ທ່ານນາຍົກລັດຖະມົນຕີຫວຽດນາມຫງວຽນເຕີ້ນຢຸ້ງ ແລະ ທ່ານນາຍົກລັດຖະມົນຕີອີນເດຍ Manmohan Singh(ພາບ : internet)
|
Vovworld- ກ່ອນທີ່ອອກຈາກນະຄອນຫຼວງນິວເດລີ ກັບຄືນເມືອປະເທດ, ຕອນແລງວັນທີ 21/12 ຕາມເວລາຫວຽດນາມ, ທ່ານນາຍົກລັດຖະມົນຕີຫວຽດນາມຫງວຽນເຕີ້ນຢຸ້ງໄດ້ມີການພົບປະກັບ ທ່ານນາຍົກລັດຖະມົນຕີອີນເດຍ Manmohan Singh . ທີ່ການພົບປະ, ທ່ານນາຍົກລັດຖະມົນຕີ ທັງ 2 ໄດ້ສະແດງຄວາມພໍໃຈຕໍ່ການພັດທະນາຢ່າງຕັ້ງໜ້າຂອງສາຍພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດໃນໄລຍະທີ່ຜ່ານມາ ພ້ອມທັງຢືນຢັນວ່າ ຈະສືບຕໍ່ເພີ່ມທະວີການຮ່ວມມືໃນທຸກຂົງເຂດ. ທ່ານນາຍົກລັດຖະມົນຕີທັງ 2 ເຫັນດີເປັນເອກະສັນເພີ່ມທະວີການແລກປ່ຽນບັນດາການຢ້ຽມຢາມຂັ້ນສູງ, ຮັກສາບັນດາກົນໄກຮ່ວມມືທີ່ມີຢູ່ແລ້ວ ແລະ ສ້າງຕັ້ງຄະນະກຳມະການການຄ້າປະສົມ ແລະ ໜ່ວຍງານຮ່ວມກ່ຽວກັບການສຶກສາ ແລະ ບຳລຸງສ້າງໂດຍໄວ; ປະຕິບັດບັນດາສັນຍາທີ່ໄດ້ຮັບການລົງນາມເປັນຢ່າງດີ, ສູ້ຊົນຍົກວົງເງິນການຄ້າຫວຽດນາມ-ອີນເດຍຂຶ້ນເຖິງ 7 ຕື້ USD ໃນປີ 2015. ທ່ານນາຍົກລັດຖະມົນຕີທັງ 2 ຍັງເຫັນດີສືບຕໍ່ສົມທົບກັນ ແລະ ຮ່ວມມືຢ່າງແໜ້ນແຟ້ນຢູ່ໃນບັນດາເວທີປາໄສສາກົນ ແລະ ພາກພື້ນ; ຢືນຢັນຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມ ສະຫງົບປອດໄພໃນການເດີນເຮືອຢູ່ທະເລຕາເວັນອອກ, ແກ້ໄຂການພິພາດກັນໂດຍສັນຕິວິທີ, ເຄົາລົບກົດໝາຍສາກົນ ແລະ ສົນທິສັນຍາຂອງ ສ.ປ.ຊ ກ່ຽວກັບກົດໝາຍທະເລປີ 1982; ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ( DOC) , ກ້າວໄປເຖິງການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ( COC).
ກ່ອນໜ້ານັ້ນ, ໃນຕອນເຊົ້າຂອງວັນດຽວກັນ, ໃນຂອບເຂດກອງປະຊຸມສຸດຍອດສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາ ອາຊຽນ - ອີນເດຍ, ທ່ານນາຍົກລັດຖະມົນຕີຫວຽດນາມຫງວຽນເຕີ້ນຢຸ້ງພ້ອມກັບບັນດາທ່ານຫົວໜ້າຄະນະຜູ້ແທນປະເທດຕ່າງໆໃນກຸ່ມອາຊຽນ ແລະ ທ່ານນາຍົກລັດຖະມົນຕີອີນເດຍ Manmohan Singh ໄດ້ເຂົ້າຮ່ວມພິທີລົດທຸງ ຂະບວນລົດ ຄາຣາວານ ອາຊຽນ-ອີນເດຍ. ນີ້ແມ່ນລາຍການເພື່ອແນໃສ່ປະກອບສ່ວນຮັດແໜ້ນຄວາມສາມັກຄີລະຫວ່າງ ອາຊຽນ-ອີນເດຍ, ພ້ອມທັງສ້າງເງື່ອນໄຂເພື່ອພັດທະນາດ້ານການຄ້າ, ການລົງທຶນ ແລະ ທ່ອງທ່ຽວລະຫວ່າງບັນດາປະເທດ.