ຄວາມປະທັບໃຈຫວຽດນາມ ງານບຸນວັດທະນະທຳອາຊີທີ່ ສເຊັກໂກ
(vovworld) - ມີຊາວ ສເຊັກໂກ ແລະ ນັກທ່ອງທ່ຽວຕ່າງປະເທດນັບຮ້ອຍຄົນ ໄດ້ມີໂອກາດເຂົ້າຮ່ວມການເຄື່ອນໄຫວວັດທະນະທຳທີ່ເປັນເອກະລັກສະເພາະຂອງຫວຽດນາມ, ໄດ້ຮັບປະທານອາຫານຫຼາຍເຍື່ອງ, ພ້ອມກັບໝາກໄມ້ຫຼາຍຊະນິດ ກໍ່ຄືນຳ້ດື່ມຂອງ ຫວຽດນາມ ໃນ “ງານບຸນວັດທະນະທຳອາຊີ-ໃກ້ ແລະ ໄກ“, ເຊິ່ງໄຂຂຶ້ນໃນວັນທີ 18/6 ຢູ່ນະຄອນຫຼວງ Praha, ສເຊັກໂກ. ງານບຸນໂດຍສະຖານທູດ ຫວຽດນາມປະຈຳ ສເຊັກໂກ ສົມທົບກັບອຳນາດການປົກຄອງເມືອງ Praha 3 ແລະ ອົງການບໍ່ຂຶ້ນກັບລັດຖະບານ Info Dracek ຮ່ວມກັນຈັດຕັ້ງ, ເພື່ອເປັນຂີດໝາຍສິ້ນສຸດປີວັດທະນະທຳ ຫວຽດນາມຢູ່ ສເຊັກໂກ.
ໃນງານບຸນປີນີ້, ຫວຽດນາມແນະນຳເຖິງປະຊາຊົນ ສເຊັກໂກ ແລະ ນັກທ່ອງທ່ຽວຈຸດວັດທະນະທຳທີ່ເປັນເອກະລັກສະເພາະຂອງຫວຽດນາມ, ຜ່ານລາຍການສະແດງສິລະປະ, ການເດີນແບບຊຸດເສື້ອຍາວ, ກໍ່ຄືອາຫານການກິນ. ທ້າວ Lucas Hruda, ນັກສຶກສາ ສເຊັກໂກ, ໃຫ້ຮູ້ວ່າ,
“ຂ້າພະເຈົ້າບໍ່ຮູ້ຫຼາຍກ່ຽວກັບ ຫວຽດນາມ, ພຽງແຕ່ຮູ້ບັນດາໂຄງການພັດທະນາໂຄງລ່າງຢູ່ ຫວຽດນາມ, ເຊິ່ງມີຄົນ ເຊັກໂກເຂົ້າຮ່ວມ ແລະ ອາຫານ ຫວຽດນາມບາງເຍື່ອງ ໂດຍເພື່ອນຮ່ວມອາຊີບຊາວຫວຽດນາມ ແນະນຳໃຫ້ເທົ່ານັ້ນ. ເມື່ອຮູ້ວ່າມີງານບຸນນີ້, ຂ້າພະເຈົ້າຢາກມາຮັບປະທານອາຫານເຍື່ອງຕ່າງໆຂອງ ຫວຽດນາມທີ່ຂ້າພະເຈົ້ານິຍົມ. ເມື່ອໄດ້ຊົມຊຸດເສື້ອຍາວຂອງຫວຽດນາມ, ແລະ ຄົ້ນຫາ ຫວຽດນາມຜ່ານຮູບພາບຕ່າງໆທີ່ມີຫົວຂໍ້ແຕກຕ່າງກັນ. ຂ້າພະເຈົ້າຫວັງວ່າຈະມີໂອກາດມາຫວຽດນາມ ເພື່ອເຫັນປະຈັກຕາປະເທດຊາດຂອງພວກເພື່ອນ“.
“ງານບຸນວັດທະນະທຳອາຊີ-ໃກ້ ແລະ ໄກ“ ໄດ້ອັດລົງຢູ່ ສເຊັກໂກ. ໃນໄລຍະຈະມາເຖິງ, ຈະມີການເຄື່ອນໄຫວພົບປະແລກປ່ຽນວັດທະນະທຳ ສິລະປະຫຼາຍຢາງຖືກຈັດຕັ້ງຢູ່ທີ່ນີ້, ປະກອບສ່ວນໂຄສະນາພາບພົດຂອງຫວຽດນາມຢູ່ ສເຊັກໂກ.