ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ
(Vovworld) - ວັນທີ 25/9/2014, ໃນຂອບເຂດການເຄື່ອນໄຫວ ນອກກອງປະຊຸມໃຫຍ່ ສປຊ ຢູ່ ນີວຢອກ (ອາເມລິກາ), ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ໄດ້ມີການພົບປະສອງຝ່າຍກັບລັດຖະມົນຕີການຕ່າງປະເທດບັນດາປະເທດ ເຕິກກີ, ບຸນກາຣີ, ມາເຊໂດນາ, ເວເນຢູເອລາ ແລະ ກຣານດາ.
ທີ່ການພົບປະ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ເນັ້ນໜັກວ່າ, ຫວຽດນາມປາຖະໜາຢາກຊຸກຍູ້ການພົວພັນສອງຝ່າຍກັບບັນດາປະເທດດັ່ງກ່າວໃນທຸກຂົງເຂດ; ສະເໜີເພີ່ມທະວີການແລກປ່ຽນຄະນະ, ດຳເນີນການເຈລະຈາ ແລະ ລົງນາມໃນບັນດາສັນຍາຮ່ວມມືເສດຖະກິດ, ການຄ້າ, ການລົງທຶນລະຫວ່າງຫວຽດນາມກັບປະເທດເຫຼົ່ານັ້ນໂດຍໄວ. ທ່ານຮອງນາຍົກລັດຖະມົນຕີ ກໍ່ຍົກອອກບັນດາຄວາມມານະພະຍາຍາມຂອງຫວຽດນາມ ໃນການເພີ່ມທະວີການປະກອບສ່ວນແກ້ໄຂບັນດາບັນຫາທົ່ວໂລກ. ສະເໜີປະເທດຕ່າງໆສະໜັບສະໜູນຫວຽດນາມສະໝັກເລືອກຕັ້ງເຂົ້າສະພາເສດຖະກິດ - ສັງຄົມ ສປຊ ອາຍຸການ 2016-2018, ສະພາຄວາມໝັ້ນຄົງອາຍຸການ 2020-2021 ແລະ ສະພາບໍລິຫານ UNESCO ອາຍຸການ 2015-2019.
ໃນວັນດຽວກັນ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ກໍ່ໄດ້ພົບປະ ແລະ ແລກປ່ຽນກັບນັກຮຽນຮູ້ບາງຄົນຂອງມະຫາວິທະຍາໄລ Harvard ອາເມລິກາ; ທ່ານຮອງນາຍົກລັດຖະມົນຕີໄດ້ຕີລາຄາສູງຄວາມສົນໃຈຂອງບັນດານັກຮຽນຮູ້ທີ່ມີຕໍ່ຫວຽດນາມ; ທ່ານກໍ່ສະເໜີໃຫ້ບັນດານັກຮຽນຮູ້ເພີ່ມທະວີການແລກປ່ຽນກັບບັນດາອົງການຄົ້ນຄ້ວາຂອງຫວຽດນາມ, ພິເສດແມ່ນໃນຂົງເຂດຄົ້ນຄ້ວາບັນດາບັນຫາເສດຖະກິດມະຫາພາກ, ບົດຮຽນໃນການສ້າງໂຄງປະກອບພື້ນຖານເສດຖະກິດ ແລະ ການພັດທະນາຢ່າງໝັ້ນຄົງ.