( ພິທີຊັກທຸງອາຊຽນ ຄູ່ກັບທຸງຊາດຫວຽດນາມ )
(vovworld) - ສະເຫຼີມສະຫຼອງ 45 ປີແຫ່ງວັນສ້າງຕັ້ງອາຊຽນ (8/8/1967 – 8/8/2012) ແລະ 17 ປີແຫ່ງວັນຫວຽດນາມ ເຂົ້າເປັນສະມາຊິກອາຊຽນ (28/7/1995 – 28/7/2012), ຕອນເຊົ້າວັນທີ 8/8, ກະຊວງການຕ່າງປະເທດຫວຽດນາມ ໄດ້ຈັດພິທີຊັກທຸງອາຊຽນ ຄູ່ກັບທຸງຊາດຫວຽດນາມ ຢູ່ສຳນັກງານກະຊວງການຕ່າງປະເທດຫວຽດນາມ ນະຄອນຫຼວງຮ່າໂນ້ຍ. ທ່ານລັດຖະມົນຕີກະຊວງການຕ່າງປະເທດ Pham Binh Minh ພ້ອມກັບເອກອັກຄະລັດຖະທູດບັນດາປະເທດອາຊຽນ ປະຈຳຮ່າໂນ້ຍ ໄດ້ເປັນສັກຂີພິຍານພິທີດັ່ງກ່າວ.
ພ້ອມກັບບັນດາປະເທດສະມາຊິກອາຊຽນອື່ນ, ຫວຽດນາມ ໄດ້ຈັດພິທີຊັກທຸງອາຊຽນ ບົນຈິດໃຈເຊີດຊູສັນຍາລັກອັນສູງສົ່ງນີ້. ການເຄື່ອນໄຫວນີ້ ດ້ານໜຶ່ງແມ່ນສະແດງໃຫ້ເຫັນຄວາມຕັດສິນໃຈຂອງຫວຽດນາມ ປະກອບສ່ວນເຂົ້າໃນຄວາມມານະພະຍາຍາມຂອງອາຊຽນ ແມ່ນສ້າງປະຊາຄົມໃນປີ 2015 ແລະ ສ້າງສະຕິປະຊາຄົມໃນໝູ່ປະຊາຊົນເທື່ອລະກ້າວ, ດ້ານອື່ນແມ່ນຊ່ວຍເພີ່ມທະວີການໂຄສະນະພາບພົດອາຊຽນ ແລະ ປະຊາຄົມອາຊຽນໃນປະຊາຄົມໂລກ, ປະກອບສ່ວນເຂົ້າໃນຜົນສຳເລັດລວມຂອງສະຫະສະມາຄົມ.
ພ້ອມກັບພິທີຊັກທຸງອາຊຽນ ນັ້ນ, ວັນທີ 8/8, ຫວຽດນາມ ໄດ້ຈັດງານໂຮມຊຸມນຸມສະເຫຼີມສະຫຼອງ 45 ປີແຫ່ງວັນສ້າງຕັ້ງອາຊຽນຢ່າງສົມກຽດ.
ກ່າວຄຳເຫັນທີ່ພິທີ, ທ່ານປະທານສະມາຄົມມິດຕະພາບຫວຽດນາມ - ອາຊຽນ Le Cong Phung ໄດ້ເນັ້ນໜັກວ່າ ໃນ 45 ປີທີ່ຜ່ານມາ ອາຊຽນ ໄດ້ມານະພະຍາຍາມຈົດສຸດຄວາມສາມາດຂອງຕົນ ເພື່ອຍູ້ແຮງການຮ່ວມມືດ້ານການເມືອງ - ຄວາມໝັ້ນຄົງ, ສ້າງບັນດາຫຼັກການປະພຶດຕໍ່, ຜ່ານນັ້ນເພີ່ມທະວີຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ. ອາຊຽນ ໄດ້ສ້າງຕັ້ງສາຍພົວພັນຮ່ວມມືຫຼາຍດ້ານກັບບັນດາຄູ່ຮ່ວມືສຳຄັນໃນໂລກ, ຮັກສາບົດບາດເປັນເຈົ້າພາບໃນການຮ່ວມມືໃນພາກພື້ນ ແລະ ລະຫວ່າງພາກພື້ນ. ທ່ານ Le Cong Phung ໄດ້ຢືນຢັນວ່າ ໂດຍແມ່ນສະມາຊິກທີ່ຕັ້ງໜ້າ, ມີຄວາມຮັບຜິດຊອບຂອງສະຫະສະມາຄົມ, ຫວຽດນາມ ໄດ້ມີບັນດາການປະກອບສ່ວນທີ່ສຳຄັນໃຫ້ແກ່ການເຕີບໂຕ ແລະ ເຕີບໃຫຍ່ຂອງສະຫະສະມາຄົມ.
ຕາງໜ້າບັນດາເອກອັກຄະລັດຖະທູດ ແລະ ຜູ້ຕາງໜ້າທູຕານຸທູດຂອງບັນດາປະເທດອາຊຽນ, ທ່ານເອກອັກຄະລັດຖະທູດ ບຣຸໄລ ປະຈຳຫວຽດນາມ Dato Mahadi Watli ໄດ້ຕີລາຄາສູງເລື່ອງຫວຽດນາມ ຈັດຕັ້ງພິທີ, ຖືວ່ານີ້ແມ່ນໂອກາດເພື່ອໃຫ້ບັນດາປະເທດອາຊຽນ ຢືນຢັນຄວາມສາມັກຄີ, ຮັດແໜ້ນສາຍພົວພັນມິດຕະພາບກວ່າອີກ ແລະ ພ້ອມກັນມຸ່ງໄປເຖິງຈຸດໝາຍສ້າງປະຊາຄົມອາຊຽນ.
“ອາຊຽນພວມຢູ່ໃນວິວັດການມຸ່ງໄປເຖິງຈຸດໝາຍສ້າງປະສາຄົມໃນປີ 2015. ເລື່ອງສ້າງສຳເລັດປະຊາຄົມຈະຊ່ວຍໃຫ້ປະຊາຊົນບັນດາປະເທດອາຊຽນ ໄດ້ດຳລົງຊີວິດຢູ່ໃນສະພາບສັນຕິພາບ ແລະ ຄວາມໝັ້ນຄົງ. ຂ້າພະເຈົ້າເຊື່ອໝັ້ນວ່າ ບັນດາປະເທດອາຊຽນ ຈະພ້ອມກັນມານະພະຍາຍາມເພື່ອປະຕິບັດສຳເລັດຈຸດໝາຍດັ່ງກ່າວ ແລະ ຄືດັ່ງຄຳເວົ້າຂອງທ່ານລັດຖະມົນຕີກະຊວງການຕ່າງປະເທດຫວຽດນາມ Pham Binh Minh ທີ່ວ່າ: ຫວຽດນາມ ພວມປະກອບສ່ວນຢ່າງຕັ້ງໜ້າໃຫ້ວິວັດການສ້າງປະຊາຄົມ”.
ທ່ານເລຂາທິການໃຫຍ່ອາຊຽນ ສຸຮິນ ພິດສຸວັນ
(ພາບປະກອບ )
ຕອນເຊົ້າວັນທີ 8/8, ພິທີສະເຫຼີມສະຫຼອງ 45 ປີ ແຫ່ງວັນສ້າງຕັ້ງອາຊຽນ ຖືກຈັດຕັ້ງຢ່າງສົມກຽດຢູ່ສຳນັກງານຄະນະເລຂາອາຊຽນທີ່ນະຄອນຫຼວງ Jakata, ແຫ່ງອິນໂດເນເຊຍ. ເຂົ້າຮ່ວມພິທີມີທ່ານເລຂາທິການໃຫຍ່ອາຊຽນ ສຸຮິນ ພິດສຸວັນ, ເອກອັກຄະລັດຖະທູດ - ຫົວໜ້າຄະນະຜູ້ຕ່າງໜ້າບັນດາປະເທດສະມາຊິກອາຊຽນ ແລະ ເອກອັກຄະລັດຖະທູດ ບັນດາປະເທດສະມາຊິກອາຊຽນ ປະຈຳ ອິນໂດເນເຊຍ, ເອກອັກຄະລັດຖະທູດ ບັນດາປະເທດຄູ່ຮ່ວມມືປະຈຳອາຊຽນ.
ກ່າວຄວາມເຫັນໄຂພິທີ, ທ່ານເລຂາທິການໃຫຍ່ອາຊຽນ ສຸຮິນ ພິດສຸວັນ ເນັ້ນໜັກວ່າ, ປະຈຸບັນ, ອາຊຽນໄດ້ຢັ້ງຢືນບົດບາດອັນຕັ້ງໜ້າ, ເປັນເຈົ້າການ ແລະ ໃຈກາງຂອງອາຊຽນໃນພາກພື້ນ ແລະ ໃນໂຄງປະກອບອາຊີຕາເວັນອອກທີ່ພວມໄດ້ຮັບການສ້າງຕັ້ງຂຶ້ນ, ກໍ່ຄືບົດບາດຂອງອາຊຽນໃນເວທີສາກົນ. ທ່ານເລຂາທິການໃຫຍ່ອາຊຽນ ສຸຮິນ ພິດສຸວັນ ໄດ້ເນັ້ນໜັກວ່າ, ການສະເຫຼີມສະຫຼອງ 45 ປີ ແຫ່ງວັນສ້າງຕັ້ງອາຊຽນບໍ່ພຽງແຕ່ແມ່ນໂອກາດເພື່ອໃຫ້ອາຊຽນຢັ້ງຢືນຜົນງານຂອງຕົນເທົ່ານັ້ນ, ຫາກຍັງເພີ່ມທະວີຄວາມສາມັກຄີ, ລັກສະນະເປັນເອກະພາບ, ປັບປຸງຄວາມຕັດສິນໃຈ ແລະ ຄວາມເຊື່ອໝັ້ນປະຕິບັດສຳເລັດຈຸດໝາຍລວມແມ່ນສ້າງປະຊາຄົມອາຊຽນໃນປີ 2015, ໂດຍຜ່ານການຍູ້ໄວການປະຕິບັດບັນດາຈຸດໝາຍໃຫຍ່ໃນ 3 ເສົາຄ້ຳ ການເມືອງ - ຄວາມໝັ້ນຄົງ, ເສດຖະກິດ ແລະ ວັດທະນະທຳສັງຄົມ, ພິເສດແມ່ນເພີ່ມທະວີການຮ່ວມສຳພັນເສດຖະກິດພາຍໃນກຸ່ມ, ເຊື່ອມຕໍ່ ແລະ ເຊື່ອມໂຍງອາຊຽນ, ຮັດແຄບຊ່ອງຫວ່າງ, ພັດທະນາຢ່າງໝັ້ນຄົງ ແລະ ສະໝຳ່ສະເໝີລະຫວ່າງບັນດາປະເທດສະມາຊິກ, ຜ່ານນັ້ນຍົກສູງທີ່ຕັ້ງ ແລະ ບົດບາດຂອງອາຊຽນ, ປະກອບສ່ວນປົກປັກຮັກສາສັນຕິພາບ, ຄວາມໝັ້ນຄົງ, ການຮ່ວມມື, ພັດທະນາ ແລະ ຄວາມວັດຖະນາຖາວອນໃນພາກພື້ນ ແລະ ຢູ່ໃນໂລກ.
ພິທີຊັກທຸງ ອາຊຽນ ຢູ່ ລາວ
(ພາບ: Hoang Chuong/ Vietnam+)
ພ້ອມກັບປະຊາຄົມບັນດາປະເທດສະມາຊິກ ອາຊຽນ, ວັນທີ 7/8, ກະຊວງການຕ່າງປະເທດ ລາວ ໄດ້ຈັດຕັ້ງງານໂຮມຊຸມນຸມສະເຫຼີມສະຫຼອງ 45 ປີແຫ່ງວັນສ້າງຕັ້ງ ອາຊຽນ. ເຂົ້າຮ່ວມພິທີສະເຫຼີມສະຫຼອງ ມີຜູ້ຕາງໜ້າຄະນະທູຕານຸທູດປະເທດຕ່າງໆ, ບັນດາອົງການສາກົນປະຈຳລາວ. ທີ່ພິທີໂຮມຊຸມນຸມ, ທ່ານຮອງນາຍົກລັດຖະມົນຕີ ລາວ, ທັງເປັນລັດຖະມົນຕີການຕ່າງປະເທດ ລາວ ທອງລຸນ ສີສຸລິດ ໄດ້ທົບທວນຄືນໄລຍະປະຫວັດສາດ 45 ປີຜ່ານມາຂອງອາຊຽນ. ໂດຍໄດ້ຮັບການສ້າງຕັ້ງຂຶ້ນໃນວັນທີ 8/8/1967, ອາຊຽນ ໄດ້ຍູ້ໄວລະດັບເຕີບໂຕທາງດ້ານເສດຖະກິດ ແລະ ພັດທະນາວັດທະນະທຳ - ສັງຄົມ ໃນພາກພື້ນ. ບັນດາປະເທດ ອາຊຽນ ໄດ້ຮັບຮອງເອົາບັນດາຄວາມມານະພະຍາຍາມລວມ ບົນຈິດໃຈສະເໝີພາບ ແລະ ພົວພັນຄູ່ຮ່ວມມື ໄດ້ກາຍເປັນພື້ນຖານໃຫ້ແກ່ປະຊາຄົມວັດທະນາຖາວອນ ແລະ ສັນຕິພາບຂອງ ອາຊີ ຕາເວັນອອກສ່ຽງໃຕ້.
ເນື່ອງໃນໂອກາດນີ້, ລາວ ກໍໄດ້ຈັດຕັ້ງການເຄື່ອນໄຫວຫຼາຍຢ່າງຄື: ເສັງຊອກຮູ້ປະຊາຄົມ ອາຊຽນ, ແຂ່ງຂັນກິລາ ແລະ ຈັດຕັ້ງພິທີຊັກທຸງ ອາຊຽນ.