(vovworld) - ໃນລະຫວ່າງວັນທີ 09 – 12/05, ຢູ່ຫົວໜ່ວຍເລືອກຕັ້ງເລກ 1 ນະຄອນໂຮ່ຈິມິນ, ທ່ານປະທານປະເທດ ເຈີນດ້າຍກວາງ ແລະ ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 14, 4 ທ່ານ ໄດ້ມີການພົບປະກັບຜູ້ມີສິດເລືອກຕັ້ງເມືອງ 1, ເມືອງ 3 ແລະ 4 ເພື່ອລາຍງານໂຄງການດຳເນີນງານ, ລົງໂຄສະນາຫາສຽງເລືອກຕັ້ງຕາມຂໍ້ກຳນົດຂອງກົດໝາຍ. ເນື້ອໃນໂຄງການດຳເນີນງານຂອງບັນດາຜູ້ສະໝັກຮັບເລືອກຕັ້ງໄດ້ເຕື້ອງເຖິງຫຼາຍບັນຫາຄື: ປັບປຸງສະພາບແວດລ້ອມແຫ່ງການດຳລົງຊີວິດ, ສ້າງກົນໄກໃຫ້ລະບົບສາທາລະນະສຸກ, ສົ່ງເສີມສຸຂະພາບໃຫ້ປະຊາຊົນ, ເອົາໃຈໃສ່ເຖິງຄວາມຄວາມກ້າວໜ້າຂອງແມ່ຍິງ, ມຸ່ງໄປເຖິງຄວາມຍຸຕິທຳໃນສັງຄົມ… ໃນໂຄງການດຳເນີນງານຂອງຕົນ, ທ່ານປະທານປະເທດ ເຈີນດ້າຍກວາງ ເນັ້ນໜັກເຖິງບັນດາໜ້າທີ່ຈຸດສຸມນັ້ນແມ່ນ: ເຂົ້າຮ່ວມການສ້າງກົດໝາຍ, ປັບປຸງລະບອບ, ວິທີການ ແລະ ກົນໄກດຳເນີນການເຄື່ອນໄຫວ, ຍົກສູງປະສິດທິຜົນວຽກງານຄຸມຄອງລັດ, ຊີ້ນຳການກໍ່ສ້າງກຳລັງປະກອບອາວຸດປະຊາຊົນປະຕິວັດ, ເປັນກອງທັບຫຼວງ, ຍອດຢ້ຽມ, ຫັນເປັນທັນສະໄໝເທື່ອລະກ້າວ ເພື່ອປົກປັກຮັກສາເອກະລາດ, ອະທິປະໄຕຢ່າງໝັ້ນຄົງເຂັ້ມແຂງ… ທ່ານປະທານປະເທດ ກໍ່ຍົກສູງໜ້າທີ່ຕໍ່ສູ້, ປ້ອງກັນ ແລະ ຕ້ານການສໍ້ລາດບັງຫຼວງ, ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ ເພື່ອແນໃສ່ເສີມຂະຫຍາຍທຸກແຫຼ່ງກຳລັງ, ຄວາມສາມາດບົ່ມຊ້ອນຢ່າງມີຫົວຄິດປະດິດສ້າງຂອງປະຊາຊົນເພື່ອສ້າງສາ ແລະ ປົກປັກຮັກສາປະເທດຊາດ. ທ່ານປະທານປະເທດ ຢືນຢັນຈະຊີ້ນຳການປະຕິບັດແນວທາງການຕ່າງປະເທດເອກະລາດຢ່າງສະເໝີຕົ້ນສະເໝີປາຍ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະ ພັດທະນາ, ຫັນການພົວພັນເປັນຫຼາຍຮູບຫຼາຍແບບ ແລະ ຫຼາຍຝ່າຍ, ຕັ້ງໜ້າເຊື່ອມໂຍງເຂົ້າກັບສາກົນ, ຍົກສູງທີ່ຕັ້ງ ແລະ ອິດທິພົນຊື່ສຽງຂອງປະເທດຊາດ. ໃນຂະນະນັ້ນ, ບັນດາຜູ້ສະໝັກຮັບເລືອກຕັ້ງອື່ນກໍ່ຢືນຢັນຈະພົບປະ, ຮັບຟັງຄຳເຫັນຂອງປະຊາຊົນເປັນປະຈຳ, ປົກປັກຮັກສາສິດ ແລະ ຜົນປະໂຫຍດອັນຊອບທຳຂອງປະຊາຊົນ…
ໃນວັນທີ 11/05, ທ່ານເລຂາຄະນະພັກນະຄອນຮ່າໂນ້ຍ ຮ່ວາງຈຸງຫາຍ ພ້ອມກັບບັນດາຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ລົງພົບປະກັບຜູ້ມີສິດເລືອກຕັ້ງເມືອງ ບາວີ, ຫົວໜ່ວຍເລືອກຕັ້ງເລກ 8 ຂອງນະຄອນຮ່າໂນ້ຍ. ບັນດາຜູ້ສະໝັກຮັບເລືອກຕັ້ງຢືນຢັນວ່າ, ເມື່ອໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດ ຈະຕັ້ງໜ້າປະກອບສ່ວນເພື່ອຍົກສູງຄຸນນະພາບການເຄື່ອນໄຫວຂອງສະພາແຫ່ງຊາດ, ປະກອບສ່ວນເຂົ້າໃນວິວັດການສ້າງກົດໝາຍ, ຕິດຕາມກວດກາບັນດາບັນຫາຂອງຊາດ; ເອົາໃຈໃສ່ໜູນຊ່ວຍບັນດາທ້ອງຖິ່ນທີ່ຍັງປະສົບກັບຄວາມຫຍຸ້ງຍາກ, ພິເສດແມ່ນບັນດາຕາແສງເຂດພູດອຍທີ່ມີພໍ່ແມ່ຊາວຊົນເຜົ່າອາໄສດຳລົງຊີວິດ…