ທ່ານປະທານປະເທດ ເຈືອງເຕິ໋ນຊາງ ແລະ ທ່ານປະທານາທິບໍດີ ອິນໂດເນເຊຍ Susilo Bambang Yuldoyono
(vovworld) – ຕອນຄຳ່ວັນທີ 28/6, ທ່ານປະທານປະເທດ ເຈືອງເຕິ໋ນຊາງ ແລະ ຄະນະຜູ້ແທນຂັ້ນສູງຫວຽດນາມ ໄດ້ກັບມາຮອດຮ່າໂນ້ຍ, ສິ້ນສຸດການຢ້ຽມຢາມລັດຖະກິດເຖິງອິນໂດເນເຊຍ ຢ່າງເປັນທາງການ. ການຢ້ຽມຢາມເປັນຂີດໝາຍປະຫວັດສາດໃໝ່ ຍົກການພົວພັນຄູ່ຮ່ວມມືຍຸດທະສາດລະຫວ່າງສອງປະເທດຂຶ້ນສູ່ລະດັບສູງໃໝ່. ພ້ອມທັງຊຸກຍູ້ການຮ່ວມມືໃນກຸ່ມອາຊຽນ ເພື່ອສັນຕິພາບ ການພັດທະນາໃນພາກພື້ນ. ກ່ຽວກັບໝາກຜົນຂອງການຢ້ຽມຢາມ, ທ່ານລັດຖະມົນຕີການຕ່າງປະເທດ ຟ້າມບິ່ງມິງ, ຢືນຢັນວ່າ:
“ໃນການຢ້ຽມຢາມອິນໂດເນເຊຍ ຂອງທ່ານປະທານປະເທດ ແລະ ໃນການພົບປະເຈລະຈາ, ການແລກປ່ຽນຕ່າງໆ ກັບບັນດາການນຳອິນໂດເນເຊຍ, ສາມາດເຫັນໄດ້ວ່າ ສອງປະເທດໄດ້ເປັນເອກະພາບສູງໃນບັນດາບັນຫາສອງຝ່າຍ ກໍ່ຄືການຮ່ວມມືສົມທົບກັນໃນເວທີປາໄສຫຼາຍຝ່າຍ. ສອງປະເທດເປັນເອກະພາບເຮັດໃຫ້ການພົວພັນສອງຝ່າຍມີຄວາມເລິກເຊິ່ງກວ່າອີກ ແລະ ການພົວພັນຄູ່ຮ່ວມມືຍຸດທະສາດນີ້ ກໍ່ແມ່ນກາລະໂອກາດ, ແມ່ນບາດກ້າວພັດທະນາໃໝ່ເພື່ອຮັດແໜ້ນການພົວພັນທີ່ໃກ້ຊິດ, ສະໜິດສະໜົມ, ໄວ້ເນື້ອເຊື່ອໃຈ ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບຂອງພາກພື້ນ“.
ພິເສດໃນການເຈລະຈາລະຫວ່າງບັນດາກະຊວງ, ຂະແໜງການຕ່າງໆ, ຫວຽດນາມ ແລະ ອິນໂດເນເຊຍ ໄດ້ເປັນເອກະພາບຍູ້ແຮງການຜັນຂະຫຍາຍບົດບັນທຶກຊ່ວຍຈຳກ່ຽວກັບການຮ່ວມມືດ້ານທະເລ ແລະ ອາຊີບການປະມົງ. ສອງຝ່າຍໄດ້ເຫັນດີຍົກມາດຕະການຊົ່ວຄາວສຳລັບບັນຫາແບ່ງກຳນົດເຂດເສດຖະກິດພິເສດ, ແນໃສ່ສ້າງເງື່ອນໄຂໃຫ້ແກ່ການເຄື່ອນໄຫວການປະມົງ, ໃນຂະນະທີ່ຍັງສືບຕໍ່ເຈລະຈານຳກັນເພື່ອບັນລຸມາດຕາການສຸດທ້າຍ. ທ່ານຮອງລັດຖະມົນຕີກະຊວງກະສີກຳ ແລະ ພັດທະນາຊົນນະບົດ ຫວູວັນຕ໋າມ, ໃຫ້ຮູ້ວ່າ:
“ພວກເຮົາມີຂໍ້ຕົກລົງກັບ ອິນໂດເນເຊຍ, ກ່ອນອື່ນໝົດແມ່ນແລກປ່ຽນຂໍ້ມູນຂ່າວສານກ່ຽວກັບ ອາຊີບປະມົງ. ພວກເຮົາມີຂໍ້ຕົກລົງບັນດາກໍລະນີທີ່ກຳປັ່ນຫາປາຂອງ ຫວຽດນາມ ລະເມີດເຂດທະເລຂອງ ອິນໂດເນເຊຍ ແມ່ນຈະໄດ້ຮັບການແກ້ໄຂບົນຈິດໃຈມະນຸດສະທຳ, ມິດຕະພາບ. ໂດຍຜ່ານເນື້ອໃນການເຈລະຈາລະຫວ່າງທ່ານປະທານປະເທດ ແລະ ທ່ານປະທານາທິບໍດີ ອິນໂດເນເຊຍ, ຫວັງວ່າ, ໃນໄລຍະຈະມາເຖິງ, ພວກເຮົາຈະຜັນຂະຫຍາຍຫຼາຍມາດຕະການເພື່ອສະກັດກັ້ນສະພາບການຫາປາຢ່າງຜິດກົດໝາຍ, ດ້ານອື່ນ, ຈັດຕັ້ງໃຫ້ບັນດາວິສາຫະກິດ ຫວຽດນາມ ຮ່ວມທຸລະກິດກັບວິສາຫະກິດ ອິນໂດເນເຊຍ ເພື່ອໃຫ້ຊາວປະມົງ ແລະ ກຳປັ່ນຂອງພວກເຮົາໄດ້ໄປຂຸດຄົ້ນສິນທະເລຢູ່ເຂດທະເລຂອງ ອິນໂດເນເຊຍ ຢ່າງຖືກຕ້ອງຕາມກົດໝາຍ ແລະ ມີປະສິດທິຜົນກ່ວາ.”
ພ້ອມກັບການບັນລຸໄດ້ໝາກຜົນສຳຄັນກ່ຽວກັບດ້ານເສດຖະກິດ, ການຄ້າ, ການຢ້ຽມຢາມຂອງທ່ານປະທານປະເທດ ກໍ່ເປີດໄລຍະໃໝ່ໃນການຮ່ວມມີປ້ອງກັນຊາດ - ປ້ອງກັນຄວາມສະຫງົບ. ພ້ອມທັງຢືນຢັນຄືນໃໝ່ຄວາມສຳຄັນຂອງສັນຕິພາບ, ສະຖຽນລະພາບ, ຄວາມປອດໄພ ແລະ ຄວາມເສລີໃນການເດີນທະເລຢູ່ທະເລຕາເວັນອອກ, ແກ້ໄຂການພິພາດກັນດ້ວຍສັນຕິວິທີ.
ຈຸດພົ້ນເດັ່ນໃນການຢ້ຽມຢາມຄັ້ງນີ້ ແມ່ນບົດປາໄສທີ່ສຳຄັນຂອງປະທານປະເທດຢູ່ສຳນັກງານຄະນະເລຂາອາຊຽນ. ນີ້ແມ່ນເທື່ອທຳອິດທີ່ປະທານປະເທດ ເຈືອງເຕິ໋ຊາງ ມາຢ້ຽມຢາມສຳນັກງານຄະນະເລຂາອາຊຽນ, ອັນໄດ້ຢືນຢັນການຖືເປັນສຳຄັນທີ່ຕັ້ງບຸລິມາສິດອັນດັບໜຶ່ງຂອງອາຊຽນໃນນະໂຍບາຍພົວພັນຕ່າງປະເທດຂອງຫວຽດນາມທີ່ມີຕໍ່ພາກພື້ນ