ຄະນະຜູ້ແທນຂັ້ນສູງກອງທັບປະຊາຊົນ ຫວຽດນາມ ຢ້ຽມຢາມໄທ
(ພາບ: phungquangthanh.net)
( vovworld ) – ເນື່ອງໃນໂອກາດການເດີນທາງຢ້ຽມຢາມ ແລະເຮັດວຽກຢູ່ໄທ, ຕອນຄ່ຳວັນທີ 25/2, ຄະນະຜູ້ແທນຂັ້ນສູງກອງທັບປະຊາຊົນ ຫວຽດນາມ ໂດຍທ່ານພົນໂທ ໂດ໋ບາຕິ້, ຫົວໜ້າເສນາທິການໃຫ່ຍ ກອງທັບປະຊາຊົນ ຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ນຳໜ້າໄດ້ມີການພົບປະ ແລະ ເຮັດວຽກກັບສະຖານທູດ ຫວຽດນາມ ປະຈຳ ໄທ. ທີ່ການເຮັດວຽກ, ທ່ານຮອງລັດຖະມົນຕີກະຊວງປ້ອງກັນປະເທດ ໂດ໋ບາຕິ້ ໄດ້ແຈ້ງໃຫ້ຊາບໝາກຜົນຂອງການຢ້ຽມຢາມ ແລະ ເຮັດວຽກຢູ່ໄທຢ່າງເປັນທາງການຂອງຄະນະຜູ້ແທນຂັ້ນສູງກອງທັບປະຊາຊົນ ຫວຽດນາມ. ໃນນັ້ນ, ທ່ານຮອງລັດຖະມົນຕີກະຊວງປ້ອງກັນປະເທດ ໂດ໋ບາຕິ້ ໃຫ້ຮູ້ວ່າ: ຝ່າຍກອງທັບໄທ ໄດ້ເຫັນດີເປັນເອກະສັນກັບບັນດາຂໍ້ສະເໜີຂອງ ຫວຽດນາມ ໃນຂົງເຂດການທະຫານ. ກ່ຽວກັບເລື່ອງຊາວປະມົງສອງປະເທດໄດ້ລ່ວງລ້ຳເຂດນ່ານທະເລຂອງກັນໂດຍບໍ່ມີເຈດຕະນາໃນການຈັບຫາປານັ້ນ, ທ່ານຮອງລັດຖະມົນຕີກະຊວງປ້ອງກັນປະເທດ ໂດ໋ບາຕິ້ ໃຫ້ຮູ້ວ່າ ຄະນະໄດ້ສະເໜີຕໍ່ສອງຝ່າຍ ວ່າ: ຖ້າພົບເຫັນກໍລະນີຄືດັ່ງກ່າວ ແມ່ນຕ້ອງອະທິບາຍ, ຮຽກຮ້ອງໃຫ້ຊາວປະມົງສອງປະເທດ ກັບຄືນເຂດທະເລຂອງປະເທດຕົນ, ບໍ່ຄວນຈັບຕົວ ຫລືຍິ່ງປືນນາບຂູ່, ເປັນອັນຕະລາຍເຖິງຊີວິດອິນຊີຂອງຊາວປະມົງ, ຝ່າຍໄທ ກໍໄດ້ເຫັນດີເປັນເອກະສັນກັບບັນຫານີ້. ທ່ານຮອງລັດຖະມົນຕີກະຊວງປ້ອງກັນປະເທດ ໂດ໋ບາຕິ້ ຍັງໃຫ້ຮູ້ຕື່ມອີກວ່າ, ທີ່ການພົບປະກັບທ່ານນາງນາຍົກລັດຖະມົນຕີໄທ ຍິງຮັກ ຊີນນະວັດ, ທ່ານນາງ ຍິງຮັກ ກໍສະແດງໃຫ້ເຫັນການສະໜັບສະໜູນບັນດາຂໍ້ສະເໜີນີ້.
ເນື່ອງໃນໂອກາດນີ້, ທ່ານຮອງລັດຖະມົນຕີກະຊວງປ້ອງກັນປະເທດ ໂດ໋ບາຕິ້ ກໍໄດ້ລາຍງານໂດຍຫຍໍ້ກ່ຽວກັບກັບສະພາບພາຍໃນປະເທດໃນປີ 2011. ພິເສດ ແມ່ນສະພາບການຢູ່ທະເລຕາເວັນອອກ. ແຕ່ເຖິງແນວນັ້ນກໍຕາມ, ຫວຽດນາມ ຍຶດໝັ້ນຕໍ່ສູ້ບົນພື້ນຖານກົດໝາຍສາກົນ, ກົດບັດຂອງສະຫະປະຊາຊາດກ່ຽວກັບກົດໝາຍທະເລປີ 1982 ແລະ ຖະແຫຼງການກ່ຽວກັບການປະພຶດຕໍ່ຂອງຝ່າຍຕ່າງໆໃນທະເລຕາເວັນອອກ (DOC )ໂດຍຈີນ ໄດ້ເຊັນກັບບັນດາປະເທດອາຊຽນ, ຮັບປະກັນສະຖຽນລະພາບບົນທະເລ ແລະ ຄວາມສະຫງົບປອດໄພເວົ້າລວມ.