ການເຄື່ອນໄຫວມຸ້ງໄປເຖິງ ວັນທະຫານເສຍອົງຄະ ແລະ ນັກຮົບເສຍສະຫຼະ ຊີວິດເພື່ອຊາດ
ພາບປະກອບ
(vovworld) – ການເຄື່ອນໄຫວຫຼາຍຢ່າງທີ່ແທດຈິງເພື່ອມຸ້ງໄປເຖິງການສະເຫຼີມສະຫຼອງ 65 ປີແຫ່ງວັນທະຫານເສຍອົງຄະ ແລະ ນັກຮົບທີ່ເສຍສະຫຼະຊີວິດເພື່ອຊາດ (27/7/1947 – 27/7/2012) ສືບຕໍ່ດຳເນີນໄປຢູ່ບັນດາທ້ອງຖິ່ນໃນທົ່ວປະເທດ. ຕອນຄຳ່ວັນທີ 22/7, ຢູ່ຮ່າໂນ້ຍ, ສະມາຄົມນັກຮົບເກົ່າຫວຽດນາມ ສົມທົບກັບວິທະຍຸກະຈາຍສຽງຫວຽດນາມ ຈັດຕັ້ງການຖ່າຍທອດສົດທາງໂທລະພາບ “ລາຍການພົບປະແລກປ່ຽນສິລະປະ, ຕອບບຸນແທນຄຸນເດືອນ 7” ເພື່ອແນໃສ່ເຊີດຊູບັນດານັກຮົບເກົ່າທີ່ເຮັດທຸລະກິດເກັ່ງ ແລະ ພ້ອມແລ້ວທີ່ຈະແບ່ງປັນນ້ຳໃຈເພື່ອການກຸສົນກັບເພື່ອນຮ່ວມກົມກອງຂອງຕົນທີ່ຍັງປະສົບກັບຄວາມຫຍຸ້ງຍາກ. ສະມາຄົມນັກຮົບເກົ່າຫວຽດນາມ ໄດ້ມອບຂອງຂວັນ 200 ພຸດ, ແຕ່ລະພຸດມີມູນຄ່າ 1 ລ້ານດົ່ງໃຫ້ແກ່ບັນດານັກຮົບເກົ່າເຊິ່ງແມ່ນທະຫານເສຍອົງຄະ, ບັນດາຄອບຄົວທີ່ມີນັກຮົບເສຍສະຫຼະຊີວິດເພື່ອຊາດປະສົບກັບຄວາມຫຍຸ້ງຍາກເປັນພິເສດ. ພົນຕີ Phung Khac Dang, ຮອງປະທານສະມາຄົມນັກຮົບເກົ່າຫວຽດນາມ ຊີ້ແຈງວ່າ:
“ສະມາຄົມທຸກຂັ້ນ ໄດ້ປະກອບເຫື່ອແຮງບູລະນະປະຕິສັງຂອນສຸສານນັບຮົບທີ່ເສຍສະຫຼະຊີວິດເພື່ອຊາດ, ຢື້ຢາມຖາມຂ່າວ, ມອບຂອງຂວັນແມ່ຫວຽດນາມ ວິລະຊົນ ເປັນປະຈຳ. ເຂົ້າຮ່ວມການລ້ຽງດູບັນດານັກຮົບເກົ່າ ແລະ ລູກຫຼານຂອງບັນດານັກຮົບເກົ່າທີ່ຕິດທາດພິດສີສົ້ມ/ ດີໂອຊິນ, ສ້າງເຮືອນແຫ່ງສາຍຈິດມິດໃຈ... ພວກຂ້າພະເຈົ້າມີຄວາມປະທັບໃຈ ເມື່ອມີຫຼາຍອົງການ, ຄະນະ, ຂະແໜງການ, ບັນດາບຸກຄົນ ພ້ອມກັນຮ່ວມແຮງຮ່ວມໃຈກັບສະມາຄົມນັບຮົບເກົ່າໃນລາຍການຕອບບຸນແທນຄຸນ”
ລາຍການ “ດອກໄມ້ສີແດງ”
ແລະກໍໃນຕອນຄຳ່ວັນດຽວກັນ, ນະຄອນຫຼວງ ຮ່າໂນ້ຍ ໄດ້ຈັດຕັ້ງການຍ້ອງຍໍສັນລະເສີນນັກຮົບເກົ່າ, ຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີຕໍ່ການປະຕິວັດທີ່ດີເດັ່ນ ແລະ ບຸກຄົນ, ຫົວໜ່ວຍປະຕິບັດວຽກງານຕອບບຸນແທນຄຸນເປັນຢ່າງດີ. ຄະນະກຳມະການປະຊາຊົນໄດ້ມອບໃບຍ້ອງຍໍໃຫ້ແກ່ 46ໝູ່ຄະນະ ແລະ 35 ສ່ວນບຸກຄົນ ເຊິ່ງແມ່ນ ທະຫານເສຍອົງຄະ, ຍາດຕິພີ່ນ້ອງນັກຮົບທີ່ເສຍສະຫຼະຊີວິດເພື່ອຊາດທີ່ມີຜົນງານດີເດັ່ນ ແລະ ບັນດາຫົວໜ່ວຍປະຕິບັດວຽກງານຕອບບຸນແທນຄຸນເປັນຢ່າງດີໃນຊຸມປີຜ່ານມາ. ທ່ານນາງ Nguyen Thi Bich Ngoc, ຮອງປະທານຄະນະກຳມະການປະຊາຊົນນະຄອນ ຮ່າໂນ້ຍ ໃຫ້ຮູ້ວ່າ:
“ການເບິ່ງແຍງດູແລຜູ້ມີຄຸນງາມຄວາມດີຕໍ່ການປະຕິວັດໄດ້ກາຍເປັນຂະບວນການແຜ່ລາມອອກຢ່າງກ້ວາງຂວາງໃນປະຊາຊົນທຸກຊັ້ນວັນນະ, ບັນດາອົງການສັງຄົມ ບັນດາຂະແໜງການ, ທ້ອງຖິ່ນ ໃນບໍລິເວນນະຄອນ ຢ່າງແທ້ຈິງ. ດັ່ງນັ້ນ, ບັນດາຄອບຄົວນອນໃນເປົ້າໝາຍນະໂຍບາຍທັງໝົດລ້ວນແຕ່ມີລະດັບຄອງຊີບເໜືອລະດັບປານກາງ ແລະ ທະຫານເສຍອົງຄະ, ຍາດຕິພີ່ນ້ອງຂອງນັກຮົບທີ່ເສຍສະຫຼະຊີວິດເພື່ອຊາດໄດ້ບືນຕົວຂຶ້ນຜ່ານຜ່າຄວາມເຈັບປວດສູນຫາຍ ດ້ວຍເຈດຈຳນົງ ແລະ ມານະຈິດອົງອາດກ້າແກ່ນໄດ້ແກ້ໄຂຄວາມຫຍຸ້ງຍາກ, ສ້າງຊີວິດທີ່ອິມໜຳສຳລານຄວາມຜາສຸກປະກອບສ່ວນເຂົ້າໃນການສ້າງສາ ແລະ ພັດທະນານະຄອນຫຼວງ”
ແລະກໍໃນຕອນຄຳ່ວັນທີ 22/7, ຢູ່ຮ່າໂນ້ຍ, ໜັງສືພິມເອເລັກໂຕນິກ ພັກກອມມູນິດຫວຽດນາມ ສົມທົບກັບໂທລະພາບຫວຽດນາມ ຈັດຕັ້ງລາຍການ “ດອກໄມ້ສີແດງ” ຄັ້ງທີ 5 ເພື່ອຕອບບຸນແທນຄຸນບັນດາຄອບຄົວເປົ້າໝາຍນະໂຍບາຍ, ບັນດາທະຫານເສຍອົງຄະ, ທະຫານເຈັບປວຍ, ຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດ, ແມ່ຫວຽດນາມ ວິລະຊົນ, ຜູ້ມີຄຸນງາມຄວາມດີຕໍ່ການປະຕິວັດ...