ຂະແໜງສ່ວຍສາອາກອນຕອບສະໜອງບັນດາຄຳຮຽກຮ້ອງເຊື່ອມໂຍງແລະພັດທະນາເສດຖະກິດ-ສັງຄົມຂອງປະເທດຊາດ
ທ່ານນາຍົກລັດຖະມົນຕີ ຫງວຽນເຕີນຢູ້ງ ເຮັດວຽກກັບການນຳຫຼັກແຫຼ່ງກົມໃຫຍ່ພາສີ
(ພາບ: thoibaotaichinhvietnam.vn)
(vovworld) – ກ່າວຄຳເຫັນທີ່ການເຮັດວຽກກັບການນຳຫຼັກແຫຼ່ງກົມໃຫຍ່ສ່ວຍສາອາກອນ ໃນວັນທີ 9/7, ທ່ານນາຍົກລັດຖະມົນຕີ ຫງວຽນເຕີນຢູ້ງ ຮຽກຮ້ອງໃຫ້ຂະແໜງສວຍສາອາກອນ ສຸມໃສ່ຄົ້ນຄ້ວາ, ສະເໜີມາດຕະການແກ້ໄຂເພື່ອຫລຸດຜ່ອນຄວາມຫຍຸ້ງຍາກໃນການປະຕິບັດພັນທະເສຍອາກອນ, ພ້ອມທັງເດັດດ່ຽວປັບໄໝລົງໂທດບັນດາພະນັກງານທີ່ກໍ່ຄວາມຫຍຸ້ງຍາກຫຍໍ້ທໍ້ໃຫ້ແກ່ປະຊາຊົນ ແລະ ວິສາຫະກິດ. ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ໃນວັດທະນາການເຊື່ອມໂຍງເຂົ້າກັບສາກົນ ແລະ ລະດົມບັນດາແຫຼ່ງກຳລັງເພື່ອກໍ່ສ້າງ, ພັດທະນາປະເທດຊາດ, ຂະແໜງສ່ວຍສາອາກອນໄດ້ມານະພະຍາຍາມປະຕິຮູບບໍລິຫານ. ທ່ານນາຍົກລັດຖະມົນຕີ ຫງວຽນເຕີນຢູ້ງ ຮຽກຮ້ອງວ່າ: ໃນໄລຍະຈະມາເຖິງ, ຂະແໜງສ່ວຍສາອາກອນຕ້ອງປ່ຽນໃໝ່ຢ່າງແຮງກ່ວາອີກ, ຕອບສະໜອງບັນດາຄຳຮຽກຮ້ອງຂອງການເຊື່ອມໂຍງແລະພັດທະນາເສດຖະກິດ-ສັງຄົມຂອງປະເທດຊາດຢ່າງສູງສຸດ, ປະກອບສ່ວນຍົກສູງລະດັບແກ້ງແຍ້ງຂອງພື້ນຖານເສດຖະກິດ, ສ້າງທຸກເງື່ອນໄຂອຳນວຍຄວາມສະດວກໃຫ້ປະຊາຊົນ, ວິສາຫະກິດທຳມາຫາກິນດຳເນີນທຸລະກິດຕາມກົດໝາຍ ກໍ່ຄືປະກອບສ່ວນຕັ້ງໜ້າປັບປຸງສະພາບແວດລ້ອມແຫ່ງການລົງທຶນ, ຊຸກຍູ້ການລົງທຶນ... ທ່ານ ນາຍົກລັດຖະມົນຕີ ສະເໜີໃຫ້ຂະແໜງເປັນເສນາທິການປັບປຸງ, ເພີ່ມເຕີມ, ສ້າງສຳເລັດບັນດາຂໍ້ກຳນົດກ່ຽວກັບສ່ວຍສາອາກອນເພື່ອແນໃສ່ສ້າງເງື່ອນໄຂສະດວກໃຫ້ແກ່ປະຊາຊົນ ແລະ ວິສາຫະກິດປະຕິບັດພັນທະເສຍອາກອນຢ່າງວ່ອງໄວ ແລະ ສະດວກທີ່ສຸດ.