ທ່ານ ຟ້າມກວາງງີ້, ເລຂາຄະນະພັກນະຄອນ ເຂົ້າຮ່ວມງານບຸນປື້ມ
(ພາບ: Ngọc Châu)
(vovworld) - ພິທີໄຂງານບຸນປື້ມ “ຮ່າໂນ້ຍ - ນະຄອນເພື່ອສັນຕິພາບ“ດຳເນີນໃນຕອນຄຳ່ວັນທີ 26/9 ຢູ່ສູນອະນຸລັກຮັກສາມໍລະດົກທັງລອງ - ຮ່າໂນ້ຍ. ນີ້ແມ່ນງານບຸນປື້ມທີ່ມີຂອບຂະໜາດໃຫຍ່ສຸດໃນປີຢູ່ຮ່າໂນ້ຍ. ຢູ່ທີ່ນີ້, ປື້ມຖືກວາງສະແດງຕາມແຕ່ລະຫົວເລື່ອງຄື: ທັງລອງໃນ ເມື່ອກ່ອນ - ຮ່າໂນ້ຍ ໃນປະຈຸບັນ, ປະທານໂຮ່ຈີມິນ ແລະ ນະຄອນຫຼວງຮ່າໂນ້ຍ, ພົນເອກຫວໍງວຽນຢາບ ແລະ ກອງທັບປະຊາຊົນຫວຽດນາມວິລະຊົນ, ຮ່າໂນ້ຍ ກັບທະເລໝູ່ເກາະແຫ່ງບ້ານເກີດເມືອງນອນ... ງານບຸນກໍ່ໄດ້ຈັດຕັ້ງຮ້ານວາງສະແດງປື້ມກວ່າ 100 ຮ້ານ ແລະ ຂາຍປື້ມກວ່າ 10.000 ຫົວ. ທ່ານ ຟ້າມກວົກຕ໋ວນ, ຫົວໜ້າຫ້ອງການໂຄງການຕູ້ປື້ມເສາະຫາ, ຮຽບຮຽງ ແລະ ພິມຈຳໜ່າຍຕູ້ປື້ມທັງລອງ 1000 ປີ ຮ່າໂນ້ຍ, ໃຫ້ຮູ້ວ່າ:
“ພວກຂ້າພະເຈົ້າຈັດຕັ້ງການຄົ້ນຄ້ວາ, ຮຽບຮຽງຊຸດປື້ມເວົ້າເຖິງວິວັດການພັດທະນາອະລິຍະທຳຂອງທັງລອງ ກວ່າ 1000 ປີ ໃນທຸກຂົງເຂດຄື: ປະຫວັດສາດ, ເສດຖະກິດ, ວັດທະນະທຳ, ສິລະປະ. ເພື່ອແນໃສ່ຮັບໃຊ້ຜູ້ອ່ານ, ຈາກນັ້ນຍົກສູງສະຕິ, ຄວາມຮັບຜິດຊອບ ແລະ ປະກອບສ່ວນກໍ່ສ້າງນະຄອນຫຼວງໃນໄລຍະເຊື່ອມໂຍງ“.
ຕອນຄຳ່ວັນທີ 26/9, ຢູ່ໂຮງສາຍຮູບເງົາ ກົງເຍິນ, ຮ່າໂນ້ຍ, ສະມາຄົມນັກສິລະປິນເວທີສະແດງຫວຽດນາມ, ສົມທົບກັບພະແນກວັດ ທະນະທຳ, ກິລາ ແລະ ທ່ອງທ່ຽວ ຮ່າໂນ້ຍ ໄຂງານມະໂຫລານເວທີສະແດງນະຄອນຫຼວງຄັ້ງທຳອິດປີ 2014, ບັນດາບົດລະຄອນຈະສຸມໃສ່ວາດພາບຮູບພາບຊາວຮ່າໂນ້ຍໃນໄລຍະຕໍ່ຕ້ານເມື່ອກ່ອນນີ້ກໍ່ຄືໃນກິດຈະການປ່ຽນໃໝ່ກໍ່ສ້າງນະຄອນຫຼວງອະລິຍະທຳ ແລະ ທັນສະໄໝ. ທ່ານ ເຈິ່ນກວົກຈຽມ ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວຮ່າໂນ້ຍ, ໃຫ້ຮູ້ວ່າ:
“ນີ້ແມ່ນກາລະໂອກາດທີ່ດີ ແລະ ແມ່ນການເຄື່ອນໄຫວທີ່ມີຄວາມໝາຍ, ເພື່ອໃຫ້ບັນດານັກສິລະປິນສະແດງຄວາມສາມາດຂອງຕົນ, ຮຳ່ຮຽນ, ແລກປ່ຽນບົດຮຽນດ້ານວິຊາຊີບເຊິ່ງກັນ ແລະ ກັນ. ຫວັງວ່າພາຍຫຼັງເຫດການນີ້ຈະມີຫຼາຍບົດລະຄອນ, ນັກສິລະປິນຫຼາຍຄົນໄດ້ຮັບການຍ້ອງຍໍ“.
ແລະກໍ່ໃນວັນດຽວກັນ, ຢູ່ເຂດປູຊະນີຍະສະຖານປະຫວັດສາດ 48 ຖະໜົນຮ່າງງາງ, ພະແນກວັດທະນະທຳ ກິລາ ແລະ ທ່ອງທ່ຽວຮ່າໂນ້ຍ ກໍ່ໄຂງານວາງສະແດງຮູບພາບ “ບາງປູຊະນີຍະສະຖານແຫ່ງການຕໍ່ຕ້ານ ຕ້ານລ່າເມືອງຂຶ້ນຝລັ່ງ ຂອງທະຫານ ແລະ ປະຊາຊົນນະຄອນຮ່າໂນ້ຍ 1946-1965“ . ຜ່ານບັນດາຮູບພາບທີ່ງານວາງສະແດງ, ຜູ້ຊົມສາມາດຮັບຮູ້ໄດ້ນຳ້ໃຈເສຍສະຫຼະຊີວິດເພື່ອໄຊຊະນະປະເທດຊາດຂອງກອງທັບ ແລະ ປະຊາຊົນນະຄອນຫຼວງຮ່າໂນ້ຍ ໃນໄລຍະຕໍ່ຕ້ານໆລ່າເມືອງຂຶ້ນຝລັ່ງ ໄລຍະ 1946-1954.