(vovworld) – ຕອນຄຳ່ວັນທີ 30/8, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ໄດ້ເຂົ້າຮ່ວມ ແລະ ເປັນເຈົ້າພາບງານລ້ຽງຄະນະທູຕານຸທູດ ເນື່ອງໃນໂອກາດສະເຫຼີມສະຫຼອງ 68 ປີ ແຫ່ງວັນຊາດ ສສ ຫວຽດນາມ (2/9/1945-2/9/2013). ເຂົ້າຮ່ວມງານລ້ຽງມີບັນດາຮອງນາຍົກລັດຖະມົນຕີ, ການນຳບັນດາກະຊວງ, ຂະແໜງການສູນກາງ. ສ່ວນຄະນະທູຕານຸທູດມີທ່ານເອກອັກຄະລັດຖະທູດ ເວເນຢູເອລາ ປະຈຳຫວຽດນາມ, ຜູ້ຮັກສາການຄະນະທູຕານຸທູດ, ບັນດາທ່ານເອກອັກຄະລັດຖະທູດ, ອຸປະທູດ, ຜູ້ຕາງໜ້າບັນດາອົງການຈັດຕັ້ງສາກົນຢູ່ຫວຽດນາມ. ກ່າວຄວາມເຫັນທີ່ງານລ້ຽງ, ທ່ານນາຍົກລັດຖະມົນຕີ ຫງວຽນເຕີ໋ນຢຸງຊີ້ແຈ້ງວ່າ, ຫວຽດນາມ ຍາມໃດກໍ່ຈົດຈຳການສະໜັບສະໜູນອັນໃຫຍ່ຫຼວງ, ການຮ່ວມມືອັນລ້ຳຄ່າຂອງລັດຖະບານ ແລະ ປະຊາຊົນປະເທດຕ່າງໆ, ບັນດາອົງການຈັດຕັ້ງສາກົນ ແລະ ເພື່ອນມິດຢູ່ໃນໂລກໃນພາລະກິດປົກປັກຮັກສາ ແລະ ພັດທະນາປະເທດຊາດ. ດ້ວຍການຮ່ວມມື, ໜູນຊ່ວຍຢ່າງມີປະສິດທິຜົນຂອງບັນດາປະເທດ ແລະ ອົງການຕັດຕັ້ງສາກົນ, ຫວຽດນາມພວມມານະພະຍາຍາມຍູ້ແຮງການສ້າງໂຄງປະກອບເສດຖະກິດຄືນໃໝ່, ຮັກສາສະຖຽນລະພາບດ້ານເສດຖະກິດມະຫາພາກ, ຮັກສາລະດັບເຕີບໂຕ, ຮັບປະກັນຄວາມໝັ້ນຄົງ, ສະຫວັດດີການສັງຄົມ. ຮັກສາສະຖຽນລະພາບດ້ານການເມືອງ, ສັງຄົມ. ຍາມໃດຫວຽດນາມກໍ່ມານະພະຍາຍາມໃນບົດບາດຂອງປະເທດສະມາຊິກທີ່ມີຄວາມຮັບຜິດຊອບແລະ ຕັ້ງໜ້າຂອງປະຊາຄົມພາກພື້ນ ແລະ ສາກົນ
“ ໃນຂອບເຂດການຮ່ວມມືກັບ ສປຊ, ຂະບວນການບໍ່ຮ່ວມກຸ່ມ ກໍ່ຄືບັນດາກົນໄກຮ່ວມມືຫຼາຍຝ່າຍອື່ນໆ, ຍາມໃດຫວຽດນາມກໍ່ເຮັດຈົນສຸດຄວາມສາມາດຂອງຕົນ ພ້ອມກັບບັນດາປະເທດ, ບັນດາອົງການຈັດຕັ້ງສາກົນເພີ່ມທະວີການຮ່ວມມື, ສ້າງ ແລະ ປັບປຸງຄວາມໄວ້ເນື້ອເຊື່ອໃຈຍຸດທະສາດ ເພື່ອສະກັດກັ້ນການປະທະກັນ. ແກ້ໄຂຄວາມບໍ່ລົງລອຍກັນ, ປະກອບສ່ວນຮັກສາສັນຕິພາບ, ສ້າງສະພາບແວດລ້ອມພັດທະນາ ນຳມາເຊິ່ງຜົນປະໂຫຍດໃຫ້ແກ່ປະຊາຊົນໃນທົ່ວໂລກ“
ຕາງໜ້າຄະນະທູຕານຸທູດ, ທ່ານເອກອັກຄະລັດຖະທູດ ເວເນຢູເອລາປະຈຳຫວຽດນາມ Jorge Rondon Uzcategui, ຜູ້ຮັກສາການຫົວໜ້າຄະນະທູຕານຸທູດ ເນັ້ນໜັກວ່າ, ປະຊາຄົມໂລກເຊື່ອໝັ້ນວ່າ ຫວຽດນາມ ຈະສືບຕໍ່ປະສົບຜົນສຳເລັດໃນການພັດທະນາເສດຖະກິດ, ສັງຄົມ ແລະ ບັນລຸໄດ້ຜົນງານຫຼາຍກວ່າໃນຄາດໝາຍພື້ນຖານ ແມ່ນກາຍເປັນປະເທດອຸດສາຫະກຳ ແລະ ວັດທະນາຖາວອນໃນປີ 2020; ສືບຕໍ່ປະກອບບົດບາດທີ່ສຳຄັນກວ່າໃນເວທີສາກົນ; ຕັ້ງໜ້າເຂົ້າຮ່ວມບັນດາເວທີປາໄສສອງຝ່າຍ ແລະ ຫຼາຍຝ່າຍ.
“
ຫວຽດນາມ ໄດ້ສະແດງໃຫ້ເຫັນຄວາມຕັດສິນໃຈປະກອບສ່ວນເຂົ້າໃນການສ້າງພື້ນຖານໃຫ້ໂລກແຫ່ງສັນຕິພາບ. ພວກຂ້າພະເຈົ້າຢັ້ງຢືນຈະສືບຕໍ່ເພີ່ມທະວີການພົວພັນມິດຕະພາບ ແລະ ການຮ່ວມມືກັບຫວຽດນາມ ເພາະວ່າພວກຂ້າພະເຈົ້າເຊື່ອໝັ້ນວ່າ ນັ້ນແມ່ນການຮ່ວມມືຕ່າງຝ່າຍຕ່າງມີຜົນປະໂຫຍດ ແລະ ຈະປະກອບສ່ວນບໍ່ໜ້ອຍເຂົ້າໃນການພັດທະນາ ແລະ ສັນຕິພາບຂອງພາກພື້ນອາຊີ ແລະ ໂລກເວົ້າລວມ“.
ແລະກໍ່ເນື່ອງໃນໂອກາດນີ້, ຕອນຄຳ່ວັນທີ 30/8, ຢູ່ນະຄອນຫຼວງ ວຽງຈັນ, ສະຖານທູດ ຫວຽດນາມ ປະຈຳ ລາວ ໄດ້ຈັດງານລ້ຽງເນື່ອງໃນໂອກາດສະເຫຼີມສະຫຼອງ 68 ປີແຫ່ງວັນສະຖາປະນາປະເທດ ສສ ຫວຽດນາມ ຢ່າງສົມກຽດ (2/9/1945 – 2/9/2013). ກ່າວຄຳເຫັນນະພິທີ, ທ່ານເອກອັກຄະລັດຖະທູດ ຫວຽດນາມ ຫງວຽນແມ້ງຮູ່ງ ຢືນຢັນວ່າການພົວພັນມິດຕະພາບ, ຄວາມສາມັກຄີແບບພິເສດ ຫວຽດນາມ - ລາວ ເຊິ່ງປະທານ ໂຮ່ຈີມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ກໍ່ຕັ້ງ ແລະ ການນຳລຸ່ນຕ່າງໆ ພ້ອມກັບ ປະຊາຊົນ ເພີ່ມພຸນຄຸນສ້າງນັ້ນໄດ້ກ້າວເຂົ້າສູ່ລວງເລິກ, ສືບຕໍ່ພັດທະນາຢ່າງໝັ້ນຄົງໃນທຸກຂົງເຂດ ໄດ້ກາຍເປັນມໍລະດົກວັດທະນະທຳ ຂອງທັງ 2 ປະເທດ, ແມ່ນຄວາມໄວ້ເນື້ອເຊື່ອໃຈຢ່າງໝັ້ນຄົງເພື່ອໃຫ້ 2 ປະເທດປັບປຸງ ແລະ ພັດທະນາສາຍພົວພັນແບບພິເສດ ຫວຽດນາມ - ລາວ ໃຫ້ນັບມື້ນັບພັດທະນາຢ່າງໝັ້ນຄົງ.
ສະຖານທູດ ຫວຽດນາມ ປະຈຳສະຫະພັນ ລັດເຊຍ ກໍ່ຈັດຕັ້ງງານລ້ຽງເນື່ອງໃນເຫດການນີ້. ນະທີ່ນີ້, ທ່ານເອກອັກຄະລັດຖະທູດ ຫວຽດນາມ ປະຈຳສະຫະພັນລັດເຊຍ ຟ້າມຊວນເຊີນ ພ້ອມກັບລັດຖະມົນຕີ, ຮອງລັດຖະມົນຕີການຕ່າງປະເທດ ລັດເຊຍ Karasin ໄດ້ທົບທວນຄືນບັນດາບາດກ້າວພັດທະນາໃໝ່ ແລະ ຈົບງາມໃນການພົວພັນຮ່ວມມືລະຫວ່າງ 2 ປະເທດໃນໄລຍະຜ່ານມາ. 2 ຝ່າຍຢືນຢັນຈະເຮັດຈົນສຸດຄວາມສາມາດຂອງຕົນເພື່ອນຳການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນ ລັດເຊຍ ຂຶ້ນສູ່ລະກັບສູງໃໝ່.
ກ່ອນໜ້ານັ້ນ, ຕອນຄຳ່ວັນທີ 29/8, ຢູ່ນະຄອນຫຼວງ New Delhi ແລະ ນະຄອນຫຼວງ Buenos Aires ຂອງ ອັງຊັງຕິງ, ສະຖານທູດ ຫວຽດນາມ ປະຈຳ ອິນເດຍ ແລະ ອັງຊັງຕິງໄດ້ຈັດຕັ້ງພິທີສະເຫຼີມສະຫຼອງ 68 ປີແຫ່ງວັນການປະຕິວັດເດືອນ 8 ແລະ ວັນຊາດ 2/9.