ຄູ່ຮ່ວມມືຂຽວໃຫ້ແກ່ພື້ນຖານກະສິກຳໃໝ່
(VOVWORLD) - “ຄູ່ຮ່ວມມືຂຽວໃຫ້ແກ່ພື້ນຖານກະສິກຳໃໝ່” ແມ່ນຫົວຂໍ້ຂອງກອງປະຊຸມແບບທາງໄກ ລາຍການໜູນຊ່ວຍສາກົນ (ISG) ປີ 2021 ໄດ້ດຳເນີນໃນຕອນເຊົ້່າວັນທີ 16 ທັນວາ, ໂດຍທ່ານ ເລມິງຮວານ ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລະ ທ່ານ Rémi Nono Womdim, ຫົວໜ້າຜູ້ຕາງໜ້າອົງການອາຫານ ແລະ ການກະເສດ ຂອງ ສປຊ (FAO) ເປັນປະທານຮ່ວມ.
 ກອງປະຊຸມແບບທາງໄກ ລາຍການໜູນຊ່ວຍສາກົນ ປີ 2021 (ພາບ: VGP) |
ISG 2021 ແມ່ນເຫດການສຳຄັນເພື່ອປະກອບຄຳເຫັນຄຳປຶກສາຂອງບັນດາຄູ່ຮ່ວມມືສາກົນ ແນໃສ່ສ້າງຍຸດທະສາດພັດທະນາກະສິກຳ, ຊົນນະບົດໄລຍະ 2021 – 2030 ໃຫ້ສົມບູນ, ວິໄສທັດຮອດປີ 2050 ແລະ ແຜນການເຄື່ອນໄຫວຫັນປ່ຽນແຫ່ງຊາດໄປເປັນລະບົບສະບຽງອາຫານ, ທັນຍາຫານຢ່າງໂປ່ງໃສ, ມີຄວາມຮັບຜິດຊອບ ແລະ ຍືນຍົງຢູ່ ຫວຽດນາມ ໄລຍະ 2021 – 2030.
ທ່ານລັດຖະມົນຕີ ເລມິງຮວານ ປາດຖະໜາຢາກໃຫ້ປະຊາຄົມສາກົນປະກອບສ່ວນຢ່າງສຳຄັນ ເພື່ອສ້າງຍຸດທະສາດ, ແຜນການເຄື່ອນໄຫວຂອງຂະແໜງກະສິກຳ ເພື່ອໃຫ້ກະສິກຳບໍ່ພຽງແຕ່ແມ່ນເສົາຄ້ຳຂອງພື້ນຖານເສດຖະກິດເມື່ອປະເທດປະສົບຄວາມຫຍຸ້ງຍາກ ເທົ່ານັ້ນ, ແຕ່ຍັງປະຕິບັດຄວາມຄາດຫວັງຂອງ ຫວຽດນາມ ໃນປີ 2045 ອີກດ້ວຍ.
ໃນຂອບເຂດກອງປະຊຸມ, ທ່ານ ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ເລມິງຮວານ ແລະ ທ່ານ ຫົວໜ້າຜູ້ຕາງໜ້າອົງການ FAO Rémi Nono Womdim ໄດ້ລົງນາມກອບລາຍການຮ່ວມມືລະຫວ່າງ ຫວຽດນາມ - ອົງການ FAO ໄລຍະ 2022 – 2026.