(vovworld) – ຕອນເຊົ້າວັນທີ 13/01, ທ່ານນາຍົກລັດຖະມົນຕີ ຫງວຽນເຕີ໋ນຢູ້ງ ໄດ້ເຂົ້າຮ່ວມພິທີເປີດສະຫຼອງໂຮງໝໍ Chợ Rẫy (ເຈີ້ໄຣ) – Phnompenh (ພະນົມເປັນ) ກ່າວຄຳເຫັນທີ່ພິທີ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ:
“ໂຄງການໂຮງໝໍ ເຈີ້ໄຣ - ພະນົມເປັນ ແມ່ນກິດຈະກຳແຫ່ງທຳອິດກ່ຽວກັບການຮ່ວມມືລົງທຶນຂອງ 2 ປະເທດໃນຂົງເຂດສາທາລະນະສຸກ, ເຊິ່ງແມ່ນຂົງເຂດເຊິ່ງປະຊາຊົນ ກຳປູເຈຍ ພວມເອົາໃຈໃສ່. ນີ້ກໍ່ແມ່ນຜົນງານຂອງການຮ່ວມມືລະຫວ່າງນະຄອນ ໂຮ່ຈີມິນ ແລະ ນະຄອນຫຼວງ ພະນົມເປັນ ດ້ວຍຈຸດໝາຍລົງທຶນກໍ່ສ້າງໂຮງໝໍຫຼາຍຂະແໜງ ມີບໍລິການກວດ, ປິ່ນປົວພະຍາດຢ່າງຄົບຖ້ວນເພື່ອແນໃສ່ຕອບສະໜອງຄຳຮຽກຮ້ອງຕ້ອງການຂອງປະຊາຊົນ ກຳປູເຈຍ ເວົ້າລວມ ແລະ ຢູ່ນະຄອນຫຼວງ ພະນົມເປັນ ເວົ້າສະເພາະ ”
ທ່ານນາຍົກລັດຖະມົນຕີ ຫງວຽນເຕີນຢູ້ງ ເຊື່ອໝັ້ນວ່າ: ຖັດຈາກໂຄງການໂຮງໝໍ ເຈີ້ໄຣ - ພະນົມເປັນ, ບັນດາທ້ອງຖີ່ນ, ວິສາຫະກິດ, ບັນດາໂຮງໝໍຂະໜາດໃຫຍ່ ຂອງຫວຽດນາມ ຈະສືບຕໍ່ລົງທຶນກໍ່ສ້າງບັນດາກິດຈະກຳມີຄວາມໝາຍຫຼາຍກ່ວາອີກ, ປະກອບສ່ວນແກ້ໄຂຄວາມຕ້ອງການກວດ, ປິ່ນປົວພະຍາດຂອງປະຊາຊົນ ກຳປູເຈຍ ແລະ ປະກອບສ່ວນປັບປຸງສາຍພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດ. ທ່ານນາຍົກລັດຖະມົນຕີ ຫງວຽນເຕີນຢູ້ງ ຫວັງວ່າ: ຖັນແຖວແພດໝໍ ຈາກ ຫວຽດນາມ ໄປປະຕິບັດງານຢູ່ ໂຮງໝໍແຫ່ງນີ້ ຈະກາຍເປັນຂົວເຊື່ອມຕໍ່ນ້ຳໃຈມິດຕະພາບ ຫວຽດນາມ - ກຳປູເຈຍ, ນອກຈາກເລື່ອງປະຕິບັດວຽກງານດ້ານວິຊາການແລ້ວ, ບັນດາທ່ານໝໍ ຫວຽດນາມ ຈະແນະນຳ, ໜູນຊ່ວຍຍົກສູງສີໄມ້ລາຍມືໃຫ້ຖັນແຖວພະນັກງານການແພດຢູ່ ກຳປູເຈຍ.
ໂຄງການໂຮງໝໍ ເຈີ້ໄຣ - ພະນົມເປັນ ໄດ້ຮັບການເລີ່ມລົງມືກໍ່ສ້າງນັບແຕ່ເດືອນ 5/2010, ດ້ວຍຍອດຈຳນວນທຶນໄລຍະ 1 ແມ່ນ 40 ລ້ານ USD. ໂຮງໝໍ ມີ 200 ຕຽງ, ໄລຍະ 2 ໂຄງການຈະລົງທຶນເປີດກ້ວາງຕື່ມອີກ 300 ຕຽງ.
ເນື່ອງໃນໂອກາດນີ້, ທະນາຄານລົງທຶນ ແລະ ພັດທະນາ ຫວຽດນາມ ໄດ້ມອບລົດພະຍາບານໃຫ້ໂຮງໝໍ ເຈີ້ໄຣ - ພະນົມເປັນ ແລະ ຈຳນວນເງິນ 50.000 USD ໃຫ້ຄົນເຈັບທີ່ທຸກຍາກ.
ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາຍົກລັດຖະມົນຕີ ກຳປູເຈຍ Hunsen
(ພາບ: Đức Tám /TTXVN)
ວັນທີ 13/1, ຢູ່ນະຄອນຫຼວງ ພະນົມເປັນ, ແຫ່ງລາຊະອານາຈັກ ກຳປູເຈຍ, ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາຍົກລັດຖະມົນຕີ ກຳປູເຈຍ Hunsen ເປັນປະທານຮ່ວມກອງປະຊຸມຮ່ວມມືລົງທຶນ ຫວຽດນາມ - ກຳປູເຈຍ ຄັ້ງທີ 4.
ກ່າວຄຳເຫັນນະທີນີ້, ທ່ານນາຍົກລັດຖະມົນຕີ ຫງວຽນເຕີນຢູ້ງ ປາດຖະໜາວ່າ: ບັນດາວິສາຫະກິດ ຫວຽດນາມ - ກຳປູເຈຍ ຈະ ພ້ອມກັນສຸ້ຊົນພັດທະນາການລົງທຶນ, ດຳເນີນທຸລະກິດເພື່ອບັນລຸຈຸດໝາຍຍົກວົງເງິນການຄ້າ 2 ຝ່າຍຂຶ້ນເຖິງ 5 ຕື້ USD ໃນປີ 2015 ໂດຍໄວ. ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ:
“ລັດຖະບານຫວຽດນາມ ຕີລາຄາສູງ ນະໂຍບາຍຂອງ ກຳປູເຈຍ ຖືເປັນສຳຄັນການພັດທະນາພົວພັນຮ່ວມມືກັບ ຫວຽດນາມ, ສ້າງເງື່ອນໄຂອຳນວຍຄວາມສະດວກເພື່ອໃຫ້ບັນດາວິສາຫະກິດ ຫວຽດນາມ ເຂົ້າມາລົງທຶນຢູ່ ກຳປູເຈຍ. ລັດຖະບານ ຫວຽດນາມ ຈະເຮັດຈົນສຸດຄວາມສາມາດຂອງຕົນເພື່ອພ້ອມກັບ ລັດຖະບານ ກຳປູເຈຍ ນຳສາຍພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານ ຫວຽດນາມ - ກຳປູເຈຍ ໃຫ້ນັບມື້ນັບພັດທະນາຢ່າງດີງາມ, ນຳມາເຊິ່ງຜົນປະໂຫຍດໃຫ້ແກ່ ປະຊາຊົນ 2 ປະເທດ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມືພັດທະນາຢູ່ພາກພື້ນ ແລະ ຢູ່ໃນໂລກ”
ສ່ວນທ່ານນາຍົກລັດຖະມົນຕີ Hunsen ກໍ່ຕີລາຄາສູງບັນດາວິສາຫະກິດ ຫວຽດນາມ ລົງທຶນເຂົ້າ ກຳປູເຈຍ, ພ້ອມທັງສະແດງຄວາມປາດຖະໜາວ່າ: ລັດຖະບານ ຫວຽດນາມ ສືບຕໍ່ສະໜັບສະໜູນ ກຳປູເຈຍ ຜ່ານການສືບຕໍ່ເພີ່ມທະວີການຮ່ວມມື, ລົງທຶນ. ຍາມໃດ ກຳປູເຈຍ ກໍ່ຊົມເຊີຍ, ສະໜັບສະໜູນທຸກໂຄງການລົງທຶນຂອງຫວຽດນາມ ເຂົ້າ ກຳປູເຈຍ.