ຕຳຫຼວດ ສ ເກົາຫຼີ
(ພາບປະກອບຈາກ AFP/TTXVN)
(vovworld) – ແຫຼ່ງຂ່າວຈາກກະຊວງປ້ອງກັນປະເທດ ສ ເກົາຫຼີ ເມື່ອວັນທີ 27/3 ໃຫ້ຮູ້ວ່າ, ໃນວັນດຽວກັນ, ກຳປັ່ນຫາປາຂອງ ສປປ ເກົາຫຼີ ໄດ້ແລ່ນກາຍເຂດຊາຍແດນທາງນ້ຳໄປທາງທິດໃຕ້ 1 ໄມທະເລ, ອັນໄດ້ເຮັດໃຫ້ກຳປັ່ນລາດຕາເວນຂອງ ສ ເກົາຫຼີ ຕ້ອງຍິງກ່າວເຕືອນ. ປະຈຸບັນ, ຍັງບໍ່ທັນຮູ້ວ່າການລວງລ້ຳນີ້ແມ່ນຕັ້ງໃຈຫຼືບໍ່, ແຕ່ໂຄສົກກະຊວງປ້ອງກັນປະເທດ ສ ເກົາຫຼີ ຖືວ່າແນ່ນອນວ່າ ປະຕິກິລິຍາແຂງກະດ້າງຈາກຝ່າຍ ເຊີອູນ ຈະກໍ່ຄວາມເຄັ່ງຕຶງອັນໃຫຍ່ຫຼວງລຽບຕາມຊາຍແດນທາງທະເລທີ່ພວມເກີດການພິພາດກັນ.
ກ່ຽວຂ້ອງເຖິງ ສປປ ເກົາຫຼີ ຍັງມີຂ່າວວ່າ: ວັນທີ 27/3, ສະພາຄວາມໝັ້ນຄົງ ສປຊ ໄດ້ກ່າວປະນາມການຍິງທົດລອງ ລູກສອນໄຟນຳວິຖີເວລາມໍ່ໆມານີ້ຂອງ ສປປ ເກົາຫຼີ ແລະ ເຫັນດີເປັນເອກະສັນທາບທາມຄວາມເຫັນກ່ຽວກັບມາດຕະການໂຕ້ຕອບເທົ່າທີ່ຄວນ. ກ່າວຄຳເຫັນກັບບັນດານັກຂ່າວພາຍຫຼັງວາລະປຶກສາຫາລືລັບທີ່ແກ່ຍາວເກືອບ 1 ຊົ່ວໂມງຂອງສະພາຄວາມໝັ້ນຄົງ, ທ່ານນາງ Sylvie Lucas, ເອກອັກຄະລັດຖະທູດ ລູກຊຳບວກ, ເຊິ່ງແມ່ນປະເທດພວມເປັນປະທານໝູນວຽນຂອງສະພາຄວາມໝັ້ນຄົງ, ໃຫ້ຮູ້ວ່າ, ການກ່າວປະນາມນີ້ບໍ່ຖືກຍົກອອກມາດ້ວຍຮູບແບບແຈ້ງການເປັນທາງການຂອງ 15 ປະເທດສະມາຊິກຂອງ ສະພາຄວາມໝັ້ນຄົງ, ແຕ່ບັນດາສະມາຊິກໄດ້ສະເໜີໃຫ້ທ່ານນາງປະກາດບັນດາຄຳວິຈານນີ້, ເຊິ່ງເຄີຍໄດ້ຮັບຄວາມເຫັນດີເຫັນພ້ອມຈາກບັນດາສະມາຊິກ.