(ພາບປະກອບ)
(vovworld) – ການຊອກຫາສົ້ນອອກໃຫ້ແກ່ຜະລິດຕະພັນກະເສດ, ການບໍລິຫານລາຄານຳ້ມັນ, ສະພາບສິນຄ້າປອມ, ການພັດທະນາກະສິກຳສຳຮອງ ແມ່ນບັນດາບັນຫາທີ່ທ່ານລັດຖະມົນຕີວ່າການກະຊວງອຸດສາຫະກຳການຄ້າ ຫວູຮູຍຮ່ວາງ ໄດ້ເຮັດແຈ້ງໃນການຕອບຄຳຊັກຖາມຕອນບ່າຍວັນທີ 11/6. ນີ້ກໍ່ແມ່ນບັນດາບັນຫາທີ່ດຶງດູດຄວາມສົນໃຈຈາກຜູ້ມີສິດເລືອກຕັ້ງຮ່າໂນ້ຍ ຫຼາຍຄົນ. ຜູ້ມີສິດເລືອກຕັ້ງ ໂຮ່ວັນອືວ (Ho Van Uu) , ຢູ່ເມືອງ ຮາຍບ່າຈຶງ, ຮ່າໂນ້ຍ ຫວັງວ່າ:
“ພວກຂ້າພະເຈົ້າຫວັງວ່າ, ໃນໄລຍະຈະມາເຖິງ, ທ່ານລັດຖະມົນຕີວ່າການກະຊວງອຸດສາຫະກຳການຄ້າ ຈະມີແຜນການ, ຂັ້ນຕອນເພື່ອຊີ້ນຳນຳພາບັນດາບັນຫາພາຍໃນປະເທດ, ພິເສດແມ່ນອຸດສາຫະກຳສຳຮອງ, ລາຄານຳ້ມັນ… ຕ້ອງມີແຜນການເພື່ອແກ້ໄຂ, ຕອບສະໜອງຄວາມມຸ້ງຫວັງຂອງຜູ້ມີສິດເລືອກຕັ້ງ. ຜ່ານການຕອບຄຳຊັກຖາມຂອງທ່ານລັດຖະມົນຕີ, ພວກຂ້າພະເຈົ້າມີຄວາມເຊື່ອໝັ້ນທີ່ສຸດຕໍ່ທ່ານລັດຖະມົນຕີ ແລະ ສະພາແຫ່ງຊາດ“.
ກ່ອນນັ້ນ, ການຕອບຄຳຊັກຖາມຂອງທ່ານລັດຖະມົນຕີວ່າການກະຊວງກະສິກຳແລະ ພັດທະນາຊົນນະບົດ ກາວດຶກຟາດ ກໍ່ດຶງດູດຄວາມສົນໃຈຈາກຜູ້ມີສິດເລືອກຕັ້ງໃນທົ່ວປະເທດ. ຜູ້ມີສິດເລືອກຕັ້ງ ເຈິ່ນດິ່ງອຽນ ຢູ່ແຂວງດັກນົງ, ສະເໜີວ່າ:
“ເພື່ອປະຕິບັດບັນດາລັດຖະນະໂຍບາຍ, ທິດທາງໃຫຍ່ໃຫ້ເປັນຢ່າງດີ, ຕ້ອງມີການຜັນຂະຫຍາຍຢ່າງຄົບຊຸດ, ຂ້ຽວຂາດ, ລະອຽດ… ທ່ານລັດຖະມົນຕີຄວນເອົາໃຈໃສ່ເຖິງຂໍ້ສະເໜີແນະຂອງລັດຖະບານ, ສ້າງເງື່ອນໄຂດ້ານແຫຼ່ງທຶນ, ການລົງທຶນເຂົ້າບັນດາເຂດທີ່ເຄີຍປະສົບກັບໄພທຳມະຊາດ. ສຳລັບເຂດໄຕງວຽນ, ພວກຂ້າພະເຈົ້າສະເໜີຕໍ່ລັດຖະບານຄວນລົງທຶນ ແລະ ສ້າງເຂື່ອນຂະໜາດໃຫຍ່ເພື່ອມີປະລິມານນຳ້ສະສົມຮັບໃຊ້ໃຫ້ແກ່ການຜະລິດກະສິກຳ“.
ລັດຖະມົນຕີວ່າການກະຊວງສຶກສາແລະບຳລຸງສ້າງຫວຽດນາມຕອບຄຳຊັກຖາມ
ຕອນບ່າຍວັນທີ 12/6, ທ່ານຟ້າມຫວູລ້ວນ, ລັດຖະມົນຕີວ່າການກະຊວງສຶກສາ ແລະ ບຳລຸງສ້າງຫວຽດນາມ ໄດ້ຕອບຄຳຊັກຖາມບັນດາສະມາຊິກສະພາແຫ່ງຊາດກ່ຽວກັບມາດຕະການຜັນຂະຫຍາຍມະຕິຂອງສະພາແຫ່ງຊາດກ່ຽວກັບການປ່ຽນໃຫມ່ຫລັກສູດ, ປື້ມຕຳລາມັດທະຍົມ ແລະ ການປ່ຽນໃຫມ່ວິທີຈັດຕັ້ງການເສັງແຫ່ງຊາດ.
ສຳລັບການຜັນຂະຫຍາຍປະຕິບັດມະຕິຂອງສະພາແຫ່ງຊາດກ່ຽວກັບການປ່ຽນໃຫມ່ຫລັກສູດ, ປື້ມຕຳລາມັດທະຍົມ, ທ່ານ ລັດຖະມົນຕີ ຫວູລ້ວນ ໃຫ້ຮູ້ວ່າ: ກະຊວງສຶກສາ ແລະ ບຳລຸງສ້າງ ໄດ້ເປັນເຈົ້າພາບສົມທົບກັບບັນດາກະຊວງ, ຂະແຫນງການສ້າງສຳເນົາເອກະສານແຜນການປ່ຽນໃຫມ່ຫລັກສູດ, ປື້ມຕຳລາມັດທະຍົມໃຫ້ສົມບູນແບບ ເພື່ອຍື່ນສະເຫນີຕໍ່ນາຍົກລັດຖະມົນຕີອະນຸມັດ.