(vovworld) - ໃນໂອກາດສະເຫຼີມສະຫຼອງ 62 ປີແຫ່ງວັນແພດໝໍ ຫວຽດນາມ (27/2/1955 – 27/2/2017), ຕອນບ່າຍວັນທີ 26/2, ຄະນະຜູ້ແທນການນຳນະຄອນ ໂຮ່ຈີມິນ ໂດຍທ່ານ ດິງລາທັງ, ເລຂາຄະນະພັກນະຄອນ ໂຮ່ຈີມິນ, ນຳໜ້າໄດ້ລົງຢ້ຽມຢາມ, ອວຍພອນບັນດາຫົວໜ່ວຍການແພດໃນບໍລິເວນນະຄອນ. ຄະນະໄດ້ລົງຢ້ຽມຢາມສູນການແພດສຳຮອງນະຄອນ, ໂຮງໝໍພະຍາດເຂດຮ້ອນ, ໂຮງໝໍໂລກມະເຮັງຄໍຫຼຽງ, ໂຮງໝໍຫູ - ດັງ - ຄໍນະຄອນ ໂຮ່ຈີມິນ.
ວັນທີ 26/2, ສະມາຄົມການຢາ ຫວຽດນາມ ຢູ່ສະຫະພັນ ລັດເຊຍ ມີການພົບປະຢູ່ນະຄອນຫຼວງ ມົດສະກູ. ການພົບປະທີ່ເປັນມູນເຊື້ອເພື່ອສະເຫຼີມສະຫຼອງວັນແພດໝໍ ຫວຽດນາມ ປະຈຳປີ ໄດ້ກາຍເປັນການພົບປະ, ແລກປ່ຽນບັນດາບົດຮຽນລະຫວ່າງບັນດາແພດໝໍ, ນັກສຶກສາຂະແໜງການແພດ ທີ່ພວມດຳລົງຊີວິດ, ປະຕິບັດງານຢູ່ ສະຫະພັນ ລັດເຊຍ. ທ່ານໝໍຍິງ ຟານຕ໋ວຽດຮັ່ງ, ຮອງປະທານສະມາຄົມການຢາ ຫວຽດນາມ ຢູ່ສະຫະພັນລັດເຊຍ, ໃຫ້ຮູ້ວ່າ:
“ສະມາຄົມການຢາ ຫວຽດນາມ ຢູ່ ລັດເຊຍ ໄດ້ຈັດຕັ້ງການຊ່ວຍເຫຼືອພໍ່ແມ່ປະຊາຊົນໃນວຽກງານສົ່ງເສີມສຸຂະພາບເປັນປະຈຳ. ຄະນະບໍລິຫານງານສະມາຄົມພວກຂ້າພະເຈົ້າກໍ່ເປັນເອກະພາບນຳກັນວ່າຈະກວດພະຍາດໃຫ້ພໍ່ແມ່ປະຊາຊົນເປັນປະຈຳ ແລະ ຕັກເຕືອນພໍ່ແມ່ປະຊາຊົນວ່າ ຍາມເປັນພະຍາດຕ້ອງໄປປິ່ນປົວໃນທັນທີ ບໍ່ປະໃຫ້ເປັນໜັກຈຶ່ງໄປກວດມັນຈະອັນຕະລາຍຫຼາຍ.”
ຕອນບ່າຍວັນທີ 26/2, ຢູ່ນະຄອນຫຼວງ ພະນົມເປັນ, ປະເທດກຳປູເຈຍ, ສະມາຄົມຊາວກຳປູເຈຍ ເຊື້ອຊາດ ຫວຽດນາມ ຢູ່ ກຳປູເຈຍ ກໍ່ໄດ້ຈັດຕັ້ງງານລ້ຽງ, ພ້ອມທັງສະເໜີຕົວຄະນະບໍລິຫານງານຊົ່ວຄາວສະມາຄົມທ່ານໝໍ ຫວຽດນາມ ຢູ່ ກຳປູເຈຍ.