(vovworld) - ຕອນເຊົ້າວັນທີ 4/9, ຢູ່ວຽງຈັນ, ທ່ານນາຍົກລັດຖະມົນຕີລາວ ທອງສິງ ທຳມະວົງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງວິທະຍາສາດ ແລະ ເຕັກໂນໂລຢີຫວຽດນາມ ໂດຍທ່ານ Nguyen Quan, ກຳມະການສູນກາງພັກ ນຳໜ້າ, ທີ່ພວມຢູ່ຢ້ຽມຢາມ ແລະ ເຮັດວຽກຢູ່ລາວໃນລະຫວ່າງວັນທີ 4 – 7/9. ທີ່ການຕ້ອນຮັບ, ທ່ານລັດຖະມົນຕີ Nguyen Quan ໄດ້ແຈ້ງໃຫ້ຊາບບາງຈຸດກ່ຽວກັບບັນດາໂຄງການພັດທະນາຂອງວິທະຍາສາດ ແລະ ເຕັກໂນໂລຢີຫວຽດນາມ ໃນໄລຍະຈະມາເຖິງ, ຢືນຢັນວ່າ ຫວຽດນາມ ຈະເຮັດຈົນສຸດຄວາມສາມາດຂອງຕົນເພື່ອເພີ່ມທະວີການຮ່ວມມືຊ່ວຍລາວ ກ່ຽວກັບດ້ານວິທະຍາສາດ ແລະ ເຕັກໂນໂລຢີ, ຊຸກຍູ້ບັນດາໂຄງການ, ບຳລຸງສ້າງແຫຼ່ງຊັບພະຍາກອນມະນຸດ, ແລກປ່ຽນຂໍ້ມູນຂ່າວສານ… ແລະປາດຖະໜາວ່າ ທ່ານນາຍົກລັດຖະມົນຕີລາວ ທອງສິງ ທຳມະວົງ ເອົາໃຈໃສ່, ຊີ້ນຳເພື່ອໃຫ້ການຮ່ວມມືລະຫວ່າງສອງກະຊວງ ບັນລຸໄດ້ໝາກຜົນຄືຄວາມຫວັງ, ປະກອບສ່ວນປະຕິບັດ “ຍຸດທະສາດຮ່ວມມືດ້ານເສດຖະກິດ,ວັດທະນະທຳ, ວິທະຍາສາດເຕັກນິກ ຫວຽດນາມ - ລາວ 2011 - 2012” ເຊິ່ງລັດຖະບານສອງປະເທດໄດ້ລົງນາມ. ທ່ານນາຍົກລັດຖະມົນຕີລາວ ທອງສິງ ທຳມະວົງ ໄດ້ສະເໜີໃຫ້ຫວຽດນາມ ສືບຕໍ່ເອົາໃຈໃສ່ຊ່ວຍເຫຼືອລາວ ກ່ຽວກັບວິທະຍາສາດ ເຕັກໂນໂລຊີ, ໂດຍສະເພາະແມ່ນໃນຂົງເຂດບຳລຸງສ້າງ, ແບ່ງປັນຂ້ໍມູນຂ່າວເພື່ອຮັບໃຊ້ຊີວິດການເປັນຢູ່ຂອງປະຊາຊົນ, ຕອບສະໜອງພາລະກິດສ້າງສາປະເທດຊາດ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບ ແລະ ຄວາມສາມັກຄີແບບພິເສດລະຫສ່າງສອງປະເທດ ໃຫ້ນັບມື້ນັບພັດທະນາ.
ໃນຂອບເຂດການຢ້ຽມຢາມ, ວັນທີ 5/9, ຢູ່ແຂວງຄຳມ່ວນ, ຄະນະຜູ້ແທນຂັ້ນສູງຫວຽດນາມ ຈະເຂົ້າຮ່ວມງານໂຮງຊຸມມູນ, ພົບປະແລກປ່ຽນມິດຕະພາບຫວຽດນາມ - ລາວ ລະຫວ່າງສອງກະຊວງ; ພິທີ່ມອບຫຼຽນໄຊອິດສະຫຼະຊັ້ນ 2 ຂອງລັດຖະບານລາວໃຫ້ທ່ານລັດຖະມົນຕີຫວຽດນາມ Nguyen Quan, ຫຼຽນໄຊແຮງງານຊັ້ນ 2 ໃຫ້ທ່ານຮອງລັດຖະມົນຕີ Tran Viet Thanh; ກອງປະຊຸມສຳມະນາວິທະຍາສາດ “ເພີ່ມທະວີການຮ່ວມມືກ່ຽວກັບວິທະຍາສາດ ແລະ ເຕັກໂນໂລຢີຫວຽດນາມ - ລາວ” ແລະ ບັນດາການເຄື່ອນໄຫວສຳຄັນອື່ນໆ ເພື່ອສະເຫຼີມສະຫຼອງປີສາມັກຄີ ມິດຕະພາບຫວຽດນາມ - ລາວ 2012.