(vovworld) - ຕອນເຊົ້າວັນທີ 24/01, ຢູ່ທີ່ກອງປະຊຸມຜ່ານເຄື່ອຂ່າຍອີນເຕີແນດສະຫຼຸບວຽກງານສາທາລະນະສຸກປີ 2012 ແລະ ຜັນຂະຫຍາຍແຜນການປິ 2013. ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ສະເໜີໃຫ້ຂະແໜງສາທາລະນະສຸກສືບຕໍ່ປັບປຸງ ແລະ ພັດທະນາລະບົບສາທາລະນະສຸກ, ພິເສດແມ່ນຂັ້ນຮາກຖານ, ເຄື່ອຂ່າຍສາທາລະນະສຸກປ້ອງກັນ; ຄຸ້ມຄອງຄຸນນະພາບການເຄື່ອນໄຫວກວດ ແລະ ປິ່ນປົວພະຍາດຢ່າງແໜ້ນແຟ້ນ. ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຊີ້ນຳໃຫ້ຂະແໜງສາທາລະນະສຸກສຸມໃສ່ລົງທຶນເຂົ້າໃນພື້ນຖານທາງດ້ານວັດຖຸ, ສືບຕໍ່ຜັນຂະຫຍາຍການມອບໂອນດ້ານເຕັກນິກຈາກຂັ້ນເທິງ ລົງຂັ້ນລຸ່ມ ເພື່ອຍົກສູງຄຸນນະພາບການປິ່ນປົວ, ປະກອບສ່ວນຫຼຸດຜ່ອນສະພາບປິ່ນປົວຄົນເຈັບເກີນຂອບເຂດຢູ່ໂຮງໝໍຂັ້ນສູນກາງ. ທ່ານນາຍົກລັດຖະມົນຕີ ຫງວຽນເຕີນຢຸງ ກ່າວວ່າ.
“ຂະແໜງສາທາລະນະສຸກຕ້ອງຍົກສູງຄຸນນະພາບການກວດ ແລະ ປິ່ນປົວພະຍາດ, ນຳເຕັກນິກທີ່ທັນສະໄໝເຂົ້າໃນການປິ່ນປົວ. ຄຽງຂ້າງນັ້ນ, ສູ້ຊົນຫຼຸດຜ່ອນອັດຕາຕິດພະຍາດ ແລະ ອັດຕາການຕາຍ. ວຽກງານປ້ອງກັນພະຍາດແມ່ນກົກຂອງການເບິ່ງແຍງດູແລສຸຂະພາບໃຫ້ແກ່ປະຊາຊົນ. ຂະແໜງຕ້ອງລາຍງານ 7 ໜ້າທີ່ຈຸດສຸມຄື; ຫຼຸດຜ່ອນສະພາບປິ່ນປົວຄົນເຈັບເກີນຂອບເຂດ, ປ່ຽນໃໝ່ກົນໄກການເງິນ, ນຳໃຊ້ແຫຼ່ງລົງທຶນຈາກລັດເປັນຢ່າງດີ ພ້ອມທັງເສີມຂະຫຍາຍບັນດາແຫຼ່ງກຳລັງຂອງສັງຄົມທີ່ລົງທຶນເຂົ້າໃນການ ເບິ່ງແຍງດູແລສຸຂະພາບໃຫ້ແກ່ປະຊາຊົນໃຫ້ດີກວ່າເກົ່າ”.
ທ່ານນາຍົກລັດຖະມົນຕີ ຍັງຮຽກຮ້ອງໃຫ້ຂະແໜງສາທາລະນະສຸກຕ້ອງສຸມໃສ່ການຜັນຂະຫຍາຍປະຕິບັດການປ້ອງກັນສຸຂະພາບທົ່ວປວງຊົນ, ປະຕິບັດນະໂຍບາຍໜູນຊ່ວຍຄົນທຸກຍາກຊື້ປະກັນສຸຂະພາບ; ແກ້ໄຂສະພາບຂາດຄວາມກ້ຳກິ່ງລະຫວ່າງຍິງ - ຊາຍ ໃຫ້ໄດ້.