ກອງປະຊຸມຄັ້ງທີ 16 ຄະນະປະຈຳສະພາແຫ່ງຊາດ
(ພາບ: VGP/Thành Chung)
(vovworld) – ໂດຍສືບຕໍ່ວາລະປະຊຸມຄັ້ງທີ 16, ຕອນເຊົ້າວັນທີ 19/3, ຄະນະປະຈຳສະພາແຫ່ງຊາດ ໄດ້ປຶກສາຫາລື ແລະ ປະກອບຄຳເຫັນກ່ຽວກັບຮ່າງກົດໝາຍວ່າດ້ວຍການຕ້ອນຮັບພົນລະເມືອງ. ຮ່າງກົດໝາຍຈະໄດ້ຍື່ນສະເໜີຕໍສະພາແຫ່ງຊາດ (ຊຸດທີ 13) ພິຈາລະນາຄັ້ງທຳອິດທີ່ກອງປະຊຸມຄັ້ງທີ 5 ຈະມາເຖິງ. ບັນດາສະມາຊິກຄະນະປະຈຳສະພາແຫ່ງຊາດໄດ້ເຫັນດີຕໍ່ການຈຳເປັນຕ້ອງປະກາດໃຊ້ກົດໝາຍວ່າດ້ວຍການຕ້ອນຮັບພົນລະເມືອງ. ແຕ່ເຖິງຢ່າງໃດກໍ່ຕາມ, ເນື້ອໃນ, ວິທີຈັດຕັ້ງການຕ້ອນຮັບພົນລະເມືອງຕາມບັນດາເອກະສານນິຕິກຳ ແລະ ຂໍ້ກຳນົດກົດໝາຍຫຼາຍສະບັບ ຍັງບໍ່ທັນຕອບສະໜອງຄວາມຕ້ອງການປ່ຽນໃໝ່ຢ່າງຮອບດ້ານກ່ຽວກັບການຈັດຕັ້ງ, ການເຄື່ອນໄຫວຕ້ອນຮັບພົນລະເມືອງ. ຮ່າງກົດໝາຍດັ່ງກ່າວ ກໍ່ຍັງບໍ່ທັນມີຂໍ້ກຳນົດຢ່າງລະອຽດກ່ຽວກັບຄວາມຮັບຜິດຊອບໃນການຕ້ອນຮັບພົນລະເມືອງ, ບັນຫາສົມທົບລະຫວ່າງບັນດາອົງການ, ອົງການຈັດຕັ້ງໃນວຽກງານຕ້ອນຮັບພົນລະເມືອງ, ຮູບແບບການຈັດຕັ້ງສຳນັກງານຕ້ອນຮັບພົນລະເມືອງຢູ່ສູນກາງ ແລະ ທ້ອງຖິ່ນ... ບັນດາຜູ້ແທນສະເໜີໃຫ້ຄະນະຮຽບຮຽງຄວນມີບັນດາບົດລາຍງານຢ່າງເລິກເຊິ່ງ ກ່ຽວກັບສະພາບການຕົວຈິງໃນວຽກງານຕ້ອນຮັບພົນລະເມືອງໃນປະຈຸບັນ, ບົດຮຽນຂອງບັນດາປະເທດໃນການເຄື່ອນໄຫວຕ້ອນຮັບພົນລະເມືອງ, ພ້ອມທັງສະແດງລັກສະນະເປັນໄປໄດ້ຂອງຮ່າງກົດໝາຍພາຍຫຼັງໄດ້ຮັບການປະກາດໃຊ້ເພື່ອສາມາດຍື່ນສະເໜີໃຫ້ສະພາແຫ່ງຊາດພິຈາລະນາ, ປະກອບຄຳເຫັນ.
ກ່ອນໜ້ານັ້ນ, ຕອນບ່າຍວັນທີ 18/3, ຄະນະປະຈຳສະພາແຫ່ງຊາດ ໄດ້ປຶກສາຫາລື ແລະ ໃຫ້ຄຳເຫັນກ່ຽວກັບຮ່າງກົດໝາຍສະບັບປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍລາຍຮັບວິສາຫະກິດ ແລະ ຮ່າງກົດໝາຍວ່າດ້ວຍການປະຕິບັດການປະຢັດ, ຕ້ານການຟຸມເຟືອຍ (ສະບັບປັບປຸງ). ກ່ຽວກັບຮ່າງກົດໝາຍປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍລາຍຮັບວິສາຫະກິດ, ສະມາຊິກຂຂອງຄະນະປະຈຳສະພາແຫ່ງຊາດສ່ວນຫຼາຍ ໄດ້ເຫັນດີຕໍ່ແຜນນະໂຍບາຍຫຼຸດຜ່ອນພາສີອາກອນ ເພື່ອແນໃສ່ຮັບປະກັນລັກສະນະແກ້ງແຍ້ງໃນການດຶງດູດການລົງທຶນ ແລະ ສະເໜີຄົ້ນຄ້ວາ, ກຳນົດໃນກົດໝາຍກ່ຽວກັບຂັ້ນຕອນຫຼຸດຜ່ອນອາກອນເຖິງປີ 2020, ຮັບປະກັນໃຫ້ເໝາະສົມກັບຍຸດທະສາດປະຕິຮູບອາກອນ. ສຳລັບຂໍ້ກຳນົດບຸລິມະສິດອາກອນ, ຮ່າງກົດໝາຍເພີ່ມເຕີມນະໂຍບາຍບຸລິມະສິດອາກອນສຳລັບອົງການການເງິນຈຸລະພາກ, ບຸລິມະສິດອາກອນສຳລັບການເຄື່ອນໄຫວລ້ຽງປູກ, ປຸງແຕ່ງຜະລິດຕະພັນກະເສດ - ເຄື່ອງປ່າຂອງດົງ ແລະ ສິນໃນນ້ຳ, ຜະລິດເກືອ, ຜະລິດແນວພັນປູກແລະ ສັດນ້ອຍ, ບຸລິມະສິດອາກອນສຳລັບການລົງທຶນເປີດກ້ວາງ... ສະມາຊິກຄະນະປະຈຳສະພາແຫ່ງຊາດ ຫຼາຍຄົນ ໄດ້ເຫັນດີຕໍ່ເລື່ອງເປີດກ້ວາງເປົ້າໝາຍໄດ້ຮັບບຸລິມະສິດອາກອນ ເພື່ອແນ່ໃສ່ຮັບປະກັນໃຫ້ເໝາະສົມກັບນະໂຍບາຍບຸລິມະສິດທີ່ໄດ້ກຳນົດໃນບັນດາກົດໝາຍສະເພາະຂະແໜງ.
ກ່ຽວກັບຮ່າງກົດໝາຍວ່າດ້ວຍປະຕິບັດການປະຢັດ, ຕ້ານການຟຸງເຟືອຍ (ສະບັບປັບປຸງ), ບັນດາສະມາຊິກຄະນະປະຈຳສະພາແຫ່ງຊາດ ຖືວ່າ: ຮ່າງກົດໝາຍໄດ້ເພີ່ມເຕີມຫຼາຍເນື້ອໃນໃໝ່ຫຼາຍ, ຫຼາຍບັນຫາໄດ້ຫັນເປັນລະອຽດກ່ວາເມື່ອທຽບໃສ່ກົດໝາຍພວມປະກາດໃຊ້ໃນປະຈຸບັນ.
ແລະກໍ່ຢູ່ທີ່ກອງປະຊຸມຄັ້ງນີ້, ຄະນະປະຈຳສະພາແຫ່ງຊາດ ໄດ້ຮັບຮອງເອົາລັດຖະບັນຍັດ ປັບປຸງ, ເພີ່ມເຕີມບາງຂໍ້ມາດຕາຂອງລັດຖະບັນຍັດກ່ຽວກັບເງິນຕາຕ່າງປະເທດຝາກມາ ດ້ວຍ 4 ເນື້ອໃນແຕກຕ່າງກັນທີ່ສຳຄັນກ່ຽວຂ້ອງເຖິງການດຶງດູດເງິນລົງທຶນໂດຍກົງຈາກຕ່າງປະເທດ, ກູ້ຢືມ ແລະ ໃຊ້ໜີ້ຂອງຜູ້ຢູ່ອາໄສ, ການລົງທຶນໂດຍທາງອ້ອມຈາກຕ່າງປະເທດ ເຂົ້າ ຫວຽດນາມ ແລະ ຕ້ານສະພາບການໃຊ້ສະກຸນເງິນ ໂດລາສະຫະລັດ.