(vovworld) – ຄວາມເຄັ່ງຕຶງໄດ້ເກີດຂຶ້ນຢູ່ຕວກກີ ພາຍຫຼັງເກີດເຫດລະເບີດຢູ່ບໍ່ຖ່ານຫີນໃນວັນທີ 13/05 ເຮັດໃຫ້ນັບຮ້ອຍຄົນຖືກເສຍຊີວິດ ແລະ ນັບພັນຄົນຖືກບາດເຈັບ. ໄດ້ເກີດການປະທະກັນລະຫວ່າງຕຳຫຼວດກັບຜູ້ແຫ່ຂະບວນປະທ້ວງຢູ່ນະຄອນຫຼວງ Ankara ແລະ ນະຄອນ Istanbul ໃນຂະນະທີ່ສະຫະພັນແຮງງານ ຕວກກີ ຮຽກຮ້ອງດຳເນີນນັດຢຸດງານ ໃນວັນທີ 15/05.
ບັນດາຜູ້ແຫ່ຂະບວນປະທ້ວງໄດ້ລົງຖະໜົນສາຍຕ່າງໆ, ອັນໄດ້ພາໃຫ້ຕຳຫຼວດຕ້ອງໃຊ້ແກດນ້ຳຕາ ແລະ ທໍ່ສີດນ້ຳເພື່ອຍຸບເລີກບັນດາຜູ້ເຕົ້າໂຮມ ຄາດວ່າມີ 3.000 – 4.000 ຄົນ ຢູ່ສະໜາມຫຼວງ Kizilay, ນະຄອນຫຼວງ Ankara ແລະ ຜູ້ແຫ່ຂະບວນປະທ້ວງນັບໝື່ນຄົນຢູ່ນະຄອນ Istanbul. ບັນດາຜູ້ແຫ່ຂະບວນປະທ້ວງໄດ້ກ່າວຫາລັດຖະບານ ແລະ ຂະແໜງອຸດສາຫະກຳຂຸດຄົ້ນບໍ່ແຮ່ໄດ້ເລີ່ນເລີ້ຕໍ່ຄວາມຮັບຜິດຊອບ. ກ່ອນນັ້ນ, ຕຳຫຼວດກໍ່ຕ້ອງໃຊ້ມາດຕະການຄ້າຍຄືກັນກັບນັກສຶກສາເກືອບ 800 ຄົນ ທີ່ເດີນຂະບວນຢູ່ໃກ້ກັບສຳນັກງານກະຊວງພະລັງງານ.