(vovworld) – ຕອນບ່າຍວັນທີ 18/5, ທີ່ນະຄອນຫຼວງ ວຽງຈັນ, ຄະນະຜູ້ອທນຂັ້ນສູງພັກ ແລະ ລັດ ຫວຽດນາມ ໂດຍທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກກອມມູນິດ ຫວຽດນາມ ນຳໜ້າ, ເຂົ້າຮ່ວມພິທີໄຫວ້ອາໄລບັນດາຜູ້ນຳ ລາວ ຖືກເສຍຊີວິດໃນການເດີນທາງໄປປະຕິບັດງານຍ້ອນເຫດອຸປະຕິເຫດເຮືອບິນຕົກ. ພາຍຫຼັງພິທີໄວ້ອາໄລ, ທ່ານ ເລຮົ່ງແອງ ສົ່ງຄຳແບ່ງເບົາຄວາມເສົ້າສະລົດໃຈຢ່າງເລິກເຊີ່ງຂອງຄະນະບໍລິຫານງານສູນກາງພັກ, ສະພາແຫ່ງຊາດ, ລັດຖະບານ ຫວຽດນາມ ມາຍັງ ຄະນະບໍລິຫານງານສູນກາງພັກ, ສະພາແຫ່ງຊາດ, ລັດຖະບານ ລາວ, ທ່ານ ເລຮົ່ງແອງ ເຊື່ອໝັ້ນວ່າພັກ, ລັດ, ສະພາແຫ່ງຊາດ, ລັດຖະບານ ແລະ ປະຊາຊົນ ລາວ ບັນດາເຜົ່າຈະຜ່ານຜ່າຄວາມເຈັບປວດ, ຄວາມເສຍຫາຍອັນໃຫຍ່ຫຼວງນີ້ໂດຍໄວ, ສືບຕໍ່ພາລະກິດກໍ່ສ້າງ, ປົກປັກຮັກສາ ແລະ ພັດທະນາປະເທດຊາດ. ພັກ, ລັດ ແລະ ປະຊາຊົນ ຫວຽດນາມ ຢືນຢັນຈະພ້ອມກັບພັກ, ລັດ ແລະ ປະຊາຊົນ ລາວ ບັນດາເຜົ່າສືບຕໍ່ຮັກສາ, ເພີ່ມພູນຄຸນສ້າງຢ່າງບໍ່ຢຸດຢັ້ງ ແລະ ສືບທອດໃຫ້ແກ່ຄົນລຸ່ນຫຼັງສາຍພົວພັນສາມັກຄີແບບພິເສດ ຫວຽດນາມ - ລາວ.
ວິສາຫະກິດຫວຽດນາມໜູນຊ່ວຍບັນດາຄອບຄົວຜູ້ປະສົບເຄາະຮ້າຍຈາກເຫດເຮືອບິນຕົກຢູ່ລາວ
ວັນທີ 19/5, ທ່ານຟ້າມກວາງຕຸ່ງ, ຮອງຜູ້ອຳນວຍການໃຫ່ຍທະນາຄານການຄ້າຫຸ້ນສ່ວນລົງທຶນ ແລະ ພັດທະນາຫວຽດນາມ (BIDV), ຕາງໜ້າໃຫ້ສະຫະສະມາຄົມບັນດານັກລົງທຶນຫວຽດນາມ ໄປລາວ ມອບຈຳນວນເງິນ 47.000 USD ໃຫ້ແກ່ຫ້ອງວ່າການລັດຖະບານລາວ ເພື່ອແນໃສ່ໜູນຊ່ວຍຍາດຕິພີ່ນ້ອງ ແລະ ຄອບຄົວຜູ້ປະສົບເຄາະຮ້າຍຈາກເຫດເຮືອບິນຕົກຢູ່ລາວ ເມື່ອວັນທີ 17/5 ຜ່ານມາ. ທ່ານຟ້າມກວາງຕຸ່ງ ໃຫ້ຮູ້ວ່າ, ນີ້ແມ່ນນ້ຳໃຈຂອງບັນດານັກລົງທຶນຫວຽດນາມ, ຂອງທະນາຄານ BIDV, ທະນາຄານຮ່ວມທຸລະກິດລາວ-ຫວຽດ (LVB), ບໍລິສັດປະກັນໄພລາວ-ຫວຽດ (LVI) ທີ່ມີຕໍ່ຄອບຄົວຜູ້ປະສົບເຄາະຮ້າຍ./.