(vovworld) – ໃນຂອບເຂດບັນດາການເຄື່ອນໄຫວຂອງຄະນະຜູ້ແທນຂັ້ນສູງຫວຽດນາມ ຢູ່ນິວຢອກ, ປະເທດອາເມລິກາ, ວັນທີ 27/09, ຕາມເວລາອາເມລິກາ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ ໄດ້ມີການພົບປະກັບລັດຖະມົນຕີການຕ່າງປະເທດບຸນກາຣີ,ແດນມາກ ແລະ ກາເມຣູນ.
ທີ່ການພົບປະກັບທ່ານລັດຖະມົນຕີວ່າການກະຊວງການຕ່າງປະເທດບຸນກາຣີ, Daniel Mitov, ທ່ານຮອງນາຍົກລັດຖະມົນຕີ ຟ້າມບິ່ງມິງ ເນັ້ນໜັກເຖິງການຢ້ຽມຢາມບຸນກາຣີ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕີນຢຸງ ເມື່ອເດືອນ 06/2015 ຜ່ານມາ ແມ່ນຂີດໝາຍສຳຄັນ, ປະກອບສ່ວນນຳການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງ 2 ປະເທດໃຫ້ຂຶ້ນສູ່ລະດັບສູງໃໝ່. 2 ກະຊວງການຕ່າງປະເທດ ແລະ ບັນດາກະຊວງ, ຂະແໜງການທີ່ກ່ຽວຂ້ອງຂອງ 2 ປະເທດ ຕ້ອງສືບຕໍ່ສົມທົບກັນຢ່າງແຮງ ເພື່ອຜັນຂະຫຍາຍບັນດາໝາກຜົນທີ່ບັນລຸໄດ້ໃນການຢ້ຽມຢາມດັ່ງກ່າວ. ສ່ວນທ່ານ Daniel Mitov, ເນັ້ນໜັກວ່າ, 2 ຝ່າຍຕ້ອງກະກຽມໃຫ້ກອງປະຊຸມຄະນະກຳມະການປະສົມ 2 ຝ່າຍໃນເດືອນ 11 ຈະມາເຖິງໃຫ້ເປັນຢ່າງດີ, ພ້ອມກັນນັ້ນ, ທັງ 2 ກະຊວງການຕ່າງປະເທດ ກໍຕ້ອງກະກຽມໃຫ້ການຢ້ຽມຢາມຫວຽດນາມ ຂອງຮອງປະທານາທິບໍດີບຸນກາຣີ, ກໍຄືກອງປະຊຸມທາບທາມຄວາມເຫັນດ້ານການເມືອງລະຫວ່າງ 2 ກະຊວງການຕ່າງປະເທດໃນປີ 2015 ຢ່າງມີປະສິດທິຜົນ.
ທີ່ການພົບປະກັບທ່ານລັດຖະມົນຕີວ່າການກະຊວງການຕ່າງປະເທດແດນມາກ Kristian Jense, ທ່ານຮອງນາຍົກລັດຖະມົນຕີ ຟ້າມບິ່ງມິງ ປາດຖະໜາວ່າ 2 ປະເທດເພີ່ມທະວີການຮ່ວມໃນບັນດາຂົງເຂດຄືການຄ້າ - ການລົງທຶນ, ວິທະຍາສາດເຕັກໂນໂລຊີ, ການເຕີບໂຕຂຽວ… ກວ່າອີກ. ທ່ານ Kristian Jense ຢືນຢັນວ່າ, ແດນມາກຈະສືບຕໍ່ໜູນຊ່ວຍຫວຽດນາມໃນຂົງເຂດສຶກສາ, ພັດທະນາຂຽວແບບຍືນຍົງ. ລັດຖະມົນຕີ 2 ທ່ານ ກໍເຫັນດີກ່ຽວກັບເລື່ອງພິຈາລະຈາລົງນາມໃນຂໍ້ຕົກລົງກ່ຽວກັບການຮ່ວມມືດ້ານການສຶກສາ, ພ້ອມທັງຊຸກຍູ້ໃຫ້ 2 ກະຊວງການຕ່າງປະເທດ ຜັນຂະຫຍາຍແຜນການກະທຳຫວຽດນາມ - ແດນມາກ 2014 – 2015 ແລະ ສ້າງແຜນການກະທຳໃໝ່ໃນປີ 2016 – 2017.
ໃນການພົບປະກັບທ່ານລັດຖະມົນຕີວ່າການກະຊວງການຕ່າງປະເທດ ກາເມີຣູນ Piere Moukoko Mbonjo, ທ່ານຮອງນາຍົກລັດຖະມົນຕີ ຟ້າມບິ່ງມິງ ຢືນຢັນວ່າ ຫວຽດນາມ ປາດຖະໜາຢາກຊຸກຍູ້ການຮ່ວມມືຕ່າງຝ່າຍຕ່າງມີຜົນປະໂຫຍດກັບ ກາເມີຣູນ. ໃນຕໍ່ໜ້າ, 2 ຝ່າຍເຫັນດີເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ທ້ອງຖິ່ນ, ວິສາຫະກິດ ເພື່ອແນໃສ່ສ້າງກາລະໂອກາດພົບປະ, ຊອກຮູ້ຕະຫຼາດຂອງກັນ. ທ່ານຮອງນາຍົກລັດຖະມົນຕີ ສະເໜີໃຫ້ 2 ຝ່າຍແລກປ່ຽນ, ເຈລະຈາ ແລະ ລົງນາມໃນສັນຍາສົ່ງເສີມ ແລະ ອາລັກຂາແກ່ການລົງທຶນ ແລະ ສັນຍາຫຼິກລ້ຽນການເກັບພາສີຊ້ອນ ໂດຍໄວ… ທ່ານ Piere Moukoko Mbonjo ຢືນຢັນວ່າ, ລັດຖະບານ ກາເມີຣູນ ປາດຖະນາຢາກຊຸກຍູ້ການຮ່ວມມືໃນຫຼາຍຂົງເຂດກັບຫວຽດນາມ, ສ້າງເງື່ອນໄຂສະດວກໃຫ້ບັນດານັກລົງທຶນຕ່າງປະເທດ, ໃນນັ້ນມີຫວຽດນາມ, ທຳມາຫາກິນຢູ່ກາເມີຣູນ.