(vovworld) - ຕອນເຊົ້າວັນທີ 21/03, ຄະນະຊາວໜຸ່ມຮ່າໂນ້ຍ ໄດ້ຈັດພິທີສະເຫຼີມສະຫຼອງ 83 ປີແຫ່ງວັນສ້າງຕັ້ງຄະນະຊາວໜຸ່ມກອມມູນິດໂຮ່ຈິມິນ ແລະ ຍ້ອງຍໍເລຂາໜ່ວຍຊາວໜຸ່ມດີເດັ່ນນະຄອນຫຼວງຮ່າໂນ້ຍ ປີ 2014 100 ຄົນ.
ເພື່ອນ ເລທູຮ່ວຽນ, ເລຂາໜ່ວຍຊາວໜຸ່ມ 12A5, ໂຮງຮຽນມັດທະຍົມຕອນປາຍ ເມລິງ, ເມືອງເມລິງ, ຮ່າໂນ້ຍ, ແມ່ນໜຶ່ງໃນເລຂາໜ່ວຍຊາວໜຸ່ມດີເດັ່ນ 100 ຄົນໄດ້ຮັບການຍ້ອງຍໍໃນຄັ້ງນີ້ ແບ່ງປັນວ່າ.
“ຂ້າພະເຈົ້າຮູ້ສຶກເປັນກຽດ ແລະ ມີຄວາມເອກອ້າງຖະນົງໃຈຫຼາຍ. ໃນຖານະເປັນຊາວໜຸ່ມຄົນໜຶ່ງ, ກ່ອນອື່ນໝົດແມ່ນຕ້ອງມີຄວາມສຸດຈິດສຸດໃຈ, ເມົາມົວກັບວຽກງານຊາວໜຸ່ມ, ຕ້ອງສຸມຈິດສຸມໃຈ, ມີຫົວຄິດປະດິດສ້າງ. ໃນນາມເປັນເລຂາໜ່ວຍຊາວໜຸ່ມ, ຂ້າພະເຈົ້າຕ້ອງ ເຮັດແນວໃດໃຫ້ພວກເພື່ອນຊາວໜຸ່ມໃນໜ່ວຍຊາວໜຸ່ມຂອງຕົນມີຄວາມສຸດຈິດສຸດໃຈ, ມີຄວາມເມົາມົວເພື່ອກາຍ ເປັນຜູ້ມີຜົນປະໂຫຍດໃຫ້ແກ່ສັງຄົມ”.
ແລະກໍ່ໃນຕອນເຊົ້າວັນດຽວກັນ, ຢູ່ຮ່າໂນ້ຍ, ກະຊວງຕຳຫຼວດໄດ້ຈັດງານພົບປະສ້າງສັນກັບອະດີດພະນັກງານຊາວໜຸ່ມຫວຽດນາມ ແລະ ພະນັກງານຊາວໜຸ່ມກະຊວງຕຳຫຼວດ ຜ່ານໄລຍະຕ່າງໆ. ກ່າວຄຳເຫັນທີ່ພິທີ, ທ່ານລັດຖະມົນຕີກະຊວງຕຳຫຼວດ ເຈີນດ້າຍກວາງ ໄດ້ຕີລາຄາສູງບົດບາດຂອງຄະນະຊາວໜຸ່ມກອມມູນິດໂຮ່ຈິມິນ ໃນພາລະກິດປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ກໍ່ສ້າງກຳລັງຕຳຫຼວດປະຊາຊົນ. ທ່ານລັດຖະມົນຕີ ເຈີນດ້າຍກວາງ ເຊື່ອໝັ້ນວ່າ ໃນໄລຍະຈະມາເຖິງ, ວຽກງານຊາວໜຸ່ມ ແລະ ຂະບວນການຊາວໜຸ່ມ ຈະສືບຕໍ່ມີບາດກ້າວພັດທະນາໃໝ່ຢ່າງແຮງ, ປະກອບສ່ວນເຂົ້າໃນຄາດໝາຍຫັນເປັນປະເທດຊາດເປັນປະເທດອຸດສາຫະກຳ ແລະ ທັນສະໄໝ.