ທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ
ທ່ານອີເຈີ້ງເສິ່ງ,ປະທານສະພາປຶກສາການເມືອງປະຊາຊົນ ຈີນ
(ພາບ: TTXVN)
(vovworld) - ໃນຂອບເຂດການຢ້ຽມຢາມ ສປ ຈີນຢ່າງເປັນທາງການ, ຕອນຄຳ່ວັນທີ 13/1, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ເຂົ້າຮ່ວມ “ງານພົບປະມິດຕະພາບ ເນື່ອງໃນໂອກາດສະເຫຼີມສະຫຼອງ 67 ປີ ແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ຈີນ ແລະ ຕ້ອນຮັບປີໃໝ່ 2017“. ກ່າວຄວາມເຫັນທີ່ງານພົບປະ, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ, ພັກ , ລັດ ແລະ ປະຊາຊົນ ຫວຽດນາມ ຍາມໃດກໍ່ເຄົາລົບ ແລະ ຮູ້ບຸນຄຸນຕໍ່ການສະໜັບສະໜູນ, ການຊ່ວຍເຫຼືອສຸດຈິດສຸດໃຈຂອງພັກ , ລັດ ແລະ ປະຊາຊົນ ຈີນ ທີ່ມີຕໍ່ພາລະກິດຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບຂອງປະຊາຊົນ ຫວຽດນາມ.
“67 ປີຜ່ານມາ, ເຖິງວ່າມີບາງໄລຍະມີການຜັນແປກໍ່ຕາມ, ແຕ່ສາຍພົວພັນມິດຕະພາບ ແລະ ການຮ່ວມມືຍັງຄົງແມ່ນການພົວພັນຕົ້ນຕໍລະຫວ່າງສອງປະເທດ. ຫວຽດນາມ ແລະ ຈີນແມ່ນສອງປະເທດບ້ານໃກ້ເຮືອນຄຽງ, ມີລະບອບການເມືອງທີ່ຄ້າຍຄືກັນ, ແລະ ພວມພ້ອມກັນດຳເນີນການປ່ຽນໃໝ່, ເຊື່ອມໂຍງ ແລະ ລົງເລິກການປະຕິຮູບ, ເປີດປະຕູເພື່ອພັດທະນາ, ກ້າວຂຶ້ນສັງຄົມນິຍົມ; ຄວາມມີສະຖຽນລະພາບ, ການພັດທະນາຂອງແຕ່ລະປະເທດມີຄວາມໝາຍສຳຄັນທີ່ສຸດສຳລັບສອງປະເທດ. ດັ່ງນັ້ນ, ການປັບປຸງ, ເພີ່ມທະວີການພົວພັນມິດຕະພາບ, ການຮ່ວມມືຍຸດທະສາດຮອບດ້ານ ຫວຽດນາມ - ຈີນໄດ້ຮັບການພັດທະນາຢ່າງປອດໃສ ແລະ ບໍ່ຢຸດຢັ້ງ, ມີສະຖຽນລະພາບ, ນັບມື້ນັບດີງາມນັ້ນ, ທັງແມ່ນຄວາມຮັບຜິດຊອບໜ້າທີ່ປະຫວັດສາດ, ທັງແມ່ນຄວາມຮຽກຮ້ອງຕ້ອງການພາວະວິໄສ, ເໝາະສົມກັບຜົນປະໂຫຍດພື້ນຖານ, ຍາວນານຂອງປະຊາຊົນສອງປະເທດ, ມີຜົນປະໂຫຍດໃຫ້ສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ຢູ່ໃນໂລກ“.
ສ່ວນທ່ານອີເຈີ້ງເສິ່ງ, ປະທານສະພາປຶກສາການເມືອງປະຊາຊົນ ຈີນ ເນັ້ນໜັກວ່າ, ພັກ ແລະ ລັດ ຈີນ ຖືເປັນສຳຄັນທີ່ສຸດຕໍ່ການພັດທະນາການພົວພັນກັບ ຫວຽດນາມ, ຖືການພົວພັນລະຫວ່າງ ຈີນ - ຫວຽດນາມ ແມ່ນທີ່ຕັ້ງສຳຄັນພິເສດໃນວຽກງານພົວພັນຕ່າງປະເທດກັບບັນດາປະເທດບ້ານໃກ້ເຮືອນຄຽງ. ທ່ານຍັງສະແດງຄວາມເຊື່ອໝັ້ນວ່າ, ດ້ວຍຄວາມມານະພະຍາຍາມລວມ, ຄວາມສາມັກຄີ ແລະ ການຮ່ວມມືລະຫວ່າງສອງຝ່າຍ, ໃນປີໃໝ່ນີ້, ການພົວພັນ ຈີນ - ຫວຽດນາມ ຈະມີກາລະໂອກາດພັດທະນາໃໝ່ຫຼາຍຢ່າງ, ສ້າງໜ້າປະຫວັດສາດແຫ່ງການຮ່ວມມືໃໝ່, ນຳມາເຊິ່ງຄວາມຜາສຸກໃຫ້ປະຊາຊົນສອງປະເທດຢ່າງແນ່ນອນ.
ຕອນເຊົ້າວັນທີ 14/1, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ມາວາງພວງມາລາທີ່ອະນຸສາວະລີ ປະທານ ໂຮ່ຈີມິນ ໃນບໍລິເວນສະຖານທູດ ຫວຽດນາມປະຈຳຈີນ ແລະໂອ້ລົມກັບພະນັກງານ, ພາລະກອນ ສະຖານທູດ, ຜູ້ຕາງໜ້າບັນດາວິສາຫະກິດ, ນັກສຶກສາ ແລະ ຊາວ ຫວຽດນາມທີ່ພວມດຳລົງຊີວິດຢູ່ຈີນ. ແລະ ກໍ່ໃນຕອນເຊົ້າວັນທີ 14/1, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ໄປຢ້ຽມຢາມນະຄອນ ຂ໋າງເຈົາ , ແຂວງ ເຈືອຈ້ຽງ, ສືບຕໍ່ການຢ້ຽມຢາມ ຈີນ ຢ່າງເປັນທາງການ.