ການເຈລະຈາຍຸດທະສາດປ້ອງກັນປະເທດຫວຽດນາມ-ສະຫະພັນລັດເຊຍຄັ້ງທີ1
ການເຈລະຈາຂັ້ນຮອງລັດຖະມົນຕີ ກະຊວງປ້ອງກັນປະເທດ ຫວຽດນາມ - ສະຫະພັນ ລັດເຊຍ
(ພາບ: baodatviet.vn)
(vovworld) - ການເຈລະຈາຂັ້ນຮອງລັດຖະມົນຕີປ້ອງກັນປະເທດຄັ້ງທຳອິດລະຫວ່າງ ຫວຽດນາມ ແລະ ສະຫະພັນ ລັດເຊຍ ຖືກຈັດຂຶ້ນເມື່ອວັນທີ 12/12, ຢູ່ນະຄອນຫຼວງ ມົດສະກູ ຂອງສະຫະພັນ ລັດເຊຍ. ຄະນະຜູ້ແທນ ຫວຽດນາມ ໂດຍພົນໂທ ຫງວຽນຈີ໋ວີ້ງ, ຮອງລັດຖະມົນຕີກະຊວງປ້ອງກັນປະເທດເປັນຫົວໜ້າຄະນະ ແລະ ຄະນະຜູ້ແທນກະຊວງປ້ອງກັນປະເທດ ສະຫະພັນ ລັດເຊຍ ໂດຍທ່ານຮອງລັດຖະມົນຕີກະຊວງປ້ອງກັນປະເທດ Anatoly Antonov ນຳໜ້າເຂົ້າຮ່ວມການເຈລະຈາ.
ໃນຂອບເຂດການເຈລະຈາ, 2 ຝ່າຍເຫັນດີເປັນເອກະສັນຕີລາຄາກ່ຽວກັບສະພາບຄວາມໝັ້ນຄົງພາກພື້ນ ອາຊີ - ຕາເວັນອອກສຽງໃຕ້ ແລະ ບັນດາບັນຫາກ່ຽວຂ້ອງເຖິງຜົນປະໂຫຍດ ແລະ ການພົວພັນ 2 ປະເທດ. 2 ຝ່າຍຖືວ່າ: ເພື່ອຮັກສາສັນຕິພາບ, ສະຖຽນລະພາບ ຢູ່ພາກພື້ນຄວນເພີ່ມທະວີບັນດາກົນໄກຮ່ວມມື 2 ຝ່າຍ ແລະ ພາກພື້ນ, ພິເສດແມ່ນບັນດາກົນໄກເຈລະຈາ, ສ້າງຄວາມໄວ້ເນື້ອເຊື່ອໃຈຍຸດທະສາດ ແລະ ຍູ້ແຮງບັນດາການເຄື່ອນໄຫວການທູດປ້ອງກັນ, ກໍ່ຄືບັນດາມາດຕະການສະກັດກັ້ນ, ຄວບຄຸມການປະທະກັນຢູ່ພາກພື້ນ.
ກ່ຽວກັບການຮ່ວມມື 2 ຝ່າຍໃນຂົງເຂດປ້ອງກັນປະເທດ, ຮອງລັດຖະມົນຕີ ຫວຽດນາມ ແລະ ສະຫະພັນ ລັດເຊຍ ເຫັນດີເປັນເອກະສັນຄວນຍູ້ແຮງການຮ່ວມມືໃນທຸກດ້ານຄື: ແລກປ່ຽນຄະນະທຸກຂັ້ນ, ເພີ່ມທະວີການຮ່ວມມືກ່ຽວກັບທະຫານເຮືອ, ບຳລຸງສ້າງ, ກໍ່ຄືການຮ່ວມມືຄົ້ນຄ້ວາຍຸດທະສາດ, ຮ່ວມມືດ້ານວິທະຍາສາດ - ເຕັກນິກ ແລະ ເຕັກໂນໂລຊີການທະຫານລະຫວ່າງ 2 ປະເທດໃນຊຸມປີຕໍ່ໄປ. 2 ຝ່າຍເຫັນດີເປັນເອກະສັນດຳເນີນການເຈລະຈາຍຸດທະສາດປ້ອງກັນປະເທດຄັ້ງທີ 2 ຢູ່ ຮ່າໂນ້ຍ ໃນປີ 2014.