ຄວາມໝັ້ນຄົງຢູ່ທະເລດຳ: ເນື້ອໃນຈຸດສຸມໃນການເດີນທາງໄປປະຕິບັດງານຢູ່ຕ່າງປະເທດໃນເອີຣົບຂອງລັດຖະມົນຕີກະຊວງປ້ອງກັນປະເທດ ອາເມລິກາ
(VOVWORLD) -ວັນທີ 17 ຕຸລາ, ທ່ານລັດຖະມົນຕີກະຊວງປ້ອງກັນປະເທດ ອາເມລິກາ Lloyd Austin ຈະເລີ່ມຕົ້ນການເດີນທາງໄປປະຕິບັດງານຢູ່ຕ່າງປະເທດໃນເອີຣົບ ເຊິ່ງຈະຢ້ຽມຢາມ ຢູແກຼນ, ຈໍເຈຍ, ໂຣມານີ ແລະ ເຂົ້າຮ່ວມກອງປະຊຸມລັດຖະມົນຕີກະຊວງປ້ອງກັນຊາດ ອົງການສົນທິສັນຍາອັກລັງຕິກເໜືອ (NATO) ຢູ່ ແບນຊິກ.
 ທ່ານລັດຖະມົນຕີກະຊວງປ້ອງກັນປະເທດ ອາເມລິກາ Lloyd Austin (ພາບ: TTXVN) |
ຢູ່ ຈໍເຈຍ, ທ່ານລັດຖະມົນຕີ Lloyd Austin ຈະມີການພົບປະກັບທ່ານນາຍົກລັດຖະມົນຕີ ປະເທດນີ້ Irakli Garibashvili ແລະ ຄູ່ຕຳແໜ່ງ Juansher Burchuladze. ເນື້ອໃນຈຸດສຸມຂອງການພົບປະຄັ້ງນີ້ແມ່ນເນັ້ນໜັກເຖິງຄວາມສຳຄັນຂອງການພົວພັນລະຫວ່າງ ອາເມລິກາ - ຈໍເຈຍ ແລະ ປຶກສາຫາລືກ່ຽວກັບການເພີ່ມທະວີການຮ່ວມມືຢູ່ທະເລດຳ.
ຢູ່ ຢູແກຼນ, ທ່ານລັດຖະມົນຕີ Lloyd Austin ຈະມີການພົບປະກັບທ່ານປະທານາທິບໍດີ Volodymyr Zelenskyy ແລະ ທ່ານລັດຖະມົນຕີກະຊວງປ້ອງກັນປະເທດ Andrii Taran, ແລກປ່ຽນກ່ຽວກັບການປະຕິຮູບການປ້ອງກັນຊາດ ແລະ ການຮ່ວມມືຂອງ ຢູແກຼນ ຢູ່ ທະເລດຳ ກັບບັນດາປະເທດພັນທະມິດ ແລະ ຄູ່ຮ່ວມມື.
ຢູ່ ແບນຊິກ, ຜູ້ນຳໜ້າທຳນຽບຫ້າແຈ ຈະເຂົ້າຮ່ວມກອງປະຊຸມຄັ້ງທຳອິດຂອງລັດຖະມົນຕີກະຊວງປ້ອງກັນຊາດ NATO, ໃນນັ້ນ, ທ່ານຈະພົບປະກັບທ່ານເລຂາທິການໃຫຍ່ Jens Stoltenberg ແລະ ຄູ່ຕຳແໜ່ງອື່ນໆ. ທ່ານລັດຖະມົນຕີ Lloyd Austin ຈະປັບປຸງຄຳໝັ້ນສັນຍາຂອງ ອາເມລິກາ ກັບ ກຸ່ມ NATO.