( vovworld ) – ໂດຍໄດ້ຮັບຄຳເຊື້ອເຊີນຂອງທ່ານປະທານປະເທດ Truong Tan Sang, ທ່ານປະທານາທິບໍດີ ສິງກະໂປ Tony Tan Keng Yam ໄດ້ມາຢ້ຽມຢາມທາງລັດຖະກິດຫວຽດນາມ ແຕ່ວັນທີ 23 – 27/4/2012. ຕອນບ່າຍວັນທີ 23/4 ຢູ່ຮ່າໂນ້ຍ, ພາຍຫຼັງພິທີຕ້ອນຮັບ, ທ່ານປະທານປະເທດ Truong Tan Sang ໄດ້ມີການເຈລະຈາກັບທ່ານປະທານາທິບໍດີ Tony Tan Keng Yam. ການນຳທັງສອງທ່ານໄດ້ສະແດງຄວາມເພິ່ງພໍໃຈຕໍ່ໜ້າການພົວພັນມິດຕະພາບ ແລະ ການຮ່ວມມືຢ່າງຮອບດ້ານລະຫວ່າງສອງປະເທດທີ່ພວມພັດທະນານັບມື້ນັບດີງາມ ແລະ ຮອບດ້ານ, ແລະເຫັນດີເປັນເອກະສັນທີ່ຖືວ່າ, ເລື່ອງການນຳຂັ້ນສູງສອງປະເທດໄປມາຢ້ຽມຢາມເປັນປະຈຳ ໄດ້ສ້າງຄວາມໄວ້ເນື້ອເຊື່ອໃຈ ແລະ ໃກ້ຊິດລະຫວ່າງສອງປະເທດ, ປະກອບສ່ວນຊຸກຍູ້ການພົວພັນໃຫ້ຂຶ້ນສູ່ລະດັບສູງໃໝ່, ມຸ່ງໄປເຖິງການສ້າງການພົວພັນຄູ່ຮ່ວມມືຍຸດທະສາດຫວຽດນາມ - ສິງກະໂປ. ທ່ານປະທານາທິບໍດີ ສິງກະໂປ Tony Tan Keng Yam ຊົມເຊີຍທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ຈະມາຢ້ຽມຢາມສິງກະໂປ ໃນໄລຍະຈະມາເຖິງ. ທ່ານປະທານປະເທດ Truong Tan Sang ຂອບອົກຂອບໃຈ ສິງກະໂປ ທີ່ໄດ້ສະໜັບສະໜູນຫວຽດນາມ ອອກສະໝັກຮັບເລືອກຕັ້ງເຂົ້າສະພາສິດທິມະນຸດສະຫະປະຊາຊາດອາຍຸການ 2014 – 2016 ແລະ ຄະນະກຳມະການບໍ່ປະຈຳການຂອງສະພາຄວາມໝັ້ນຄົງສະຫະປະຊາຊາດອາຍຸການ 2020 – 2021. ການນຳສອງທ່ານຢັ້ງຢືນວ່າ ສອງປະເທດຈະສືບຕໍ່ເພີ່ມທະວີການຮ່ວມມືໃນບັນດາກົນໄກຮ່ວມມືເສດຖະກິດສາກົນຄື APEC, ASEM, ໂດຍສະເພາະແມ່ນ ເມື່ອປະຊາຄົມອາຊຽນ ໄດ້ຮັບການກໍ່ສ້າງໃນປີ 2015. ປະທານາທິບໍດີ Tony Tan Keng Yam ແບ່ງປັນທັດສະນະຂອງຫວຽດນາມ ກ່ຽວກັບບັນຫາທະເລຕາເວັນອອກ; ເຫັນດີສືບຕໍ່ສົມທົບຫຼັກໝັ້ນ, ຮັກສາຄວາມສາມັກຄີອາຊຽນປ ໃນບັນຫານີ້ ເພື່ອພ້ອມກັນຮັບປະກັນຄວາມສະຫງົບ ແລະ ຄວາມເສລີໃນການເດີນທະເລຢູ່ທະເລຕາເວັນອອກ, ບົນພື້ນຖານປະຕິບັດກົດໝາຍສາກົນ, ສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 ແລະ ຖະແຫຼງການກ່ຽວກັບການປະພຶດຕໍ່ຂອງບັນດາຝ່າຍຢູ່ທະເລຕາເວັນອອກ ( DOC ); ກໍ່ສ້າງປະມວນລະບຽບການກ່ຽວກັບການປະພຶດຕໍ່ຢູ່ທະເລຕາເວັນອອກ ( COC ) ໂດຍໄວ.