ການເຄື່ອນໄຫວຕ່າງໆສະເຫຼີມສະຫຼອງ 59 ປີ ແຫ່ງວັນແພດໝໍ ຫວຽດນາມ 27/02
ທ່ານປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຫງວຽນທ້ຽນເຍີນ
ອວຍພອນສະມາຄົມໃຫຍ່ການແພດຫວຽດນາມ
(ພາບ: TTXVN)
(vovworld) - ວັນທີ 26/02, ທ່ານປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຫງວຽນທ້ຽນເຍີນ ໄດ້ໄປຢ້ຽມຢາມ ແລະ ອວຍພອນສະມາຄົມໃຫຍ່ການແພດຫວຽດນາມ ເນື່ອງໃນໂອກາດສະເຫຼີມສະຫຼອງ 59 ປີແຫ່ງວັນແພດໝໍຫວຽດນາມ. ທ່ານຫງວຽນທ້ຽນເຍີນ ໄດ້ຕີລາຄາສູງການເຂົ້າຮ່ວມຢ່າງຕັ້ງໜ້າຂອງສະມາຄົມໃຫຍ່ການແພດຫວຽດນາມ ໃນການເຄື່ອນໄຫວສົມທົບກັບກະຊວງສາທາລະນະສຸກ ຕິດຕາມກວດກາ ການດຳເນີນວິຊາຊີບຂອງບັນດາຮາກຖານສາທາລະນະສຸກພາກເອກະຊົນ ແລະ ບັນດາຮ້ານຂາຍຢາເອກະຊົນ. ທ່ານຫງວຽນທ້ຽນເຍີນ ປາດຖະໜາວ່າ, ບັນດາສະມາຊິກຂອງສະມາຄົມໃຫຍ່ ສືບຕໍ່ຮັກສາມູນເຊື້ອ, ເສີມຂະຫຍາຍຫົວຄິດປະດິດສ້າງ ປະກອບສ່ວນເຂົ້າໃນວຽກງານເບິ່ງແຍງສຸຂະພາບໃຫ້ປະຊາຊົນ.
ແລະກໍ່ໃນວັນດຽວກັນ, ຄະນະກຳມະການປະຊາຊົນນະຄອນດ່ານັ້ງ ໄດ້ຈັດພິທີສະເຫຼີມສະຫຼອງ 59 ປີແຫ່ງວັນແພດໝໍຫວຽດນາມ, ປະດັບນາມມະຍົດແພດໝໍປະຊາຊົນ, ແພດໝໍດີເດັ່ນ ແລະ ລາງວັນ Blouse ຂາວ ໃຫ້ພະນັກງານ, ແພດໝໍຂະແໜງສາທາລະນະສຸກ. ປີ 2014 ນີ້, ນະຄອນດ່ານັ້ງ ປະດັບນາມມະຍົດແພດໝໍປະຊາຊົນໃຫ້ 4 ຄົນ; ທ່ານໝໍດີເດັ່ນ 15 ຄົນ. ນີ້ແມ່ນບັນດາບຸກຄົນທີ່ໄດ້ອຸທິດສ່ວນຢ່າງໃຫຍ່ຫຼວງເຂົ້າໃນພາລະກິດປົກປັກຮັກສາ, ເບິ່ງແຍງ ແລະ ຍົກສູງສຸຂະພາບໃຫ້ແກ່ປະຊາຊົນ. ທ່ານໝໍ ຫງວຽນອຸດ, ຮອງຜູ້ອຳນວຍການພະແນກສາທາລະນະສຸກນະຄອນດ່ານັ້ງ, ແບ່ງປັນຄວາມໃນໃຈເມື່ອໄດ້ຮັບນາມມະຍົດແພດໝໍປະຊາຊົນ ວ່າ.
“ພວກຂ້າພະເຈົ້າເປັນກຽດທີ່ໄດ້ຮັບນາມມະຍົດອັນສູງສົ່ງນີ້, ນີ້ແມ່ນຄວາມຮັບຜິດຊອບອັນໃຫຍ່ຫຼວງຂອງຕົນເອງ ທີ່ມີຕໍ່ພະລາກິດເບິ່ງແຍງສຸຂະພາບໃຫ້ປະຊາຊົນ. ຂ້າພະເຈົ້າໃຫ້ຄຳໝັ້ນສັນຍາວ່າ ຈະມານະພະຍາຍາມສູ້ຊົນຝຶກຝົນເພື່ອອຸທິດສ່ວນໃຫ້ນັບມື້ນັບຫຼາຍ. ລາງວັນນີ້ກໍ່ເປັນການປຸກລຸກນ້ຳໃຈແພດໝໍປຽບເໝືອນຜູ້ເປັນແມ່, ປຸກລະດົມບັນດາຜູ້ທີ່ເຮັດວຽກງານສາທາລະນະສຸກສຸມຈິດສຸມໃຈ, ເມົາມົວກັບອາຊີບ, ປະກອບສ່ວນຍູ້ໄພຫຍໍ້ທໍ້ໃຫ້ຖອຍໄປ”.