(vovworld) – ວັນທີ 27/ 2, ສະເຫຼີມສະຫຼອງ 58 ປີແຫ່ງວັນແພດໝໍ ຫວຽດນາມ (27/2/1955 – 27/02/2013). ເນື່ອງໃນໂອກາດນີ້, ຂະແໜງສາທາລະນະສຸກບັນດາແຂວງ, ນະຄອນ ໄດ້ຈັດຕັ້ງການເຄື່ອນໄຫວຕ່າງໆ ເພື່ອເຊີດຊູບັນດາການອຸທິດສ່ວນຂອງຖັນແຖວແພດໝໍ ແລະ ບັນດາຜູ້ທີ່ເຄີຍ ແລະ ພວມເຄື່ອນໄຫວໃນຂົງເຂດສາທາລະນະສຸກ. ພະແນກສາທາລະນະສຸກ ແຂວງ ກວາງຈີ້ ຈັດຕັ້ງ “ວັນບຸນບໍລິຈາກເລືອດ ອາສາສະໝັກຂະແໜງສາທາລະນະສຸກລະດູບານໃໝ່ປີ 2013” ດ້ວຍການເຂົ້າຮ່ວມຂອງແພດໝໍໜຸ່ມກ່ວາ 500 ຄົນ. ພະແນກສາທາລະນະສຸກ ຮ່າໂນ້ຍ ໄດ້ປຸກລະດົມຂະບວນການແຂ່ງຂັນໃນປີ 2013 ເພື່ອແນໃສ່ສ້າງການຫັນປ່ຽນຢ່າງແຮງ ກ່ຽວກັບຄຸນນະພາບ, ຕິດພັນກັບຂະບວນການແຂ່ງຂັນ ກັບການປະຕິບັດໜ້າທີ່ການເມືອງຂອງຫົວໜ່ວຍ, ຂອງຂະແໜງໃນການເບິ່ງແຍງດູແລ ແລະ ປົກປັກຮັກສາສຸຂະພາບໃຫ້ແກ່ປະຊາຊົນນະຄອນຫຼວງ. ຕາມນັ້ນແລ້ວ, ຂະແໜງສຸມໃສ່ຍົກສູງຄຸນນະພາບການກວດປິນປົ່ວພະຍາດ, ຈັນຍາບັນ, ປະຕິບັດຂໍ້ກຳນົດໃນການປະພຶດເປັນຢ່າງດີ, ເບິ່ງແຍງດູແລ, ປົວແປງຊີວິດການເປັນຢູ່ໃຫ້ແກ່ພະນັກງານພາລະກອນ, ຜູ້ອອກແຮງງານ, ຕ້ານການຟຸມເຟືອຍ, ຍູ້ແຮງການປະຕິຮູບດ້ານການບໍລິຫານ...
ໃນຂະນະນັ້ນ, ຄະນະຊາວໜຸ່ມນະຄອນ ໂຮ່ຈີມິນ, ກໍ່ໄດ້ຈັດຕັ້ງການຍ້ອງຍໍສັນລະເສີນ, ມອບລາງວັນ ຟ້າມງອກແທກ ໃຫ້ ແພດໝໍໜຸ່ມທີ່ດີເດັ່ນ 20 ຄົນ.
ພາບປະກອບ
ກໍ່ໃນຕອນເຊົ້າວັນທີ 27/2, ພະແນກສາທາລະນະສຸກ ແຂວງ ດັກລັກ ໄດ້ຈັດຕັ້ງພິທີສະເຫຼີມສະຫຼອງ 58 ປີແຫ່ງວັນແພດໝໍ ຫວຽດນາມ. ປີ 2012 ແມ່ນປີທຳອິດ ທີ່ແຂວງ ດັກລັກ ປະຕິບັດ ຊຸດມາດຖານແຫ່ງຊາດ ກ່ຽວກັບສາທາລະນະສຸກຂັ້ນຕາແສງ ເພື່ອແນໃສ່ລະດົມການເຂົ້າຮ່ວມຂອງທົ່ວສັງຄົມ ເຂົ້າວຽກງານເບິ່ງແຍງດູແລສຸຂະພາບຂອງປະຊາຊົນ, ປະກອບສ່ວນຍົກສູງຄຸນນະພາບຊີວິດການເປັນຢູ່ນັບແຕ່ຂັ້ນຮາກຖານຂອງລະບົບສາທາລະນະສຸກ. ພ້ອມກັບການລົງທຶນ ກ່ຽວກັບແຫຼ່ງຊັບພະຍາກອນມະນຸດ ແລະ ພື້ນຖານດ້ານວັດຖຸ, ແຂວງ ດັກລັກ ມີ 41% ຈຳນວນສຸກສາລາບັນລຸມາດຖານໃໝ່. ຟ້າມງອກແອ໋ງ, ຫົວໜ້າສຸກສາລາຕາແສງ Ea Bung, ເມືອງ Ea Sup, ແມ່ນໜຶ່ງ ໃນ ບັນດາສຸກສາລາທີ່ບັນລຸມາດຖານປີ 2012 ຂອງແຂວງດັກລັກ ໃຫ້ຮູ້ວ່າ:
“ລະດັບວິຊາຊີບຂອງອ້າຍເອື້ອຍນ້ອງຍັງຈຳກັດຢູ່ ແຕ່ດ້ວຍຄວາມມານະພະຍາຍາມຂອງຕົນອ້າຍເອື້ອຍນ້ອງ ໄດ້ມີຄວາມຕັດສິນໃຈ, ມີຄວາມສຸດຈິດສຸດໃຈ ກັບອາຊີບ, ພ້ອມກັນສາມັກຄີ, ເປັນເອກະພາບກັນ, ປະຕິບັດໜ້າທີ່ເຊິ່ງຂັ້ນເທິງໄດ້ມອບໝາຍໃຫ້.”
ແລະກໍ່ໃນວັນດຽວກັນ, ຂະແໜງສາທາລະນະສຸກແຂວງ ອຽນບ໋າຍ ກໍ່ຈັດຕັ້ງພິທີສະເຫຼີມສະຫຼອງ 58 ປີແຫ່ງວັນແພດໝໍ ຫວຽດນາມ ແລະ ຮັບຫຼຽນໄຊແຮງງານຊັ້ນ 1. ນີ້ແມ່ນລາງວັນອັນເໝາະສົມໃຫ້ບັນດາຄວາມມານະພະຍາຍາມຂອງພະນັກງານ, ແພດໝໍ ແລະ ພາລະກອນຂະແໜງ ສາທາລະນະສຸກ ແຂວງ ອຽນບ໋າຍ ໃນໄລຍະຜ່ານມາ.