ການເຈລະຈາລະຫວ່າງ 2 ຄະນະ
ຫວຽດນາມແລະອາເມລິກາຕັດສິນໃຈປະຕິບັດບັນດາຂໍ້ຕົກລົງບົນຈິດໃຈ“ການພົວພັນຄູ່ຮ່ວມມືຮອບດ້ານ.”
(vovworld) - ຕອນເຊົ້າວັນທີ 17/4 ຮ່າໂນ້ຍ, ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ໄດ້ເຈລະຈາກັບທ່ານປະທານປະຈຳສະພາສູງ ອາເມລິກາ, Patrik Leahy, ເນື່ອງໃນໂອກາດທ່ານມາຢ້ຽມຢາມຫວຽດນາມ ຢ່າງເປັນທາງການຕາມຄຳເຊື້ອເຊີນຂອງທ່ານປະທານສະພາແຫ່ງຊາດ ຫວຽດນາມ. ທີ່ການເຈລະຈາ, ທ່ານປະທານສະພາແຫ່ງຊາດ ຫງວຽນຊີງຮຸ່ງ ຢືນຢັນ: ຫວຽດນາມ ຖືເປັນສຳຄັນການພົວພັນກັບອາເມລິກາ ແລະ ຕັດສິນໃຈປະຕິບັດບັນດາຂໍ້ຕົກລົງເໝາະສົມກັບຈິດໃຈ“ການພົວພັນຄູ່ ຮ່ວມມືຮອບດ້ານ”. ສອງປະເທດ ຄວນມານະພະຍາຍາມກວ່າອີກເພື່ອແກ້ໄຂບັນດາບັນຫາທີ່ອະດິດຕະການປະ ໄວ້ ພ້ອມທັງ ມຸ່ງໄປເຖິງອະນາຄົດ, ສ້າງການພົວພັນໃຫມ່ ເພື່ອຜົນປະໂຫຍດຍາວນານລະຫວ່າງສອງຊາດ, ສອງປະເທດ. ທ່ານປະທານສະພາແຫ່ງຊາດ ຫງວຽນຊີງຮຸ່ງ ຕີລາຄາສູງບົດບາດຂອງບັນດາສະມາຊິກສະພາແຫ່ງຊາດອາເມລິກາ ໃນການຊຸກຍູ້ການພົວພັນ, ຄວາມເຂົ້າອົກເຂົ້າໃຈລະຫວ່າງສອງປະເທດ, ສອງຊາດ,ສອງສະພາແຫ່ງຊາດ, ຜ່ານນັ້ນ ປະກອບສ່ວນຊຸກຍູ້ການແລກປ່ຽນດ້ານການຄ້າສອງສົ້ນໃຫ້ຂຶ້ນເຖິງ 29 ຕື້ USD ໃນປີ 2013. ເພື່ອຊຸກຍູ້ການພົວພັນຮ່ວມມືລະຫວ່າງສອງປະເທດ, ສອງສະພາແຫ່ງຊາດກວ່າອີກ, ທ່ານປະທານສະພາແຫ່ງຊາດ ຫງວຽນຊີງຮຸ່ງ ສະເຫນີ ສະພາແຫ່ງຊາດສອງປະເທດ ເພີ່ມທະວີການແລກປ່ຽນເພືອ່ຊຸກຍູ້ເລື່ອງຮັບຮູ້ຫວຽດນາມ ມີພື້ນຖານເສດຖະກິດການຕະຫລາດ, ການເຈລະຈາສັນຍາຄູ່ຮ່ວມມືເຂດປາຊີຟີກ ໂດຍໄວເພື່ອສອດຄອ່ງກັບຜົນປະໂຫຍດຂອງສອງຝ່າຍ. ສະພາແຫ່ງຊາດອາເມລິກາ ສະຫງວນງົບປະມານທີ່ເໝາະສົມເພື່ອແກ້ໄຂບັນຫາມະນຸດສະທຳຄື: ຊອກຫາຜູ້ຖືກຫາຍສາບສູນ, ຫນູນຊ່ວຍຄົນພິການ, ເກັບກູ້ລູກລະເບີດບໍ່ທັນແຕກຫລັງສົງຄາມຢູ່ຫວຽດນາມ.
ທ່ານ ປະທານປະຈຳສະພາສູງ ອາເມລິກາ, Patrik Leahy ຢືນຢັນການສະຫນັບສະຫນູນບັນດາຄວາມມານະພະຍາຍາມຮ່ວມມືລະຫວ່າງ ລັດຖະບານ ອາເມລິກາ ແລະ ລັດຖະບານ ຫວຽດນາມ, ເປັນຕົ້ນແມ່ນການແກ້ໄຂຜົນຮ້າຍຢ້ອນຫລັງພາຍຫລັງສົງຄາມຢູ່ຫວຽດນາມ ແລະ ຫວັງວ່າ: ດ້ວຍການພົວພັນລະຫວ່າງສອງປະເທດປະຈຸບັນ, ລຸ້ນຫນຸ່ມສອງປະເທດຈະສືບຕໍ່ເສີມຂະຫຍາຍ ແລະ ເພີ່ມທະວີການພົບປະແລກປ່ຽນ, ປະກອບສ່ວນສ້າງການພົວພັນສອງປະເທດນັບມື້ນັບພັດທະນາ.
ຕອນ ເຊົ້າວັນດຽວກັນ, ໃນຂອບເຂດການຢ້ຽມຢາມຫວຽດນາມຢ່າງເປັນທາງການ, ທ່ານປະທານປະຈຳສະພາສູງ ອາເມລິກາ, Patrik Leahy ແລະ ພັນລະຍາ ນຳຫນ້າຄະນະສະມາຊິກສະພາແຫ່ງຊາດ ອາເມລິກາ ໄດ້ພົບປະແລກປ່ຽນກັບນັກສຶກສາພະແນກກົດໝາຍ ມະຫາວິທະຍາໄລຍແຫ່ງຊາດ ຮ່າໂນ້ຍ. ນະທີ່ນີ້, ບັນດານັກສຶກສາໄດ້ຮັບຟັງ ທ່ານ Patrik Leahy ແນະນຳໂດຍສັງເຂບກ່ຽວກັບລະບົບກົດໝາຍຂອງອາເມລິກາ, ກົງຈັກລັດ ແລະ ບັນດາຫລັກການພື້ນຖານຂອງລະບົບຕຸລາການສະຫະລັດອາເມລິກາ. ທ່ານ Patrik Leahy ເນັ້ນຫນັກເຖິງເນື້ອໃນບົດຖະແຫລງເອກະລາດກ່ຽວກັບສິດທິມະນຸດ ຊື່ງທ່ານປະທານໂຮ່ຈິມີນ ອ່ານເມື່ອປີ 1945 ພ້ອມທັງຢືນຢັນຄວາມໝາຍສຳຄັນຂອງການຮັກສາບັນດາຄຸນຄ່າຍຸຕິທຳ, ປະຊາທິປະໄຕ, ວັດທະນະທຳມະນຸດ ຊື່ງລະບົບກົດໝາຍຢູ່ໃນໂລກເວົ້າລວມພວມມຸ່ງໄປເຖິງ.
ທ່ານປະທານຜູ້ປະຈຳການສະພາສູງ ອາເມລິກາ Patrick Leahy ແລະ ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ
(ພາບ: vov.vn)
ກ່ອນໜ້ານັ້ນ, ຕອນບ່າຍວັນທີ 16/4, ທ່ານປະທານຜູ້ປະຈຳການສະພາສູງ ອາເມລິກາ Patrick Leahy ໄດ້ນຳໜ້າຄະນະສະມາຊິກສະພາແຫ່ງຊາດ ອາເມລິກາ ມາຮອດ ຮ່າໂນ້ຍ, ເລີ່ມຕົ້ນການຢ້ຽມຢາມ ຫວຽດນາມ ຢ່າງເປັນທາງການແຕ່ວັນທີ 16 – 20/4 ຕາມຄຳເຊື້ອເຊີນຂອງທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ.
ທ່ານ Patrick Leahy ແມ່ນສະມາຊິກຫຼັກແຫຼ່ງຂອງບັນດາກຳມາທິການສຳຄັນຄື (ກຳມາທິການ ກົດໝາຍ, ກຳມາທິການກ່ຽວກັບວຽກງານການທູດ ແລະ ການເຄື່ອນໄຫວພົວພັນຕ່າງປະເທດ, ກຳມາທິການກະສິກຳ) ຂອງສະພາສູງ ອາເມລິກາ.
ການຢ້ຽມຢາມ ຫວຽດນາມ ຂອງທ່ານປະທານຜູ້ປະຈຳການສະພາສູງ ອາເມລິກາ Patrick Leahy ໄດ້ຮັບຄວາມຫວັງວ່າຈະເປີດໄລຍະຮ່ວມມືໃໝ່ລະຫວ່າງ 2 ອົງການຕຸລາການ 2 ປະເທດ.