(vovworld)- ຕອນເຊົ້າວັນທີ 19/6, ທ່ານດິງເທຮິງ, ເລຂາສູນກາງພັກ, ຫົວໜ້າຄະນະໂຄສະນາສຶກສາສູນກາງ ໄດ້ໄປຢ້ຽມຢາມ, ອວຍພອນສະຖາບັນສື່ນມວນຊົນ ແລະ ໂຄສະນາ, ວິທະຍຸກະຈາຍສຽງຫວຽດນາມ, ວາລະສານກອມມູນິດ ແລະ ວິທະຍຸ ແລະ ໂທລະພາບຮ່າໂນ້ຍ. ເນື່ອງໃນໂອກາດວັນສື່ມວນຊົນປະຕິວັດ ຫວຽດນາມ, ທ່ານດິງເທຮິງ ອວຍພອນຖັນແຖວນັກຂ່າວ ແລະ ບັນດາອົງການສື່ມວນຊົນຫວຽດນາມ ຈະຍາດໄດ້ບັນດາຜົນງານໃໝ່ ພ້ອມທັງຕີລາຄາສູງການປະກອບສ່ວນອັນໃຫ່ຍຫລວງຂອງບັນດາອົງການສື່ມວນຊົນຕໍ່ພາລະກິດສ້າງສາ ແລະ ພັດທະນາປະເທດຊາດ. ຢູ່ວິທະຍຸກະຈາຍສຽງຫວຽດນາມ, ທ່ານດິງເທຮິງ ສະແດງຄວາມປິຕິຊົນຊື່ນຕໍ່ການພັດທະນາ, ການເຕີບໃຫ່ຍຂອງວິທະຍຸກະຈາຍສຽງຫວຽດນາມ ດ້ວຍພາຫະນະສື່ມວນຊົນຄົບຖ້ວນ, ກາຍເປັນອົງການສື່ມວນຊົນອັນດັບໜຶ່ງຂອງພັກ, ລັດ. ທ່ານປາດຖະໜາວ່າ, ວິທະຍຸກະຈາຍສຽງຫວຽດນາມ ຈະສືບຕໍ່ປ່ຽນໃໝ່ເພື່ອຕອບສະໜອງຄວາມຮຽກຮ້ອງຕ້ອງການດ້ານຂໍ້ມູນຂ່າວສານ, ປະກອບ ສ່ວນຫລາຍກ່ວາອີກເຂົ້າໃນພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ.
ໃນວັນດຽວກັນ, ຄະນະປະຈຳຄະນະກຳມະການແນວໂຮມປະເທດຊາດຫວຽດນາມ ໄດ້ປຸກລະດົມ ແລະ ປະກາດລະບຽບງານປະກວດສື່ມວນຊົນ “ເພື່ອພາລະກິດມະຫາສາມັກຄີທົ່ວປວງຊົນທັງຊາດ” ຄັ້ງທີ 11 ປີ 2013-2014. ນະທີ່ນີ້, ທ່ານຮິງດາມ, ປະທານຄະນະກຳມະການແນວໂຮມປະເທດຊາດຫວຽດນາມ ເນັ້ນໜັກວ່າ: ໃນ 88 ປີຜ່ານມາ, ສື່ມວນຊົນປະຕິວັດຫວຽດນາມ ໄດ້ມີການພັດທະນາ, ເຕີບໂຕຢ່າງເຂັ້ມແຂງໃນທຸກດ້ານ ແລະ ປາດຖະໜາວ່າ: ບັນດາອົງການສື່ມວນຊົນຈະສືບຕໍ່ຮ່ວມແຮງຮ່ວມໃຈພ້ອມກັບແນວໂຮມປະເທດຊາດຫວຽດນາມ ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດໃຫ້ໝັ້ນຄົງເຂັ້ມແຂງໃນສະະພາບການໃໝ່, ປະກອບສ່ວນຢ່າງຕັ້ງໜ້າເຂົ້າໃນພາລະກິດພັດທະນາປະເທດຊາດ.
ກ່ອນໜ້ານັ້ນ, ຕອນຄຳ່ວັນທີ 18/6, ຢູ່ແຂວງ ບິ່ນເຢືອງ, ສະມາຄົມນັກຂ່າວແຂວງ ບິ່ນເຢືອງ, ນະຄອນ ໂຮ່ຈີມິນ ແລະ ແຂວງ ດົ່ງນາຍ ສົມທົບກັນຈັດຕັ້ງງານພົວພັນແລກປ່ຽນ ຮ້ອງລຳທຳເພງສະເຫຼີມສະຫຼອງ 88 ປີແຫ່ງວັນສື່ມວນຊົນປະຕິວັດ ຫວຽດນາມ. ລາຍການນີ້ແມ່ນເພື່ອແນໃສ່ເຊີດຊູ, ຈົດຈຳການປະກອບສ່ວນຂອງກຳລັງສື່ມວນຊົນໃນພາລະກິດພັດທະນາເປັນປົກກະຕິ ແລະ ຄວາມໝັ້ນຄົງພື້ນຖານເສດຖະກິດ, ການປ້ອງກັນຊາດຂອງປະເທດ. ເນື່ອງໃນໂອກາດນີ້, ສະມາຄົມນັກຂ່າວນະຄອນ ເຫ້ວ, ແຂວງ ເທື່ອທຽນເຫ້ວ, ແຂວງ ບັກຢາງ, ນະຄອນ ຫາຍຟ່ອງ... ກໍ່ໄດ້ຈັດຕັ້ງງານພົບປະສັງສັນສະເຫຼີມສະຫຼອງ 88 ປີແຫ່ງວັນສື່ມວນຊົນປະຕິວັດ ຫວຽດນາມ (21/6/1925 – 21/6/2013) ເຊັນດຽວກັນ.