ການສະເຫຼີມສະຫຼອງຢູ່ ອັກຊັງຕີນ
(ພາບ: Diệu Hương/Vietnam+)
|
(vovworld) – ໃນບັນຍາກາດທີ່ທັງປະເທດເບີກບານມ່ວນສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບ (30/4/1975 – 30/4/2015), ວັນທີ 28/4, ທີ່ສຳນັກງານສະພາຕ່ຳ ອັກຊັງຕີນ ຢູ່ນະຄອນຫຼວງ Buenos Aires ໄດ້ດຳເນີນພິທີສະເຫຼີມສະຫຼອງ ເຫດການປະຫວັດສາດສຳຄັນຍິ່ງນີ້, ດ້ວຍການເຂົ້າຮ່ວມຂອງຜູ້ຕາງໜ້າກະຊວງການຕ່າງປະເທດ ແລະ ສະພາແຫ່ງຊາດ ອັກຊັງຕີນ, ສະຖາບັນວັດທະນະທຳ ອັກຊັງຕີນ - ຫວຽດນາມ, ເອກອັກຄະລັດຖະທູດປະເທດຕ່າງໆຄື: ລັດເຊຍ, ອິນເດຍ, ມາເລເຊຍ, ອິນໂດເນເຊຍ, ຟີລິບປິນ ແລະ Nicaragua. ກ່າວຄຳເຫັນທີ່ພິທີ, ທ່ານປະທານກຳມາທິການພົວພັນຕ່າງປະເທດສະພາຕ່ຳ ອັກຊັງຕີນ Guillermo Carmona ເນັ້ນໜັກວ່າ: “ປະຊາຊົນ ຫວຽດນາມ ຍາມໃດກໍ່ຮັບຮູ້ວ່າ: ເອກະລາດ, ເສລີພາບ, ກຽດຕິຄຸນຂອງມະນຸດແມ່ນສິ່ງທີ່ສັກກະລະບູຊາທີ່ສຸດ ແລະ ເຂົາເຈົ້າພ້ອມແລ້ວທີ່ຈະເສຍສະຫຼະຊີວິດເພື່ອປົກປ້ອງສິ່ງດັ່ງກ່າວ”.
ແລະກໍ່ໃນວັນດຽວກັນ, ສະຖານທູດ ຫວຽດນາມ ປະຈຳ ອີຢິບ ກໍ່ໄດ້ຈັດຕັ້ງພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບ ຢ່າງສົມກຽດ. ທ່ານເອກອັກຄະລັດຖະທູດ ຫວຽດນາມ ປະຈຳ ອີຢີບ ດ່າວແທ່ງຈູງ ເນັ້ນໜັກວ່າ: ໄຊຊະນະອັນຍິ່ງໃຫຍ່ເມື່ອລະດູບານໃໝ່ປີ 1975 ໄດ້ສະແດງໃຫ້ເຫັນການນຳພາທີ່ຖືກຕ້ອງຂອງພັກກອມມູນິດ ຫວຽດນາມ, ບົດບາດຂອງປະທານ ໂຮ່ຈີມິນ, ສິ່ງດັ່ງກ່າວສະແດງໃຫ້ເຫັນຄຸນນະທາດ ແລະ ພຸມປັນຍາຂອງ ຫວຽດນາມ, ແມ່ນໝາກຜົນຂອງວິວັດທະນາການຕໍ່ສູ້ທີ່ພິລະອາດຫານຂອງປະຊາຊົນ ຫວຽດນາມ.
ໃນວັນທີ 28/4, ອົງການສັນຕິພາບ ແລະ ສາມັກຄີທົ່ວ ອິນເດຍ (AIPSO) ກໍໄດ້ຈັດຕັ້ງງານໂຮມຊຸມນຸມສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບ. ທີ່ພິທີ, ທ່ານ Pallab Sengupta, ເລຂາທິການໃຫຍ່ AIPSO ແລະ ຜູ້ແທນບັນດາພັກການເມືອງ, ບັນດາອົງການຈັດຕັ້ງມະຫາຊົນ ອິນເດຍ ໄດ້ຢ້ຳຄືນບັນດາອະນຸສອນກ່ຽວກັບນ້ຳໃຈສາມັກຄີ, ການສະໜັບສະໜູນທີ່ສຸດຈິດສຸດໃຈຂອງປະຊາຊົນ ອິນເດຍ ທີ່ມີຕໍ່ການຕໍ່ສູ້ເພື່ອແນໃສ່ປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບຂອງ ຫວຽດນາມ.