ກຳປັ່ນຈີນໄດ້ປິດລ້ອມ ຊາວປະມົງແລະກີດ ຂວາງກຳປັ່ນປະຕິບັດ ກົດໝາຍຫວຽດນາມ
(ພາບ: vov)
(vovworld)- ວັນທີ 19/5, ຈີນ ໄດ້ເພີ່ມຈຳນວນກຳປັ່ນຢູ່ອ້ອມແອ້ມບໍລິເວນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ຕື່ມອີກ 2 ລຳເມື່ອທຽບກັບໄລຍະກ່ອນ, ອັນໄດ້ຍົກ ຈຳນວນກຳປັ່ນທັງໝົດຂຶ້ນເຖິງ 136 ລຳຢູ່ບໍລິເວນດັ່ງກ່າວ, ໃນນັ້ນມີກຳປັ່ນສູ້ຮົບ 4 ລຳ, ກຳປັ່ນຂົນສົ່ງ 1 ລຳ. ຕາມທ່ານຫງວຽນວັນຈຸງ, ຮອງຫົວໜ້າກົມກວດກາການປະມົງ, ກະຊວງກະສິກຳ ແລະ ພັດທະນາຊົນນະບົດຫວຽດນາມ ແລ້ວ, ບັນດາກຳປັ່ນປະຕິບັດກົດໝາຍຂອງຫວຽດນາມ ຍັງສືບຕໍ່ຕິດຕາມເຫດການ ແລະ ໜູນຊ່ວຍບັນດາກຳປັ່ນຫາປາ ແລະ ຊາວປະມົງຫວຽດນາມ, ຮັບປະກັນຄວາມປອດໄພໃຫ້ແກ່ຄົນ ແລະ ຍານພາຫະນະພວມເຄື່ອນໄຫວຢູ່ເຂດຫາປາທີ່ມີມາແຕ່ດົນນານຂອງຫວຽດນາມ ແລະ ໂຄສະນາ, ຮຽກຮ້ອງໃຫ້ຈີນ, ຖອນຮ້ານເຈາະນ້ຳມັນ, ກຳປັ່ນປ້ອງກັນພວກເຄື່ອນໄຫວຢ່າງຜິດກົດໝາຍ ໃນເຂດເສດຖະກິດຈຳເພາະຂອງຫວຽດນາມ. ທ່ານຫງວຽນວັນຈຸງ, ຮອງຫົວໜ້າກົມກວດກາ ການປະມົງ ໃຫ້ຮູ້ວ່າ:
“ກຳປັ່ນຂອງຈີນ ໄດ້ເຕົ້າໂຮມເປັນກຸ່ມແຕ່ 5-10 ລຳ, ສົມທົບກັບກຳປັ່ນຫາປາຫຸ້ມເຫຼັກ ແນໃສ່ປິດລ້ອມ, ຕັ້ງໃຈສິດນ້ຳ ແລະ ພ້ອມແລ້ວທີ່ຈະຕຳໃສ່ກຳປັ່ນຫາປາ ແລະ ກຳປັ່ນປະຕິບັດກົດໝາຍຫວຽດນາມ ໃນບໍລິເວນຫ່າງຈາກຮ້ານເຈາະນ້ຳມັນແຕ່ 5-7 ໄມທະເລ. ກຳປັ່ນຫາປາຂອງຈີນ ມີຂະໜາດໃຫ່ຍ, ຄວາມແຮງຂອງເຄື່ອງຈັກສູງໄດ້ລຽນແຖວເປັນຂວາງສະກັດກັ້ນກຳປັ່ນປະຕິບັດກົດໝາຍຫວຽດນາມ. ກຳປັ່ນຂອງຈີນ ປະມານ 30 ລຳໄດ້ເປັນເຈົ້າການປິດລ້ອມ, ຕຳ, ນາບຂູ່ກຳປັ່ນຫາປາຂອງຊາວປະມົງຫວຽດນາມ. ແຕ່ເຖິງແນວນັ້ນກໍ່ຕາມ, ຊາວປະມົງຫວຽດນາມ ຍັງເດັດດ່ຽວເດີນຕາມອາຊີບການປະມົງຢູ່ເຂດຫາປາທີ່ມີມາແຕ່ດົນນານຂອງຕົນ ສືບຕໍ່ຫາປາເປັນປົກກະຕິ“./.