(vovworld) - ຕອນເຊົ້າວັນທີ 11/03, ຢູ່ສຳນັກຫ້ອງວ່າການສະພາແຫ່ງຊາດ, ຄະນະສະມາຊິກສະພາແຫ່ງຊາດຫວຽດນາມ ໂດຍທ່ານນາງ ຕ່ອງທິຟອງ, ກຳມະການກົມການເມືອງ, ຮອງປະທານສະພາແຫ່ງຊາດ ໄດ້ເປັນປະທານການເຈລະຈາກັບຄະນະສະມາຊິກສະພາແຫ່ງຊາດຂັ້ນສູງ ສປປ ລາວ ໂດຍທ່ານ ສົມພັນ ແພງຄຳມີ, ກຳມະການສູນກາງພັກ, ຮອງປະທານສະພາແຫ່ງຊາດນຳໜ້າ, ພວມມີການຢ້ຽມຢາມ ແລະ ເຮັດວຽກຢູ່ຫວຽດນາມ.
ທີ່ການເຈລະຈາ, 2 ຝ່າຍໄດ້ແລກປ່ຽນບັນດາຂໍ້ກຳນົດທີ່ກ່ຽວຂ້ອງເຖິງໜ້າທີ່, ຂອບເຂດສິດອຳນາດ ແລະ ໜ້າທີ່ໃນການຈັດຕັ້ງ, ການເຄື່ອນໄຫວຂອງສະພາປະຊາຊົນຢ່າງລະອຽດ; ໂຄງປະກອບອົງການຈັດຕັ້ງ ແລະ ບຸກຄະລາກອນສະພາປະຊາຊົນ; ກ່ຽວກັບລະບົບກົງຈັກການຈັດຕັ້ງຂອງຫ້ອງການສະພາປະຊາຊົນແຂວງ, ນະຄອນ ແລະ ຄະນະສະມາຊິກສະພາແຫ່ງຊາດ. ໃນການຢ້ຽມຢາມ ແລະ ເຮັດວຽກຢູ່ຫວຽດນາມ, ຄະນະສະມາຊິກສະພາແຫ່ງຊາດ ສປປ ລາວ ລົງໄປສຳຫຼວດຕົວຈິງຢູ່ບາງແຂວງ, ນະຄອນ ເພື່ອຊອກຮູ້ກ່ຽວກັບສະພາປະຊາຊົນທຸກຂັ້ນ.
ແລະກໍ່ໃນຕອນບ່າຍວັນດຽວກັນ, ທີ່ການຕ້ອງຮັບທ່ານຮອງປະທານສະພາແຫ່ງຊາດລາວ ສົມພັນ ແພງຄຳມີ, ທ່ານປະທານປະເທດຫວຽດນາມ ເຈືອງເຕີນຊາງ ເນັ້ນໜັກວ່າ ໃນປີຜ່ານມາ, ການພົວພັນລະຫວ່າງ 2 ປະເທດໄດ້ມີບາດກ້າວພັດທະນາຢ່າງກະໂດດຂັ້ນ. ພ້ອມກັບບັນດາການແລກປ່ຽນຄະນະຜູ້ແທນຂັ້ນສູງ, ບັນດາກະຊວງ, ຂະແໜງການ, ທ້ອງຖິ່ນຕ່າງໆລະຫວ່າງ 2 ປະເທດ ເຊິ່ງໄດ້ຮັບການປະຕິບັດເປັນປະຈຳ, ຮ່ວມມືຢ່າງແໜ້ນແຟ້ນບົນເວທີປາໄສພາກພື້ນ ແລະ ສາກົນ, ການຮ່ວມມືດ້ານເສດຖະກິດລະຫວ່າງ 2 ປະເທດ ໄດ້ຮັບການຍູ້ແຮງຢ່າງບໍ່ຢຸດຢັ້ງ. ທ່ານປະທານປະເທດ ເຈືອງເຕີນຊາງ ໄດ້ຊົມເຊີຍເລືອງ ສປປ ລາວ ໃນປີຜ່ານມາໄດ້ຮັກສາເສດຖະກິດມະຫາພາກເປັນປົກກະຕິ ແລະ ບັນລຸການເຕີບໂຕດີພໍສົມຄວນ. ທ່ານປະທານປະເທດ ຖືວ່າ, ໃນໄລຍະຜ່ານມາ, ລາວ ໄດ້ເປັນປະທານບັນດາກອງປະຊຸມໃຫຍ່ ແລະ ນັບມື້ນັບຢືນຢັນໄດ້ບົດບາດຂອງຕົນໃນພາກພື້ນ.
ທ່ານຮອງປະທານສະພາແຫ່ງຊາດລາວ ສົມພັນ ແພງຄຳມີ ເນັ້ນໜັກເຖິງຈຸດປະສົງຂອງຄະນະປະຕິບັດງານມາຫວຽດນາມ ຄັ້ງນີ້ແມ່ນເພື່ອພົວພັນແລກປ່ຽນບົດຮຽນກ່ຽວກັບການເຄື່ອນໄຫວນິຕິບັດຍັດ, ພ້ອມທັງຊອກຮູ້ສະພາບຕົວຈິງຮູບແບບການເຄື່ອນໄຫວຂອງສະພາປະຊາຊົນຢູ່ບັນດາທ້ອງຖິ່ນຢູ່ຫວຽດນາມ, ຜ່ານນັ້ນຮັບເອົາບັນດາບົດຮຽນທີ່ລ້ຳຄ່າ ເພືອ່ກະກຽມໃຫ້ວິວັດການເລືອກຕັ້ງສະພາປະຊາຊົນ ທີ່ຈະມາເຖິງຢູ່ລາວ.