(vovworld) – ເນື່ອງໃນໂອກາດສະເຫຼີມສະຫຼອງວັນສະຖາປະນາປະເທດຫວຽດນາມ 02/09 ແລະ 45 ປີແຫ່ງວັນປະຕິບັດຄຳພິໃນກຳຂອງປະທານໂຮ່ຈິມິນ, ວັນທີ 02/09, ສະຖານທູດຫວຽດນາມ ປະຈຳກຸຍບາ ໄດ້ຈັດພິທີວາງພວງມາລາຢູ່ອານຸສາວະລີປະທານໂຮ່ຈິມິນ ໃນສວນສາທາລະນະສັນຕິພາບ ທີ່ນະຄອນຫຼວງ La Habana. ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດຫວຽດນາມ ປະຈຳກຸຍບາ ເຢືອງມິງ, ໄດ້ທົບທວນຄືນ ຊີວິດ ແລະ ພາລະກິດປະຕິວັດຂອງປະທານໂຮ່ຈິມິນ ນັບແຕ່ເວລາທີ່ເພີ່ນເດີນທາງໄປຊອກຫາເສັ້ນທາງກູ້ຊາດເມື່ອປີ 1911, ພ້ອມທັງຢືນຢັນບັນດາການເຄື່ອນໄຫວຂອງເພິ່ນໃນຕະຫຼອດຊຸມເດືອນປີແຫ່ງການຊອກຫາເສັ້ນທາງກູ້ຊາດປະເທດຕ່າງໆໃນທົ່ວໂລກ ສິ່ງດັ່ງກ່າວໄດ້ຊ່ວຍໃຫ້ເພີ່ນເຂົ້າໃຈກວ່າກ່ຽວກັບຄວາມທຸກຍາກລຳບາກຂອງບັນດາປະເທດທີ່ຖືກກົດຂີ່ຂູດຮີດ ແລະ ຊອກໄດ້ທິດທາງອັນຖືກຕ້ອງໃຫ້ການປະຕິວັດປົດປ່ອຍຊາດຢູ່ຫວຽດນາມ.
ກ່ອນໜ້ານັ້ນ, ໃນຂອບເຂດບັນດາການເຄື່ອນໄຫວສະເຫຼີມສະຫຼອງວັນບຸນໃຫຍ່ ຂອງຊາດ, ສະຖານທູດຫວຽດນາມ, ໃນຖານະເປັນປະທານໝູນວຽນຂອງບັນດາປະເທດອາຊຽນ ຢູ່ກຸຍບາ ໄດ້ຈັດງານພົບປະແລກປ່ຽນກິລາລະຫວ່າງພະນັກງານ, ພາລະກອນສະຖານທູດບັນດາປະເທດໃນກຸ່ມທີ່ມີອົງການຕາງໜ້າປະຈຳກຸຍບາ ເຊິ່ງລວມມີ ລາວ, ກຳປູເຈຍ, ອິນໂດເນເຊຍ, ມາເລເຊຍ ດ້ວຍຈຸດປະສົງ ເພີ່ມທະວີການພົວພັນສາມັກຄີ, ມິດຕະພາບ ແລະ ການຮ່ວມມືລະຫວ່າງບັນດາປະເທດພາຍໃນກຸ່ມ.
ຕອນຄຳ່ຂອງວັນດຽວກັນ, ຫົວໜ້າສະຖານກົງສູນຫວຽດນາມ ປະຈຳນະຄອນ Perth, ປະເທດອົດສະຕາລີ ໄດ້ຈັດຕັ້ງພິທີສະເຫຼີມສະຫຼອງ 69 ປີ ແຫ່ງວັນສະຖາປະນາປະເທດຫວຽດນາມ ຢູ່ສຳນັກງານຜູ້ວ່າການລັດ. ເຂົ້າຮ່ວມພິທີມີແຂກຜູ້ມີກຽດປະມານ 300 ທ່ານ, ເຊິ່ງແມ່ນບັນດາເຈົ້າໜ້າທີ່ຂັ້ນສູງຂອງລັດອົດສະຕາລີຕາເວັນຕົກ, ບັນດາສະມາຊິກລັດຖະສະພາ. ເຈົ້າຄອງນະຄອນ Perth ແລະ ເຈົ້າຄອງຫຼາຍນະຄອນໃນລັດ, ພ້ອມກັບຊາວຫວຽດນາມ, ນັກສຶກສາຫວຽດນາມຢູ່ລັດອົດສະຕາລີຕາເວັນຕົກ. ທີ່ພິທີ, ຜູ້ຮັກສາການຜູ້ວ່າການລັດອົດສະຕາລີຕາເວັນຕົກ Wayne Martin, ຕີລາຄາສູງບັນດາຜົນງານເຊິ່ງຫວຽດນາມ ບັນລຸໄດ້ ກໍ່ຄືການພັດທະນາ ການພົວພັນລະຫວ່າງສອງປະເທດ, ພິເສດແມ່ນລະຫວ່າງຫວຽດນາມ ກັບລັດອົດສະຕາລີຕາເວັນຕົກ. ທ່ານກໍ່ອວຍພອນວົງຄະນາຍາດຊາວຫວຽດນາມ ຢູ່ອົດສະຕາລີ ທີ່ມີຊາວຫວຽດນາມ ຜູ້ທຳອິດກາຍເປັນຜູ້ວ່າການລັດອົດສະຕາລີໃຕ້, ທັງແມ່ນຜູ້ວ່າການຊາວອາຊີຜູ້ທຳອິດຢູ່ອົດສະຕາລີ. ທ່ານກໍ່ຂໍອວຍພອນລັດຖະບານ ແລະ ປະຊາຊົນຫວຽດນາມ ບັນລຸໄດ້ຜົນງານອັນໃຫຍ່ຫຼວງຫຼາຍຢ່າງກວ່າອີກໃນພາລະກິດສ້າງສາປະເທດໃຫ້ນັບມື້ນັບຮັ່ງມີເຂັ້ມແຂງ ແລະ ພັດທະນາ.