ຄະນະປະຈຳສະພາ ແຫ່ງຊາດຊັກຖາມລັດຖະມົນຕີກະຊວງອຸດສາຫະກຳການຄ້າ ແລະ ລັດຖະມົນຕີກະຊວງສາທາລະນະສຸກ
(vovworld) - ວັນທີ 1/4, ໃນລາຍການເຄື່ອນໄຫວຊັກຖາມ ແລະ ຕອບຄຳຊັກຖາມທີ່ວາລະປະຊຸມຄັ້ງທີ 26 ຂອງຄະນະປະຈຳສະພາແຫ່ງຊາດຊຸດທີ 13, ຄະນະປະຈຳສະພາແຫ່ງຊາດໄດ້ດຳເນີນການຊັກຖາມທ່ານລັດຖະມົນຕີກະຊວງອຸດສາຫະກຳການຄ້າ ຫວູ້ຮຸຍຮ່ວາງ ແລະ ທ່ານນາງລັດຖະມົນຕີກະຊວງສາທາລະນະສຸກ ຫງວຽນທິກິມຕ໋ຽນ. ໃນຕອນເຊົ້າ, ຄະນະປະຈຳສະພາແຫ່ງຊາດຈະຊັກຖາມ ແລະ ຮັບຟັງທ່ານລັດຖະມົນຕີກະຊວງອຸດສາຫະກຳການຄ້າ ຫວູ້ຮຸຍຮ່ວາງ ຕອບຄຳຊັກຖາມກ່ຽວກັບຄວາມຮັບຜິດຊອບໃນການຄຸ້ມຄອງລັດກ່ຽວກັບໄຟຟ້າ, ນຳ້ມັນແອັດຊັງ ແລະ ການນຳໃຊ້ກອງທຶນຮັບປະກັນລາຄານຳ້ມັນແອັດຊັງເປັນປົກກະຕິ; ການປະຕິບັດໂຄງການ “ຊາວຫວຽດນາມ ຊົມໃຊ້ສິນຄ້າຫວຽດນາມ“.
(ທ່ານລັດຖະມນຕີກະຊວງອຸດສາຫະກຳການຄ້າຫວຽດນາມ ຫວູຮຸຍຮ່ວາງ)
ຕອບຄຳຖາມຂອງບັນດາຜູ້ແທນກ່ຽວກັບການປະຕິບັດໂຄງການ “ຊາວຫວຽດນາມ ຊົມໃຊ້ສິນຄ້າຫວຽດນາມ“, ທ່ານລັດຖະມົນຕີກະຊວງອຸດສາຫະກຳການຄ້າຫວຽດນາມ ຫວູ້ຮຸຍຮ່ວາງ ໃຫ້ຮູ້ວ່າ: ກະຊວງອຸດສາຫະກຳການຄ້າຫວຽດນາມ ໄດ້ສ້າງແຜນຮ່າງພັດທະນາຕະຫຼາດພາຍໃນປະເທດຕິດພັນກັບບັ້ນຂົນຂວາຍ “ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ“ ບົນພື້ນຖານສອດຄ່ອງກັບກົດໝາຍສາກົນ. ແຜນຮ່າງນີ້ໄດ້ຮັບຄຳເຫັນປະກອບຈາກບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆດ້ວຍ 4 ໝວດມາດຕະການພື້ນຖານ:
“ນັ້ນແມ່ນໝວດມາດຕະການກ່ຽວກັບການບໍລິການໜູນຊ່ວຍການປ່ຽນແປງຄວາມຮັບຮູ້ ແລະ ການກະທຳກ່ຽວຂ້ອງເຖິງຕະຫຼາດພາຍໃນປະເທດ; ໝວດມາດຕະການສ້າງລາຍການໂຄສະນາຂໍ້ມູນຂ່າວສານ; ໝວດມາດຕະການທີ 3 ແມ່ນພັດທະນາລະບົບແຈກຢາຍສິນຄ້າຫວຽດນາມ ຄົງທີ່ ແລະ ໝັ້ນຄົງ. ໝວດມາດຕະການທີ 4 ແມ່ນປະກາດບັນດາປະເພດສິນຄ້າຊື່ງຫວຽດນາມ ຜະລິດໄດ້ເປັນປະຈຳ ເພື່ອແນະນຳ ແລະ ກຳນົດທິດໃຫ້ບັນດາອົງການຈັດຕັ້ງ, ສ່ວນບຸກຄົນຢູ່ທັງພາກລັດ ແລະ ຜູ້ໃຊ້ສອຍມີພື້ນຖານເພື່ອເລືອກເຟັ້ນ ແລະ ບຸລິມະສິດຊົມໃຊ້ສິນຄ້າຫວຽດນາມ “.
ແຜນຮ່າງດັ່ງກ່າວໄດ້ຮັບການສ້າງຂຶ້ນ ແລະ ຍື່ນສະເໜີກໍ່ລັດຖະບານໃນທ້າຍປີ 2013. ຈຸດໝາຍຂອງກະຊວງອຸດສາຫະກຳການຄ້າຫວຽດນາມ ຮອດປີ 2020 ແມ່ນພະຍາຍາມເພື່ອສຳເລັດບັນດາມາດຕະການ, ໃນນັ້ນມີລະບົບການຄ້າພາຍໃນປະເທດ.
(ທ່ານນາງລັດຖະມົນຕີກະຊວງສາທາລະນະສຸກ ຫງວຽນທິກິມຕ໋ຽນ)
ໃນຕອນບ່າຍວັນດຽວກັນ, ທ່ານນາງລັດຖະມົນຕີກະຊວງສາທາລະນະສຸກ ຫງວຽນທິກິມຕ໋ຽນ ຕອບຄຳຊັກຖາມກ່ຽວກັບມາດຕະການບຸກທະລຸເພື່ອແກ້ໄຂສະພາບເສຍທາດຂາດຄຸນຂອງພະນັກງານ, ລັດຖະກອນ, ພາລະກອນຂະແໜງສາທາລະນະສຸກຈຳນວນໜຶ່ງ; ຄວາມຈິງຂອງໂຄງປະກອບການຈັດຕັ້ງສາທາລະນະສຸກຢູ່ຂັ້ນເມືອງ, ຕາແສງ ແລະ ການລົງທຶນໃຫ້ແກ່ສາທາລະນະສຸກຂັ້ນຮາກຖານເພື່ອຫຼຸດຜ່ອນສະພາບເກີນດຸນໃຫ້ແກ່ໂຮງໝໍຢູ່ຂັ້ນເທິງ; ການຄຸ້ມຄອງລັດສຳລັບສາທາລະນະສຸກເອກະຊົນ, ລາຄາຢາປິ່ນປົວພະຍາດ, ອະນາໄມ ແລະ ຄວາມປອດໄພດ້ານສະບຽງອາຫານ.