(vovworld) - ວັນທີ 19/9, ຢູ່ຮ່າໂນ້ຍ, ຄະນະກຳມະການພັກກະຊວງແຜນການ ແລະ ການລົງທຶນ ໄດ້ຈັດກອງປະຊຸມສຳຫຼວດກວດກາຕຳນິຕົນເອງ ແລະ ຕຳນິເພື່ອນສະຫາຍຕາມເນື້ອໃນຈິດໃຈມະຕິສູນກາງພັກຄັ້ງທີ 4, ຊຸດທີ 11 “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປະຈຸບັນ”. ກ່າວຄຳເຫັນໜ້າທີ່ນີ້, ທ່ານນາງ Nguyen Thi Kim Ngan, ເລຂາສູນກາງພັກ, ຮອງປະທານສະພາແຫ່ງຊາດ ໄດ້ເນັ້ນໜັກເຖິງຄວາມສຳຄັນຂອງວຽກງານສຳຫຼວດກວດກາຕຳນິຕາມຈິດໃຈເນື້ອໃນມະຕິສຸນກາງຄັ້ງທີ 4, ຊຸດທີ 11. ຄະນະກຳມະການພັກ ກໍຄືບັນດາສະມາຊິກຂອງຄະນະກຳມະການພັກກະຊວງແຜນການ ແລະ ການລົງທຶນ ຕ້ອງຊາບຊຶມບັນດາທັດສະນະ, ແນວຄິດຂອງສູນກາງພັກ. ດ້ວຍຈຸດໝາຍແມ່ນເຮັດໃຫ້ໝູ່ຄະນະການນຳ ແລະ ສ່ວນບຸກຄົນ ພະນັກງານ, ສະມາຊິກພັກແຕ່ລະຄົນເຫັນໄດ້ຈຸດດີ, ຈຸດອ່ອນ, ຂໍ້ຂາດຕົກບົກຜ່ອງ, ໜ້າທີ່ຮັບຜິດຊອບຂອງຕົນກ່ຽວກັບ 3 ບັນຫາຮີບດ່ວນເຊິ່ງມະຕິສູນກາງພັກຄັ້ງທີ 4 ໄດ້ຊີ້ອອກ, ຈາກນັ້ນຖອດຖອນບົດຮຽນ ແລະ ວາງທິດທາງເສີມຂະຫຍາຍຈຸດດີ, ແກ້ໄຂຂໍ້ຂາດຕົກບົກຜ່ອງ. ທ່ານນາງ Nguyen Thi Kim Ngan ສະເໜີໃຫ້ບັນດາພະນັກງານເຂົ້າຮ່ວມການສຳຫຼວດກວດກາ ຕ້ອງເສີມຂະຫຍາຍຈິດໃຈຕຳນິຕົນເອງ ແລະ ຕຳນິເພື່ອນສະຫາຍ, ຮັບຮູ້ແຈ້ງຄວາມໝາຍ, ຄວາມຮັບຜິດຊອບຂອງການດຳເນີນຊີວິດຄັ້ງນີ້ ຜ່ານບົດລາຍງານຕຳນິຕົນເອງຂອງຕົນ. ເລື່ອງຕຳນິຕ້ອງກົງໄປກົງມາ, ບົນຈິງໃຈສ້າງສັນ ແລະ ມີປະສິດທິຜົນ.