ທ່ານເລຂາທິການໃຫຍ່ຫງວຽນຟູຈ້ອງແລະທ່ານນາຍົກ
ລັດຖະມົນຕີ ຈີນ ຫລີເຄີຊຽງ
ພາບ:nhandan.com.vn
|
(vovworld)- ໃນຂອບເຂດການຢ້ຽມຢາມ ສປ ຈີນ ຢ່າງເປັນທາງການ ຂອງ ທ່ານເລຂາທິການໃຫຍ່ ຫງວຽນຟູຈ້ອງ ແລະ ຄະນະຜູ້ແທນຂັ້ນສູງຫວຽດນາມ, ຕອນເຊົ້າວັນທີ 9/4, ພົນເອກ ເຈີນດ້າຍກວາງ, ກຳມະການກົມການເມືອງ, ລັດຖະມົນຕີວ່າການກະຊວງຕຳຫລວດ ຫວຽດນາມ ໄດ້ມີການພົບປະກັບທ່ານ ເມງຈຽງຈູ, ກຳມະການກົມການເມືອງ, ເລຂາຄະນະກຳມະການການເມືອງ ແລະ ກົດໝາຍສູນກາງພັກກອມມູນິດ ຈີນ ພ້ອມດ້ວຍລັດຖະມົນຕີວ່າການກະຊວງຕຳຫລວດຈີນ ແລະ ລັດຖະມົນຕີວ່າການກະຊວງພາຍໃນຈີນ. ນະທີ່ນີ້, ສອງຝ່າຍເປັນເອກະພາບ ສືບຕໍ່ຍູ້ແຮງການພົວພັນຮ່ວມມືໃນຂົງເຂດຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍໃຫ້ມີປະສິດທິຜົນ ແລະ ແທດຈິງກວ່າ, ກາຍເປັນຫນຶ່ງໃນບັນດາເສົາຄ້ຳສຳຄັນຂອງການພົວພັນຄູ່ຮ່ວມມື, ຮ່ວມມືຍຸດທະສາດຮອບດ້ານ ລະຫວ່າງສອງປະເທດ. ທ່ານລັດຖະມົນຕີ ເຈີນດ້າຍກວາງ ຢືນຢັນ: ກະຊວງຕຳຫລວດ ຫວຽດນາມ ຖືການຮ່ວມມືກັບບັນດາອົງການປະຕິບັດກົດໝາຍຈີນໃນຂົງເຂດຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍເປັນສຳຄັນ.
ແລະກໍໃນຂອບເຂດການຢ້ຽມຢາມຈີນຂອງ ທ່ານເລຂາທິການໃຫຍ່ ຫງວຽນຟູຈ້ອງ, ທ່ານລັດຖະມົນຕີວ່າການກະຊວງແຜນການ ແລະ ການລົງທຶນຫວຽດນາມ ບູ່ຍກວາງວີງ ໄດ້ພົບປະກັບທ່ານ ສີຊາວສີ, ຫົວຫນ້າຄະນະກຳມະການປະຕິຮູບ ແລະ ພັດທະນາແຫ່ງຊາດຈີນ ແລະ ມີການເຮັດວຽກກັບລັດຖະມົນຕີວ່າການກະຊວງການຄ້າ ຈີນ ກົວຈີງກວນ. ສອງຝ່າຍໄດ້ແລກປ່ຽນ ແລະ ເປັນເອກະພາບສູງຕໍ່ການຊຸກຍູ້ການຮ່ວມມືລະຫວ່າງສອງປະເທດກ່ຽວກັບພື້ນຖານໂຄງລ່າງ ແລະ ສຳຫລວດກວດຄືນເລື່ອງຜັນຂະຫຍາຍການວາງແຜນກຳນົດພັດທະນາເສດຖະກິດສັງຄົມ ລະຫວ່າງຫວຽດນາມ - ຈີນ ໄລຍະ 2012-2016, ເປັນເອກະພາບຍູ້ແຮງການຜັນຂະຫຍາຍແຜນກຳນົດດັ່ງກ່າວ, ຈັດຕັ້ງວາລະປະຊຸມຕໍ່ໄປລະຫວ່າງສອງຝ່າຍ.
ກ່ອນຫນ້ານັ້ນ, ວັນທີ 8/4, ທີ່ຫໍສະພາປະຊາຊົນແຫ່ງຊາດຈີນ, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ພົບປະກັບ ທ່ານ ຫລີເຄີຊຽງ, ກຳມະການປະຈຳກົມການເມືອງສູນກາງພັກກອມມູນິດຈີນ, ນາຍົກລັດຖະມົນຕີ ຈີນ ແລະ ທ່ານ ຈຽງຕີຢາງ, ກຳມະການປະຈຳກົມການເມືອງສູນກາງພັກກອມມູນິດຈີນ, ຫົວຫນ້າກຳມະການ ຄະນະກຳມະການປະຈຳ ສະພາແຫ່ງຊາດຈີນ.
ເມື່ອພົບປະກັບນາຍົກລັດຖະມົນຕີ ຈີນ ຫລີເຄີຊຽງ, ທ່ານເລຂາທິການໃຫຍ່ ຫງວຽນຟູຈ້ອງ ອວຍພອນພັກ ແລະ ປະຊາຊົນຈີນ ຍາດໄດ້ບັນດາຜົນງານສຳຄັນໃນການພັດທະນາເສດຖະກິດສັງຄົມ. ກ່ຽວກັບການພົວພັນສອງພັກ, ສອງລັດ ໃນ 65 ປີຜ່ານມາ, ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ: ນະໂຍບາຍສະເຫມີຕົ້ນສະເຫມີປາຍຂອງຫວຽດນາມ ແມ່ນຍາມໃດກໍຖືການພົວພັນຮ່ວມມືມິດຕະພາບກັບຈີນ ເປັນສຳຄັນ. ເມື່ອແລກປ່ຽນກ່ຽວກັບການພົວພັນລະຫວ່າງສອງປະເທດໃນໄລຍະຈະມາເຖິງ, ການນຳສອງທ່ານ ໄດ້ເຫັນດີໂດຍຖືວ່າ ເລື່ອງຊຸກຍູ້ການພົວພັນລະຫວ່າງສອງປະເທດໃຫ້ພັດທະນາຢ່າງປອດໃສ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງລະຫວ່າງການນຳຂັ້ນສູງ ແລະ ນ້ຳໃຈມິດຕະພາບລະຫວ່າງປະຊາຊົນສອງປະເທດສຳລັບສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ. ສອງຝ່າຍແລກປ່ຽນຢ່າງເລິກເຊິ່ງ, ກວ້າງຂວາງ ກ່ຽວກັບການເພີ່ມທະວີການຊີ້ນຳປະຕິບັດຂໍ້ຕົກລົງ ແລະ ຄວາມຮັບຮູ້ລວມຂອງການນຳຂັ້ນສູງສອງປະເທດຢ່າງຄົບຖ້ວນ ແລະ ມີປະສິດທິຜົນ, ຊຸກຍູ້ການຮ່ວມມືຢ່າງແທດຈິງໃນທຸກຂົງເຂດ, ເພີ່ມທະວີຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນພັດທະນາເປັນປົກກະຕິ, ພ້ອມທັງເພີ່ມທະວີການພົບປະແລກປ່ຽນ, ການຮ່ວມມືໃນທຸກຂົງເຂດ ແລະ ລະຫວ່າງບັນດາທ້ອງຖິ່ນສອງປະເທດ./.