVFTA ຈະໄດ້ຮັບການລົງນາມໃນໄລຍະຈະມາເຖິງ.
ທີ່ການພົບປະກັບທ່ານລັດຖະມົນຕີວ່າການກະຊວງການຕ່າງປະເທດອິນເດຍ Sushma Swaraj, ທ່ານປະທານປະເທດ ເຈືອງເຕີນຊາງ ຢືນຢັນວ່າ, ຫວຽດນາມ ຖືເປັນສຳຄັນ, ຮັກສາ ແລະ ພັດທະນາການພົວພັນມິດຕິພາບທີ່ເປັນມູນເຊື້ອ ແລະ ການຮ່ວມມືຄູ່ຮ່ວມມືຍຸດທະສາດລະຫວ່າງ 2 ປະເທດ. ກ່ຽວກັບດ້ານເສດຖະກິດ, ທ່ານປະທານປະເທດ ເນັ້ນໜັກວ່າ, ຕ້ອງສູ້ຊົນບັນລຸໄດ້ ແລະ ລື່ນກາຍຄາດໝາຍວົງເງິນການຄ້າ 2 ຝ່າຍ 15 ຕື້ USD ໃນປີ 2020. 2 ຝ່າຍກໍ່ຢືນຢັນຄືນໃໝ່ຄວາມສຳຄັນຂອງການຮັບປະກັນສັນຕິພາບ, ສະຖຽນລະພາບ, ຄວາມສະຫງົບປອດໄພໃນການເດີນທະເລ ແລະ ເລື່ອງແກ້ໄຂການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຢ່າງຄົບຖ້ວນ ແລະ ເຂັ້ມງວດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ກ້າວໄປເຖິງການສ້າງສຳເລັດປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ.
ທີ່ການພົບປະຄັ້ງຕ່າງໆ, ບົນພື້ນຖານການພົວພັນອັນດີງາມລະຫວ່າງຫວຽດນາມ ແລະ ປະເທດຕ່າງໆ, ທ່ານປະທານປະເທດ ເຈືອງເຕີນຊາງ ສະເໜີບັນດາປະເທດ ສະໜັບສະໜູນຫວຽດນາມ ຮັບສະໝັກເລືອກຕັ້ງເຂົ້າສະພາບໍລິຫານ UNESCO (2015 - 2019), ສະພາເສດຖະກິດສັງຄົມ/ສະຫະປະຊາຊາດ (2016 - 2018) ແລະ ຄະນະກຳມະການບໍ່ປະຈຳສະພາຄວາມໝັ້ນຄົງສະຫະປະຊາຊາດ (2020 - 2021).