ພ້ອມກັບການຮັກສາການເຄື່ອນໄຫວສູ້ຮົບຢູ່ລະດັບສູງໃນ ບັ້ນຮົບຢູ່ ລີບັງ ແລະ ເຂດກາຊາ, ໃນໄລຍະຜ່ານມາ, ກອງທັບອາກາດ ອິດສະລາແອັນ ໄດ້ຍູ້ແຮງການບຸກໂຈມຕີທາງອາກາດເລັ່ງໃສ່ຊີຣີຢ່າງຕໍ່ເນື່ອງ ເຊິ່ງເຮັດໃຫ້ສາມັນຊົນເປັນຈຳນວນຫຼາຍເສຍຊີວິດ ແລະ ຮັບບາດເຈັບ.

ແຈ້ງການໃນຕອນຄ່ຳວັນທີ 10 ພະຈິກຂອງສະຖານີວິທະຍຸກະຈາຍສຽງ Sham FM ຢູ່ຊີຣີ ໃຫ້ຮູ້ວ່າ, ການບຸກໂຈມຕີທາງອາກາດໂດຍກອງທັບອາກາດ ອິດສະລາແອັນ ດຳເນີນເລັ່ງໃສ່ເຂດ Sayyidah Zaynab ຂຶ້ນກັບຊານນະຄອນຫຼວງ Damascus ຂອງ ຊີຣີໃນວັນທີ 10 ພະຈິກ ເຮັດໃຫ້ມີຜູ້ເສຍຊີວິດ 9 ຄົນ ແລະ ຖືກບາດເຈັບ 20 ຄົນ. ຕາມແຫຼ່ງຂ່າວແລ້ວ, ເປົ້າໝາຍຖືກບຸກໂຈມຕີທາງອາກາດແມ່ນຕຶກອາຄານທີ່ມີຄົນດຳລົງຊີວິດເປັນຈຳນວນຫຼາຍ ແລະ ສ່ວນຫຼາຍຜູ້ເສຍຊີວິດ ແລະ ຮັບບາດເຈັບແມ່ນ ສາມັນຊົນ.

ປະຕິກິລິຍາສາກົນເປັນທາງການຄັ້ງທຳອິດ ສຳລັບການບຸກໂຈມຕີທາງອາກາດດັ່ງກ່າວ, ກະຊວງການຕ່າງປະເທດ ອີຣານ ໄດ້ຮຽກຮ້ອງ ຂວ້ຳບາດດ້ານອາວຸດ, ພ້ອມທັງປົດຖານະບົດບາດສະມາຊິກ ສປຊ ຂອງອິດສະລາແອັນ. ກ່ອນໜ້ານັ້ນ, ອີຣານ ແລະ ບັນດາປະເທດໃນພາກພື້ນກໍ່ໄດ້ກ່າວປະນາມເປັນຫຼາຍຄັ້ງຕໍ່ເລື່ອງ ອິດສະລາແອັນ ດຳເນີນການບຸກໂຈມຕີເປັນຫຼາຍຄັ້ງ ເຊິ່ງເຮັດໃຫ້ສາມັນຊົນເສຍຊີວິດ ແລະ ຮັບບາດເຈັບເປັນຈຳນວນຫຼາຍ ນັບທັງຊີຣີ, ລີບັງ ແລະ ບັນດາເຂດຜືນແຜ່ນດິນຂອງປາແລັດສະຕິນ, ພິເສດແມ່ນເຂດກາຊາ.