ທ່ານນາງ ເລລີງລານ, ເອກອັກຄະລັດຖະທູດ ຫວຽດນາມ ປະຈຳ ເມັກຊີໂກ
(ພາບ: Việt Hòa-Việt Hùng/Vietnam+) |
(vovworld) – ການໂອ້ລົມສົນທະນາກ່ຽວກັບນະໂຍບາຍການຕ່າງປະເທດ ແລະ ວິວັດທະນາການເຊື່ອມໂຍງເຂົ້າກັບສາກົນຂອງ ຫວຽດນາມ - ໂດຍສະຖານທູດ ຫວຽດນາມ ປະຈຳ ເມກຊີໂກ ຈັດຕັ້ງຢູ່ນະຄອນຫຼວງ ເມັກຊີໂກ ກີຕີ, ໃນວັນທີ 30/3, ດ້ວຍການເຂົ້າຮ່ວມຂອງຄູ່ອາຈານ, ນັກສຶກສາພະແນກເສດຖະກິດ, ສູນຄົ້ນຄ້ວາ ເມກຊີໂກ - ອາຊີ ແລະ ສູນ ເມັກຊີໂກ - ຈີນ. ນະທີ່ນີ້, ທ່ານນາງ ເລລີງລານ, ເອກອັກຄະລັດຖະທູດ ຫວຽດນາມ ປະຈຳ ເມັກຊີໂກ ໄດ້ທົບທວນຄືນຂີດໝາຍຕົ້ນຕໍໃນວິວັດທະນາການ ຫວຽດນາມ ເຊື່ອມໂຍງເຂົ້າກັບພາກພື້ນ ແລະ ສາກົນ, ພິເສດແມ່ນທີ່ຕັ້ງ ແລະ ການເຂົ້າຮ່ວມຢ່າງຕັ້ງໜ້າຂອງ ຫວຽດນາມ ເຂົ້າສະຫະສະມາຄົມປະຊາຊາດອາຊີ ຕາເວັນອອກສ່ຽງໃຕ້ (ອາຊຽນ), ເນັ້ນໜັກເຖິງບັນດາຜົນງານໃນວຽກງານການຕ່າງປະເທດ ແລະ ຜົນງານໃນການພັດທະນາເສດຖະກິດ - ສັງຄົມ ອັນໃຫຍ່ຫຼວງຂອງ ຫວຽດນາມ ໃນຊຸມປີຜ່ານມາ. ທ່ານນາງເອກອັກຄະລັດຖະທູດ ເລລີງລານ ຢັ້ງຢືນແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມື ແລະ ພັດທະນາ, ນະໂຍບາຍການຕ່າງປະເທດເປີດກ້ວາງ, ເປັນຫຼາຍຮູບຫຼາຍແບບ ແລະ ມີຫຼາຍຝ່າຍ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງຖືກຕ້ອງຂອງ ຫວຽດນາມ. ຫວຽດນາມ ກໍ່ເປັນເຈົ້າການເລືອກເຟັ້ນການເຂົ້າຮ່ວມບັນດາກົນໄກ, ເວທີປາໄສພາກພື້ນ ແລະ ທົ່ວໂລກເພື່ອຮັບໃຊ້ໃຫ້ຜົນປະໂຫຍດຂອງປະເທດຊາດ, ຂອງປະຊາຊົນໃຫ້ດີທີ່ສຸດໂດຍຜ່ານບັນດາລັດຖະນະໂຍບາຍໃຫຍ່ກ່ຽວກັບການຕ່າງປະເທດຄືຫັນການພົວພັນເປັນປົກກະຕິກັບ ຈີນ, ອາເມລິກາ, ເຂົ້າຮ່ວມ ອາຊຽນ, ອົງການການຄ້າໂລກ (WTO), ເຂົ້າຮ່ວມການເຈລະຈາສັນຍາຄູ່ຮ່ວມມືເສດຖະກິດຂ້າມ ປາຊີຟິກ (TPP).