(vovworld) – ຕໍ່ໜ້າຂ່າວອັດປະຕູການເຄື່ອນໄຫວດ່ານຊາຍແດນລະຫວ່າງຫວຽດນາມ - ຈີນ, ບັນດານັກຂ່າວວິທະຍຸກະຈາຍສຽງຫວຽດນາມ ປະຈຳແຂວງກວາງນິງ ໄດ້ໄປເຖິງບັນດາດ່ານຊາຍແດນຄື: ແຮ່ວງໂມ, ບັ໋ກຟອງຊິງ, ບັ໋ກລວນ, ລຸກເລີ່ມ, ລຸກຈັ໋ນ… ເຊິ່ງນອນໃນເຂດຊາຍແດນຂຶ້ນກັບແຂວງກວາງນິງ ເພື່ອຊອກຮູ້. ບັນຍາກາດ ແລະ ຊີວິດການເປັນຢູ່ ຢູ່ເຂດຊາຍແດນໃນຊຸມມື້ຜ່ານມາຍັງດຳເນີນໄປເປັນປົກກະຕິ.
ຢູ່ດ່ານຊາຍແດນ ແຮ່ວງໂມ, ເມືອງບິ່ງລຽວ, ແຂວງກວາງນິງ, ສະເພາະໃນຕອນເຊົ້າວັນທີ 21/05, ມີລົດຄອນແຕນເນີ 15 ຄັນຂົນສົ່ງສິນຄ້າເຄື່ອງຂອງ, ດ້ວຍບັນດາຜະລິດຕະພັນຕົ້ນຕໍ່ແມ່ນຜະລິດຕະພັນກະສິກຳ ແລະ ຕົນໄມ້ອຸດສາຫະກຳ. ທ່ານເລແທ່ງຮຶງ, ຫົວໜ້າກອງຮັບຜິດຊອບດ້ານລະບຽບການສົ່ງອອກ, ນຳເຂົ້າສິນຄ້າ, ກົມພາສີແຮ່ວງໂມ, ເມືອງບິ່ງລຽວ ໃຫ້ຮູ້ວ່າ.
“ໃນຊຸມມື້ຜ່ານມາ, ການສົ່ງອອກ, ນຳເຂົ້າຜ່ານດ່ານຊາຍແດນ ແຮ່ວງໂມ ແລະ ດົງຈຸງ ຝ່າຍຈີນ ຍັງດຳເນີນໄປເປັນປົກກະຕິ. ສິນຄ້າສົ່ງອອກຍັງແມ່ນເຄື່ອງແຊ່ເຢັນ, ສ່ວນນຳເຂົ້າແມ່ນບັນດາຜະລິດຕະພັນນຳໃຊ້ປະຈຳວັນ. ພໍ່ແມ່ປະຊາຊົນ 2 ປະເທດຍັງໄປມາຜ່ານດ່ານຊາຍແດນເພື່ອທຳການຄ້າຂາຍເປັນປົກກະຕິ”.
ສ່ວນດ່ານຊາຍແດນ ບັ໋ກຟອງຊິງ - ລິ໋ຫວາ ໃນຊຸມມື້ຜ່ານມາ, ການແລກປ່ຽນຄ້າຂາຍໄດ້ດຳເນີນໄປຢ່າງຟົດຟື້ນ. ຕາມບົດລາຍງານຂອງກົມພາສີບັ໋ກຟອງຊິງ ແລ້ວ, ໃນ 20 ມືຕົ້ນເດືອນ 05 ນີ້, ຍອດມຸນຄ່າໄດ້ຈາກການເກັບພາສີຜ່ານດ່ານຊາຍແດນບັນລຸ 6,24 ຕື້ດົງ, ເພີ່ມຂຶ້ນ 147% ເມື່ອທຽບໃສ່ເດືອນ 04/2014.
ບໍ່ພຽງແຕ່ດ້ານການຄ້າ, ບັນດາຂະແໜງທ່ອງທ່ຽວ, ການບໍລິການ, ການຜະລິດຍັງດຳເນີນໄປເປັນປົກກະຕິ. ແຂກທ່ອງທ່ຽວຈາກຈີນ ມາ ມ໋ອງກ໋າຍ ຍັງຄືເກົ່າ ດ້ວຍຈຳນວນເກືອບ 200 ຄົນໃນແຕ່ລະມື້ ແລະ ຈັດຕັ້ງບັນດາລາຍການທ່ອງທ່ຽວຢ້ຽມຢາມອ່າວຫ້າລອງ. ທ່ານຫງວຽນຮົ່ງເຊີນ, ຮອງຜູ້ອຳນວຍການໃຫຍ່ໂຮງແຮມສາກົນ ເລີ້ຍລາຍ ໃຫ້ຮູ້ວ່າ.
“ນັບແຕ່ຕົ້ນເດືອນ 05 ມາຮອດປະຈຸບັນ, ແຂກທ່ອງທ່ຽວມາພັກເຊົ່າໂຮງແຮມຍັງມີຢູ່ສະເໝີ, ປະມານ 3000 ຄົນ/ເດືອນ. ແຂກທ່ອງທ່ຽວມາເຊົ້າໂຮງແຮມສ່ວນຫຼາຍມາຈາກຈີນ ໄດ້ກວມເອົາ 70%. ຄາດວ່າໃນໄລຍະຈະມາເຖິງ ພວກຂ້າພະເຈົ້າຈະຂະຫຍາຍຫ້ອງພັກເຕີມອີກ 100 ຫ້ອງ ເພື່ອຮັບໃຊ້ແຂກທ່ອງທ່ຽວ”.
ຕາມແຫຼ່ງຂ່າວຈາກກົມພາສີດ່ານຊາຍແດນ ລາວກາຍ, ວົງເງິນສົ່ງອອກ, ນຳເຂົ້າໃນ 5 ເດືອນຕົ້ນປີບັນລຸ 219 ລ້ານ USD, ເພີ່ມຂຶ້ນ 59% ເມື່ອທຽບໃສ່ໄລຍະດ່ຽວກັນຂອງປີ 2013.