ກອງປະຊຸມ 4 ຝ່າຍທີ່ຈັດຂຶ້ນຢູ່ເຊີແນວ ປະເທດສະວິດ
(ພາບ: AP)
|
(vovworld)- ເມື່ອສິ້ນສຸດກອງປະຊຸມ 4 ຝ່າຍທີ່ຈັດຂຶ້ນຢູ່ເຊີແນວ ປະເທດສະວິດໃນຕອນຄ່ຳວັນທີ 17/4 ຕາມເວລາຫວຽດນາມ, ຜູ້ຕາງໜ້າລັດເຊຍ, ອາເມລິກາ, ສະຫະພາບເອີລົບ (EU) ແລະລັດຖະບານຊົ່ວຄາວ ຢູແກຼນໄດ້ເຫັນດີເປັນເອກະສັນຮັບຮອງເອົາຖະແຫຼງການຮ່ວມກຳນົດບັນດາບາດກ້າວເດີນລະອຽດທຳອິດແນໃສ່ຫຼຸດຜ່ອນຄວາມເຄັ່ງຕຶ່ງຢູ່ ຢູແກຼນ ດ້ວຍເນື້ອໃນຕົ້ນຕໍ 7 ປະການ.
ຕາມນັ້ນແລ້ວ, ທຸກໆຝ່າຍຄວນຫຼີກເວັ້ນທຸກການກະທຳໃຊ້ກຳລັງອາວຸດ, ນາບຂູ່ຫຼືເກາະຜິດ. ບັນດາຝ່າຍທີ່ເຂົ້າຮ່ວມກອງປະຊຸມເດັດດຽວກ່າວປະນາມ ແລະ ປະຕິເສດທຸກໆປະກົດການໃຊ້ຄວາມຮຸນແຮງ, ຈຳແນກເຊື້ອຊາດຜິວພັນ, ສາສະໜາ. ທຸກໆກຸ່ມປະກອບອາວຸດຜິດກົດໝາຍແມ່ນຕ້ອງວາງອາວຸດ, ບັນດາຕຶກອາຄານຖືກຢຶດຄອງຜິດກົດໝາຍແມ່ນຕ້ອງຖືກສົ່ງຄືນໃຫ້ເຈົ້າຂອງ ຢ່າງຖືກຕ້ອງຕາມກົດໝາຍ, ບັນດາຖະໜົນສາຍຕ່າງໆ, ສະໜາມຫຼວງ ແລະ ບັນດາສະຖານທີ່ສາທາລະນະອື່ນໆຖືກຢຶດຄອງຢ່າງຜິດກົດໝາຍຢູ່ບັນດານະຄອນ, ແລະເຂດຊຸມຊົນຂອງຢູແກຼນ ຕ້ອງໄດ້ຮັບການປົດປ່ອຍ. ຄຳສັ່ງອະໄພຍະໂທດຈະຕ້ອງຮັບປະກັນໃຫ້ບັນດາຜູ້ແຫ່ຂະບວນປະທ້ວງ ອອກຈາກບັນດາຕຶກອາຄານ, ກິດຈະກຳສາທາລະນະອື່ນໆ ແລະ ມອບອາວຸດ. ບັນດາຝ່າຍໄດ້ເປັນເອກະພາບໃຫ້ຄະນະຕິດຕາມກວດກາພິເສດຂອງອົງການປ້ອງກັນຄວາມສະຫງົບ ແລະ ຮ່ວມມືເອີລົບ OSCE ຕ້ອງສວມບົດບາດນຳໜ້າໃນການໜູນຊ່ວຍ ຢູແກຼນ ແລະ ບັນດາປະຊາຄົມທ້ອງຖິ່ນ ຈົ່ງປະຕິບັດບັນດາມາດຕະການຫຼຸດຜ່ອນຄວາມເຄັ່ງຕຶງຢູ່ບັນດາເຂດໂດຍຈຳເປັນກ່ວາໝູ່ໃນຊຸມມື້ທີ່ຈະມາເຖິງ....
ບັນດາຝ່າຍທີ່ເຂົ້າຮ່ວມກອງປະຊຸມໄດ້ເນັ້ນໜັກເຖິງຄວາມສຳຄັນຂອງການສ້າງສະຖຽນລະພາບທາງດ້ານເສດຖະກິດ ແລະ ການເງິນຢູ່ ຢູແກຼນ, ພ້ອມແລ້ວທີ່ຈະປຶກສາຫາລືບັນດາມາດຕະການໜູນຊ່ວຍເພີ່ມເຕີມໃນຂອບເຂດປະຕິບັດບັນດາບາດກ້າວເດີມທີ່ໄດ້ຖືກຍົກອອກມາ.
ປະຊາຄົມສາກົນຮຽກຮ້ອງປະຕິບັດຂໍ້ຕົກລົງ ເຊີແນວກ່ຽວກັບຢູແກຼນ
ພາຍຫລັງ ລັດເຊຍ, ອີຢູ ແລະ ຢູແກຼນ ບັນລຸໄດ້ຂໍ້ຕົກລົງ ເພື່ອແກ້ໄຂວິກິດການຢູ່ ຢູແກຼນ, ຫລາຍປະເທດ ແລະ ອົງການສາກົນ ໄດ້ຊົມເຊີຍຂໍ້ຕົກລົງນີ້ ແລະ ເນັ້ນຫນັກຢ່າງແຮງເຖິງການເຄົາລົບຂໍ້ຕົກລົງນີ້.
ທ່ານເລຂາທິການໃຫຍ່ ສປຊ Ban Ki Moon ປາດຖະຫນາຢາກບັນດາຝ່າຍ ປະຕິບັດຢ່າງເຂັ້ມງວດບັນດາມາດຕະການທີ່ວາງອອກໃນຂໍ້ຕົກລົງ ເຊີແນວ.
ທ່ານ Sergei Lavrov, ລັດຖະມົນຕີການຕ່າງປະເທດ ລັດເຊຍ ຖືວ່າ: ທຸກປະເທດລ້ວນແຕ່ຕ້ອງເຄົາລົບການເລືອກເຟັ້ນເປັນກາງຂອງ ຢູແກຼນ. ສ່ວນບັນດາລັດຖະມົນຕີ ອັງກິດ, ເຢຍລະມັນ, ອີຕາລີ ແລະ ໂຄສົກ Nato ກໍຊົມເຊີຍໝາກຜົນການເຈລະຈາ 4 ຝ່າຍຢູ່ ເຊີແນວ ກ່ຽວກັບຢູແກຼນ ແລະ ຖືວ່າ ນີ້ແມ່ນບາດລ້ຽວໃຫ້ແກ່ວິກິດການ ຢູແກຼນ ແລະ ເນັ້ນຫນັກວ່າ ບັນດາຝ່າຍຄວນປະຕິບັດຂໍ້ຕົກລົງນີ້ໂດຍໄວ.