ຄະນະປະຈຳສະພາແຫ່ງຊາດໃຫ້ຄວາມເຫັນຕໍ່ຮ່າງກົດໝາຍວ່າດ້ວຍແນວໂຮມປະເທດຊາດຫວຽດນາມ
(ທ່ານນາງຮອງປະທານສະພາແຫ່ງຊາດ ຫງວຽນທິກິມເງິນ)
(vovworld) - ຕອນບ່າຍວັນທີ 1/10, ຄະນະປະຈຳສະພາແຫ່ງຊາດໃຫ້ຄວາມເຫັນຕໍ່ຮ່າງກົດໝາຍວ່າດ້ວຍແນວໂຮມປະເທດຊາດຫວຽດນາມ (ສະບັບປັບປຸງ). ບັນດາຜູ້ແທນໃຫ້ຂໍ້ສັງເກດວ່າ, ການປັບປຸງກົດໝາຍວ່າດ້ວຍແນວໂຮມປະເທດຊາດຫວຽດນາມ ແມ່ນມີຄວາມຈຳເປັນທີ່ສຸດ, ເພື່ອແນໃສ່ຫັນບັນດາຂໍ້ກຳນົດໃໝ່ຂອງລັດຖະທຳມະນູນທີ່ກ່ຽວຂ້ອງເຖິງ ແນວໂຮມປະເທດຊາດຫວຽດນາມເປັນລະອຽດ, ແກ້ໄຂບັນດາຂໍ້ຈຳກັດ, ຄົງຄ້າງໃນການປະຕິບັດກົດໝາຍ, ສ້າງພື້ນຖານນິຕິກຳ ແລະ ເງື່ອນໄຂຈຳເປັນໃຫ້ແກ່ການເຄື່ອນໄຫວຂອງ ແນວໂຮມປະເທດຊາດຫວຽດນາມໃນໄລຍະຈະມາເຖິງ. ໜຶ່ງໃນບັນດາຈຸດໃໝ່ຂອງລັດຖະທຳມະນູນ ແມ່ນຮັບຮູ້ບົດບາດໜ້າທີ່ຂອງແນວໂຮມປະເທດຊາດໃນການຕິດຕາມກວດກາ ແລະ ໄຈ້ແຍກຕີລາຄາສັງຄົມ. ເມື່ອທຽບໃສ່ກົດໝາຍວ່າດ້ວຍ ແນວໂຮມປະເທດຊາດຫວຽດນາມທີ່ພວມປະກາດໃຊ້, ຮ່າງກົດໝາຍໄດ້ຮັບການເປີດກວ້າງກວ່າກ່ຽວກັບຂອບເຂດ ແລະ ເປົ້າໝາຍຕິດຕາມກວດກາ. ກ່ຽວກັບບັນຫານີ້. ທ່ານນາງຮອງປະທານສະພາແຫ່ງຊາດ ຫງວຽນທິກິມເງິນ ຍົກຄຳເຫັນວ່າ:
“ກ່ຽວກັບຮູບການຕິດຕາມກວດກາ, ຂ້າພະເຈົ້າສະເໜີຕ້ອງຄິດໄລ່ຢ່າງລະອຽດ. ຖ້າຫາກພວກເຮົາກຳນົດຮູບການຈັດຕັ້ງຄະນະຕິດຕາມກວດກາ ມັນຈະຫັນການເຄື່ອນໄຫວຕິດຕາມກວດກາຂອງແນວໂຮມປະເທດຊາດເປັນວຽກງານບໍລິຫານຂອງລັດ. ວຽກງານຕິດຕາມກວດກາຂອງແນວໂຮມປະເທດຊາດຕ້ອງຕ່າງກັບຂອງຄະນະຕິດຕາມກວດກາສະພາແຫ່ງຊາດ ຫຼືສະພາປະຊາຊົນ, ນັ້ນແມ່ນການຕິດຕາມກວດກາຜ່ານປະຊາຊົນ, ຜ່ານບັນດາອົງການຈັດຕັ້ງຂອງແນວໂຮມປະເທດຊາດດ້ວຍຫຼາຍຮູບການ, ແລະ ກ້າວເຂົ້າສູ່ຊີວິດຂອງປະຊາຊົນ“