(ພາບປະກອບ)
(vovworld) - ຕອນເຊົ້າວັນທີ 20/12, ກອງພົນປ້ອງກັນອາກາດ 361 (ກອງພົນປ້ອງກັນອາກາດ ຮ່າໂນ້ຍ) ໄດ້ຈັດຕັ້ງພິທີ ສະເຫຼີມສະຫຼອງ 40 ປີ ”ຮ່າໂນ້ຍ - ດ້ຽນບຽນຝູທາງອາກາດ”. ກ່າວຄວາມເຫັນຢູ່ທີ່ນີ້, ພັນເອກ ຫງວຽນກວາງຕ໋ວຽນ (Nguyen Quang Tuyen) ຫົວໜ້າກອງພົນປ້ອງກັນອາກາດ 361, ຢືນຢັນວ່າ: ”ຮ່າໂນ້ຍ - ດ້ຽນບຽນຝູທາງອາກາດ” ແມ່ນໄຊຊະນະແຫ່ງເຈດຈຳນົງຕໍ້ສູ້ຢ່າງອົງອາດກ້າຫານ, ຕັດສິນໃຈຕີເອົາຊະນະສັດຕູຮຸກຮານອາເມລິກາໃນ 12 ວັນແລະຄືນ, ກອງທັບ ແລະ ປະຊາຊົນພາກເໜືອຍິງຕົກເຮືອບິນປະເພດຕ່າງໆ 81 ລຳ, ໃນນັ້ນມີເຮືອບິນ B52, 34 ລຳ, ສະເພາະກອງພົນປ້ອງກັນອາກາດ 361 ຍິງຕົກເຮືອບິນ B52 ແມ່ນ 25 ລຳ, ດັບສູນ ແລະ ຈັບຕົວນັກບິນອາເມລິກາຫຼາຍຄົນ.
ໃນວັນດຽວກັນ, ເປັນຄັ້ງທຳອິດທີ່ສູນອານຸລັກຮັກສາມໍລະດົກທັງລອງ - ຮ່າໂນ້ຍ ໄດ້ເປີດປະຕູຂຸມຄອງບັນຊາການສູ້ຮົບຂອງກອງບັນຊາການໃຫຍ່ ເພື່ອຕ້ອນຮັບນັກທ່ອງທ່ຽວມາຢາມ. ທ່ານ ຫງວຽນວັນເຊີນ, ຜູ້ອຳນວຍການສູນອານຸລັກຮັກສາມໍລະດົກທັງລອງ - ຮ່າໂນ້ຍ ໃຫ້ຮູ້ວ່າ:
”ໃນໂອກາດສະເຫຼີມສະຫຼອງ 40 ປີ ”ຮ່າໂນ້ຍ - ດ້ຽນບຽນຝູທາງອາກາດ”, ພວກເຮົາໄດ້ຟື້ນຟູຂຸມຄອງບັນຊາການສູ້ຮົບນີ້ ເພື່ອແນະນຳໃຫ້ນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດກ່ຽວກັບມູນເຊື້ອປະຕິວັດຂອງພວກເຮົາ, ກໍ່ຄືປະກອບສ່ວນສຶກສາໃຫ້ລຸ້ນໜຸ່ມກ່ຽວກັບມູນເຊື້ອປະຕິວັດຂອງກອງທັບປະຊາຊົນ ຫວຽດນາມ”
ຂຸມຄອງບັນຊາການສູ້ຮົບແມ່ນແຫ່ງທີ່ການນຳກົມການເມືອງ, ກະຊວງປ້ອງກັນປະເທດ, ກອງບັນຊາການກອງທັບປະຊາຊົນຫວຽດນາມ, ໄດ້ບັນຊາກອງທັບປະຊາຊົນຫວຽດນາມຕີເອົາຊະນະໃນການສູ້ຮົບຕ້ານສົງຄາມທຳລາຍພາກເໜືອ 2 ຄັ້ງຂອງຈັກກະພັດອາເມລິກາ, ເຊິ່ງຈຸດສູງແມ່ນບັ້ນຮົບ ”ດ້ຽນບຽນຝູທາງອາກາດ” ແຕ່ວັນທີ 18-29/12/1972.