ຂອງຂວັນບຸນເຕັດໄດ້ຖືກຂົນສົ່ງໄປຍັງເກາະ ຮ່ອນດົກ (ພາບ : internet) |
Vovworld- ວັນທີ 26/1, ຄະນະການນຳທະຫານເຮືອເຂດ 5 ແລະ ຜູ້ຕາງໜ້າບາງແຂວງເຂດທົ່ງພຽງ ແມ່ນ້ຳຂອງ ທາງ ພາກໃຕ້ຫວຽດນາມ ໄດ້ໄປຢ້ຽມຢາມ, ອວນພອນປີໃໝ່ຢູ່ເກາະ ຮ່ອນດົກ, ຕາແສງຕຽນຫາຍ, ເທດສະບານ ຮ່າຕຽນ ແຂວງກຽນຢາງ. ຄະນະໄດ້ມອບຂອງຂວັນ, ອວນພອນ ປີໃໝ່ບັນດາພະນັກງານ, ນັກຮົບປ້ອມປ້ອງກັນຊາຍແດນ ຮ່ອນດົກ, ຄະນະກຳມະການປະຊາຊົນຕາແສງ ຕຽນຫາຍ, ອວນພອນປີໃໝ່ ແລະ ພົບປະແລກປ່ຽນກັບນັກຮົບ ສະຖານີ ຣາດາ 625. ຮ້ອຍເອກ ວູ້ຮົ່ງຖາມ, ຫົວໜ້າ ສະຖານີ ຣາດາ 625 ໃຫ້ຮູ້ວ່າ :
“ ອວນພອນປີໃໝ່ບັນດາພະນັກງານ, ນັກຮົບມີຄວາມເປັນກຽດຢ່າງຍິ່ງທີ່ ຄະນະການນຳ ທະຫານເຮືອເຂດ 5 ໄດ້ມາຢາມ ອວນພອນປີໃໝ່. ນີ້ແມ່ນແຫຼ່ງລະດົມກຳລັງໃຈຢ່າງໃຫຍ່ຫຼວງເພື່ອໃຫ້ພວກຂ້າພະເຈົ້າເຮັດຫຼ້ອນໜ້າທີ່ຊຶ່ງພັກ ແລະ ລັດໄດ້ມອບໝາຍໃຫ້. ຊີວິດການເປັນຢູ່ໃນເກາະ ຮ່ອນດົກ ເວົ້າສະເພາະ ແລະ ຢູ່ໝູ່ເກາະເວົ້າລວມ ໄດ້ມີການປົວແປງຫຼາຍແລ້ວ. ຄ້າຍທະຫານໄດ້ຮັບກໍ່ສ້າງໂດຍພື້ນຖານ, ບັນດາພະນັກງານ, ນັກຮົບມີຄວາມໝັ້ນໃຈປະຕິບັດວຽກງານ ”
ກ່ອນໜ້ານັ້ນຄືວັນທີ 25/1, ຄະນະການນຳທະຫານເຮືອເຂດ 5 ໄດ້ໄປ ຢ້ຽມຢາມ, ອວນພອນປີໃໝ່ ບັນດາພະນັກງານ, ນັກຮົບ ແລະ ປະຊາຊົນຢູ່ເກາະ ນາມຢູ. ໃຫ້ການຕ້ອນຮັບຄະນະ, ທ່ານ ຫງວຽນທ້າຍຫວຽດ ຮອງປະທານຄະນະກຳມະການປະຊາຊົນຕາແສງ ອານເຊີນ ໃຫ້ຮູ້ວ່າ :
“ ເພື່ອຮັບປະກັນໃຫ້ພໍ່ແມ່ພີນ້ອງໃນເກາະໄດ້ຕ້ອນຮັບບຸນເຕັດ, ຕ້ອນຮັບລະດູບານໃໝ່ຢ່າງເບີກບານມ່ວນຊື່ນ, ພວກຂ້າພະເຈົ້າຈະຈັດໃຫ້ມີການພົບປະແລກປ່ຽນວັດທະນະທຳ, ສະແດງສິລະປະວັນນະຄະດີກັບບັນດາກົມກອງທະຫານປ້ອງກັນຊາຍແດນ, ທະຫານເຮືອທີ່ພວມຕັ້ງທັບໃນບໍລິເວນ. ນອກຈາກນັ້ນ, ໃນບຸນເຕັດປີນີ້, ພວກຂ້າພະເຈົ້າໄດ້ແຕ່ງຕັ້ງບັນດາຄະນະປະຕິບັດງານລົງ ຢ້ຽມຢາມ,ມອບຂອງຂວັນ ອວນພອນ ປີໃໝ່ບັນດາຄອບຄົວທີ່ທຸກຍາກ, ຄອບຄົວເປົ້າໝາຍນະໂຍບາຍ ” .