(vovworld) – ຕອນບ່າຍວັນທີ 26/3, ຢູ່ສູນສື່ສານກອງປະຊຸມໃຫຍ່ແຫ່ງຊາດ ຮ່າໂນ້ຍ, ທ່ານປະທານສະພາແຫ່ງຊາດ ຫງວຽນຊິງຮູ່ງ, ປະທານ IPU ຫວຽດນາມ, ທ່ານປະທານ IPU Saber Choudhury, ທ່ານເລຂາທິການໃຫຍ່ IPU Martin Chungong ເປັນປະທານຮ່ວມການປະຊຸມຂ່າວສາກົນ, ເພື່ອແນໃສ່ສະໜອງຂໍ້ມູນຂ່າວໃຫ້ແກ່ບັນດາອົງການສື່ມວນຊົນພາຍໃນ ແລະ ຕ່າງປະເທດກ່ຽວກັບເນື້ອໃນຂອງກອງປະຊຸມໃຫຍ່ສະຫະພັນລັດຖະສະພາສາກົນຄັ້ງທີ 132 (IPU 132), ຈັດຕັ້ງຢູ່ຮ່າໂນ້ຍ, ຫວຽດນາມ ແຕ່ວັນທີ 28/3 – 1/4.
ກ່າວຄຳເຫັນຊົມເຊີຍທີ່ການປະຊຸມຂ່າວ, ທ່ານປະທານສະພາແຫ່ງຊາດ ຫງວຽນຊິງຮູ່ງ ຢັ້ງຢືນວ່າ: IPU 132 ແມ່ນເຫດການການເມືອງສຳຄັນໃນປະຫວັດການທູດລັດຖະສະພາຂອງ ຫວຽດນາມ ເວົ້າສະເພາະ, ການທູດ ຫວຽດນາມ ເວົ້າລວມ. ນີ້ທັງແມ່ນຄວາມເປັນກຽດທັງແມ່ນຄວາມຮັບຜິດຊອບຂອງສະພາແຫ່ງຊາດ ຫວຽດນາມ. ດັ່ງນັ້ນ, ຫວຽດນາມ ໄດ້ກຽມພ້ອມໃຫ້ IPU 132 ແລະ ໃຫ້ຄຳໝັ້ນສັນຍາຈະມານະພະຍາຍາມຈົນສຸດຄວາມສາມາດຂອງຕົນໃຫ້ແກ່ຜົນສຳເລັດຂອງເຫດການສຳຄັນນີ້.
ທ່ານປະທານ IPU Saber Choudhury ແລະ ທ່ານເລຂາທິການໃຫຍ່ IPU Martin Chungong ລ້ວນແຕ່ຕີລາຄາສູງຫົວຂໍ້ຂອງກອງປະຊຸມ IPU 132 ຄັ້ງນີ້, ຖືວ່ານີ້ແມ່ນຫົວຂໍ້ມີລັກສະນະຈຸດສຸມ, ທັງຕີລາຄາໝາກຜົນແຫ່ງການປະຕິບັດຄາດໝາຍສະຫັດສະວັດເຊິ່ງບັນດາສະມາຊິກ ສະຫະປະຊາຊາດໄດ້ໃຫ້ຄຳໝັ້ນສັນຍາຢ່າງແຮງໃນປີ 2000, ທັງວາງອອກບັນດາຂອບເຂດໃຫ້ແກ່ການພັດທະນາຕໍ່ໄປ. ທ່ານປະທານ IPU Saber Choudhury, ຢັ້ງຢືນວ່າ:
“ຫົວຂໍ້ຂອງກອງປະຊຸມຈະສະແດງໃຫ້ເຫັນຜ່ານຖະແຫຼງການຮ່າໂນ້ຍ. ນີ້ແມ່ນຖະແຫຼງການຮ່ວມຂອງກອງປະຊຸມ ແລະ ຈະໄດ້ສົ່ງເຖິງກອງປະຊຸມຂອງສະຫະປະຊາຊາດ ເຊິ່ງຈະດຳເນີນໄປໃນເດືອນ 9 ຈະມາເຖິງ. ຫວຽດນາມ ມີບົດບາດສຳຄັນໃນການປະຕິບັດບັນດາຄາດໝາຍສະຫັດສະວັດ ແລະ ປະຊາຄົມໂລກໄດ້ຮັບຮູ້ແລ້ວ. ພວກຂ້າພະເຈົ້າປິຕິຊົມຊື່ນທີ່ສຸດເມື່ອໄດ້ຮ່ວມມືກັບສະພາແຫ່ງຊາດ ຫວຽດນາມ. ຫວຽດນາມ ໄດ້ປະຕິບັດວຽກງານກະກຽມຢ່າງລອບຄອບຖີ່ຖ້ວນ. ພວກຂ້າພະເຈົ້າຮູ້ສຶກເອກອ້າງທະນົງໃຈ ແລະ ມ່ວນຊື່ນເມື່ອມີໜ້າຢູ່ ຫວຽດນາມ ເພື່ອແບ່ງປັນບົດຮຽນກໍ່ຄືຮ່ຳຮຽນເອົາບົດຮຽນຂອງ ຫວຽດນາມ ເພື່ອຈຸດໝາຍລວມ”
ສະແດງຄວາມນັບຖືເມື່ອເຫັນວ່າ ອັດຕາສ່ວນສະມາຊິກສະພາແຫ່ງຊາດຍິງຂອງ ຫວຽດນາມ ແມ່ນຂຶ້ນເຖິງ 25%, ທ່ານປະທານ IPU Saber Choudhury ຫວັງວ່າ: IPU 132 ຈັດຕັ້ງຢູ່ ຫວຽດນາມ ຈະແມ່ນບ່ອນເພື່ອໃຫ້ສະມາຊິກສະພາແຫ່ງຊາດບັນດາປະເທດແບ່ງປັນບົດຮຽນ, ພິເສດແມ່ນທາບທາມຮູບແບບຈາກ ຫວຽດນາມ ເພື່ອໃຫ້ IPU 132 ກາຍເປັນຂີດໝາຍຊຸກຍູ້ຈຸດໝາຍຄວາມສະເໝີພາບລະຫວ່າງ ຍິງ - ຊາຍໃນໄລຍະຈະມາເຖິງ. ກ່ຽວກັບບັນຫານີ້, ທ່ານປະທານສະພາແຫ່ງຊາດ ຫງວຽນຊິງຮູ່ງ, ໃຫ້ຮູ້ຕື່ມອີກວ່າ:
“ຢູ່ ຫວຽດນາມ, ໃນການສ້າງກົດໝາຍ, ພວກຂ້າພະເຈົ້າຍາມໃດກໍ່ຕ້ານຄືນບັນດາຂໍ້ກຳນົດທີ່ສົ່ງຜົນສະທ້ອນບໍ່ດີເຖິງແມ່ຍິງ ແລະ ເດັກນ້ອຍ. ອາຍຸການຈະມາເຖິງ, ສະພາແຫ່ງຊາດ ຫວຽດນາມ ຈະມານະພະຍາຍາມເພີ່ມອັດຕາສ່ວນສະມາຊິກສະພາແຫ່ງຊາດຍິງຂຶ້ນ 30%. ທ່ານປະທານ ໂຮ່ຈີມິນຂອງພວກຂ້າພະເຈົ້າໄດ້ເວົ້າວ່າ: ຖ້າຫາກປົດປ່ອຍປະເທດຊາດ, ນຳມາເຊິ່ງເອກະລາດ, ເສລີພາບ, ຄວາມອີ່ມໜຳສຳລານແລ້ວ ແຕ່ບໍ່ທັນປົດປ່ອຍແມ່ຍິງແມ່ນມີແຕ່ປົດປ່ອຍໄດ້ເຄິ່ງໜຶ່ງເທົ່ານັ້ນ.”